Alak Thanh long Bảo Long di tỉnh Bình Thuận

Dalam mbang jit Covid-19, meng bruk pambuak pagam di Sở Công thương TP.HCM, Labik ngak alak Thanh long Bảo Long di tỉnh Bình Thuận hu ba pandap tagok pablei di dom sàn pablei salih điện tử Shopee, Lazada saong hu rilo urang kakei blei. Sa-ai Nguyễn Ngọc Bảo, po labik ngak ini ndom lac: Ngan haong dom labik ngak sit saong urang nong, brei hu bruk daong, palagaih ka jalan ngak, ilamu di jabat karja nan ka meng hu mbaok tame dom website saong sàn pablei salih điện tử.

“Mikva urang nong oh ka thau công nghệ thông tin rilo, meda ngak website mbuan mbiah piah ba pandap panda tagok, ngak habar dalam 2-3 mbang click  chuột nan lac drei ba hu thaot binguk, thong tin tagok paje, plaih dom thao tác rilo, srau kadau. Blaoh tuk hu urang blei jeng brei thau tapa email di drei samar di abih.”

Tapa bruk pambuak pagam di Sở Công thương TP.HCM, urak ini dom sàn pablei salih điện tử jeng daok palaghaih ka dom doanh nghiệp sit, labik ngak mbang pablei salih, urang nong, hợp tác xã di dom tỉnh, ban pablei pandap tapa kênh ini. Ong Trần Tuấn Anh, Yam ndok điều hành Shopee Việt Nam brei thau: 

“Urak ini, Shopee daok hu danak dak Shopee Farm, khaol dahlak ngak bruk haong dom jabat karja, abih di nyu lac Sở Công thương piah daong ka urang nong, hợp tác xã taom gaok hu haong urang blei angaok Shopee. Khaol dahlak daok daong saong pathram ka urang nong piah ka dom urang ini thau cambaih jang ka jalan pablei pandap saong bruk ngak ini.”

Gam haong nan, dom tỉnh ban jeng daok kham merat daong ka dom labik ngak pandap, pablei salih, hợp tác xã saong urang nong di drei jalan taom gaok saong ba pandap tagok dom website pablei salih. Amuk Nguyễn Ngọc Dung, Phaok Akaok Pasak Pachreih kong saong brei panuac cak rok patagok bruk ngak kong tỉnh Kiên Giang brei thau:

“ Doanh nghiệp, labik ngak pandap tok payua thong tin pandap panda ye Sở Công thương hu menuac ngak taong abih bruk daok veik yau ba thaot binguk, thong tin meyaih khan pandap tagok website. Tuk thei caong khin blei ye tame website: kigi.com.vn meda duah mboh pandap panda saong laik phon di dom doanh nghiệp, labik ngak pandap bo urang nan daok caong khin pambuak pagam.”

Ong Nguyễn Nguyên Phương, Phaok akaok Sở Công thương TP.HCM brei thau:  TP palagaih ka dom doanh nghiệp, labik ngak pandap parang iek, meyaih khan pandap panda, pambuak pagam, mboh tangin pambuak bruk haong dom đối tác angaok website www.ketnoicungcau.vn saong dom gian hàng parang iek thực tế ảo. Taphia di nan, Sở Công thương TP daok hu pambuak bruk haong Tiki, Sendo, Shopee, Lazada… daong, tacei pato ka dom doanh nghiệp, labik ngak pandap, pabak brei hu mbaok tame sàn pablei salih điện tử, peih prong jalan pablei pandap. Taphia di nan, TP jeng hu labik piah ka dom doanh nghiệp, labik ngak pandap di dom tỉnh, ban meyaih khan pandap panda tapak haong urang blei meyah caong khin.

Tapa jit ruak, jalan ngak pandap, pablei salih saong bruk bhian randap blei pandar di manuac sia jeng salih karei. Meng bruk daong di dom jabat karja, dom labik ngak pandap, pablei salih, hợp tác xã, urang nong di rilo puk palei daok ngak randap haong bruk bahrau, ba pandap panda di drei tagok website, sàn pablei salih điện tử saong dom kênh pablei pandap online karei piah jhul pakhang bruk pablei tabiak./.

Urang lang: Jasi -13/12/2020