Urang nong Ninh Thuan pacang caga pandiak bhang 

Kreih bilan 3, dang angaok danao Bàu Tró di xã Vĩnh Hải, huyện Ninh Hải, tỉnh Ninh Thuận, kol dahlak oh sahneng mboh lac labik ini dahlau thiah lac danao padang ia. Mbaok danao praong jaik 4 hecta thu lagu yau di sa mạc, angaok nan hu dom tambok haluk glaong bair gam yaok ratuh baoh bingun kayua bhap bini kuac dalam kreh danao  piah mek ia. Yaok bingun praong jaik 50 mét vuông, dalam jaik 6 mét. Ông Phạm Văn Mại – urang jakar pachreih nong xã Vĩnh Hải, huyện Ninh Hải brei thau :Harei ini, labik Bàu Tró daok dang pak ini hu labih 80 bingun. Ndom biak, meng hu mikva kuac 80 baok bingun sit ini meng hu ginup ia pruh. Daok labaih 3 bilan tra, nan ye meda hu dom taneh njauk thu ia.

Sang saai Võ Văn Trung daok di palei Thái An, xã Vĩnh Hải hu 7 sào nho. Danao  Bàu Tró oh daok ia, saai njauk pah mac xúc kuac bingun dalam kreh danao piah mek ia mai ka taneh nho daok pala. Jien pah kuac bingun saong blei nding raok ia mai puh abih labaih 30 trieu dong. Daok kak nding raok ia labik bingun bahrau kuac, saai Võ Văn Trung brei thau :  Pandiak bhang dui atah, mikva urang nong pak ini buh tabiak sa yaom jien biak rilo. Sang halei jeng kuac danao, sang halei jeng danao abih. Sang dahlak jeng kuac dua mbang danao piah pruh ia patak pataom ka nho nyu diuk. Daok urak ini halau ia njanh nyu thu abih, caong ka nyu hu, oh khin cakrok.

Lingik pandiak bhang dui atah meng thun 2014 tal ini ngak ka rilo libik di tinh Ninh Thuan thu lagu. Rilo danao ia di dom huyen Bác Ái, Thuận Bắc, Thuận Nam, Ninh Phước saong Ninh Hải thu abih, oh ginup ia pruh ka padai, njam patam saong rilo janih phun pala karei. Tapol athur jeng daok dang anak bruk kurang ia menyum.

Tui kuhria mboh barau abih di Sở ngak nong saong patagok palei pala tỉnh Ninh Thuan, meng akaok thun tal ini, kayua pandiak bhang, dalam tỉnh hu labaih 38 hecta padai gaok lahik abih mbong, 135 ha njam patam saong 75 ha phun mbang baok trun nang suat 50%; labaih 12.500 drei athur oh hu ia menyum njauk ba nao labik karei.

Kurang ia trak, yau nan ye piah daong phun pala saong athur di dom labik pandiak bhang, urak ini bruk kuac bingun mek ia pacang pandiak bhang lac bruk daok hu bhapbini di rilo puk palei dalam tinh peih ngak. Ông Nguyễn Tin – akaok duk ngak nong, Sở ngak nong saong patagok palei pala tinh Ninh Thuan brei thau :Urak ini di xa Phước Trung, mikva hu kuac 4 baok danao piah mek ia menyum ka athur. Pak Thuận Bắc ye labik Suối Le xã Phước Kháng urang jeng hu kuac dahlau tet 2 baoh. Di huyện Ninh Hải, bhapbini jeng kuac 80 baoh danao piah pruh ka dom phun pala daok di tukvak paik, yuak, jien buh tabiak ngak abih jaik 2 tỷ meteh.

Biak di nyu, halau ia njar hu meng dom baoh danao oh rilo, nan ye urang nong toh pruh sit sit ka phun pala. Sở ngak nong saong patagok palei pala tỉnh Ninh Thuan jeng hu kakei urang nong dalam tỉnh njauk pruh patak pataom piah hu ginup ia khik ka taneh phun pala mbiah tal tuk hajan trun./.

Thúy Linh