Urang nong thar var pala njam patam piah pablei tet 

Thun ini, diuk pasang ong Nguyễn Quốc Nam daok di khu phố 3, phường Văn Hải, ban sit Phan Rang– Tháp Chàm pala labaih 1 sào bingu cúc piah pablei Tết. Cúc urak ini pala hu labaih 1 bilan saong diuk pasang ong Nam daok hu pala pablak phun vạn thọ piah caong hu rilo jien jang meng hamu bingu:

"Jien buh tame ngak jeng oh hadom, bingu ini 150.000 đồng sa ribau phun. Mek meng Đà Lạt mai ini pala saong bingu cúc 3 bilan meteh meng buac pablei hu nan ye pala avar jang. Daok vạn thọ ini bahrau trun pajaih min'.

Amuk Dương Thị Mười daok di xã Văn Hải, ban sit Phan Rang– Tháp Chàm, dom pluh thun ini mai diuk meng 2 sào pala njam patam. Yaok harei, amuk pala njam ngem, njam sabei saong njam pahe, lasun, ngò. Piah pablei ka darak pasar Tết ini, amuk pala taong abih 2 sào njam pahe. Amuk Mười brei thau, njam pahe pablei Tết hu yaom jang min urak ini langik tuk hajan tuk pandiak, yaom khak tagok glaong, nan ye mboh jeng duh hatai:

"2 sào ini drei buh tame dom pluh triệu. Meyah drei buh tame 3 triệu drei pablei hu 10 triệu, kaoh abih jien jru, jien khak abih 5 triệu, drei daok laba hu 5 triệu. Tết ini drei pala ngò, é. É dom harei dahlau pablei tal 50- 60.000đồng/kg, urak ini daok 25.000đồng/kg; ngò harei ini daok 10.000 đồng/kg".

Saai Phạm Văn Hiên, urang jakar Balai pala drak saong pacang khik phun pala ban Phan Rang – Tháp Chàm brei thau, urak ini dom labik pala njam patam di ban jeng hu trun pajaih abih piah pablei Tết. Min thun ini langik tasik oh siam lagaih, yaom khak tagok glaong nan ye bruk pala njam patam di mikva jeng glaih glar jang:

"Chi cục Pala drak saong pacang khik phun pala tỉnh jeng yau balai hu tacei pato mikva jalan  buh khak, pruh jru, mong iek piah hu năng suất pablei tuk Tết ini. Dom mblang taneh njam patam njauk aia dauk, phun pala khut khat, balai jeng hu tacei pato ka mikva li-ua, pambu, urak ini mikva jeng hu trun pajaih akaok lasun, ngò saong  quế ka nyu samu tukvak pablei Tết ini"   

Sa-ai Lê Thị Gái, daok di xã Nhơn Hải, huyện Ninh Hải brei thau: kayua mbang hajan meng blaoh dui atah nan ye labaih meteh mblang taneh labik dhaong njauk aia dauk. Tuk langik pandiak thu veik, aia trun, sang sa-ai ngak taneh, pala 2 sào lasun ka samu pablei Tết anak tal:

"Drei trun pajaih sa mbang yau ini jaik 17-18 triệu. Meyah hu yaom ye pablei hu dua pluh dom tal klau pluh triệu. Bo meyah oh hu yaom ye pablei hu 7-8 triệu min. Tết mai tok pala lasun oh pala hagait karei. Pablei dalam tỉnh, urang pablei salih mai tal ini piah blei. Urang trun tal ini blei blaoh ba nao pablei di darak"

Vụ Tết ini, tỉnh Ninh Thuận pala jaik 3.000 ha njam patam dom janih, tui kuhria mek hu jaik 50.000 tấn. Piah pacang plaih bruk oh siam meng langik tasik saong khik hu năng suất glaong, Chi cục Pala drak saong Pacang khik phun pala tỉnh hu tabiak panuac tacei pato, pathau khan dom jalan mong iek saong pacang caga sinh vật palai kaik njam patam. Gam haong nan, tỉnh Ninh Thuận jeng pachreih doanh nghiệp, hợp tác xã, tổ hợp tác jhul khang bruk pambuak gauk pala njam patam tui chuỗi giá trị khép kín, blei veik abih njam patam pala hu, daong ka urang nong salih bruk bhian randap ngak sit sot, ngak jeng bhum pala praong ba mai yaom kinh tế glaong.

Ong Phạm Dũng– Akaok Chi cục Pala drak saong pacang khik phun pala, Sở ngak nong saong patagok palei pala tỉnh Ninh Thuận brei thau: 

"Tỉnh meda peih dom nyaom biai pambuak gauk saong ieu da-a dom doanh nghiệp hu điều kiện di langiu tỉnh tame Ninh Thuận piah buh jien ngak mbang, pambuak gauk dalam bruk ngak tui chuỗi piah paglaong yaom angaok sa mblang taneh"

Labaih sa bilan tra lac tal Tết Nguyên đán thun thak Rimaong 2022. Urang pala njam patam di Ninh Thuận gam jan van haong bruk pala drak gam caong mong yaok bruk hu siam laghaih jang piah ka njam patam Tết pala njauk, hu yaom, piah ka urang nong hu jien mbang Tết ka nyu trei sil./.

Urang lang: Jasi -26/12