Meng harei 6 bingun tết anek sak kara tal ini, dom cảng ikan di tỉnh NT daok ngak bruk veik. Pak dom harei akaok thun ini, urang taong cap ikan dom puk palei dalam tỉnh hu njauk vụ ikan akaok thun saong caong khin sa thun barau hu ralo patuah jamo. Urang pambuak bruk Văn Cảnh saong Minh tuấn hu kadha vak brei thau ka bruk nao tasik akaok thun di urang taong cap ikan Ninh Thuận.

Cảng ikan Đông Hải, ban sit Phan Rang - Tháp Chàm dom harei ini hu rilo kapal gilai tame tabiak ngan saong rilo janih kaya ikan, brei mboh mbang nao tasik akaok thun di urang taong cap ikan biak siam mekre. Hu dom po kapal ikan tabiak tasik meng harei 3 bingun tết, tame cảng ikan tuk sabuk mesup harei 6 bingun tết brei thau, thun ini, kaya ikan taong cap hu dalam mbang nao tasik akaok thun hu kein laba jang labaih 30% duk saong thun dahlau. Dom kapal jeng pablei kaya ikan hu meng 50 tal 80 triệu đồng hadei di 2 harei taong cap ikan angaok tasik. Urak ini, labik taong cap di tỉnh hu mực ống biak ralo nan ye dalam mesup harei 6 bingun tết, dom urang taong cap ikan samar tabiak tasik. Urang taong cap ikan angan Lê Thành Huynh, daok di phường Đông Hải, ban sit Phan Rang – Tháp Chàm, tỉnh Ninh Thuận brei thau:

 “Dom harei tapa, kaya ikan mikva taong cap hu biak ralo. Dalam mbang nao tasik akaok thun mikva caong khin biak ralo janih, kayua dalam thun bloh taong cap hu takik nan ye mikva caong khin thun ini hu rilo piah patagok jien mek tame”.

Meng bloh, urang taong cap ikan dalam tỉnh hu karja pachreih ba, daong phun jien ngak kapal công suất praong nao tasik tui nghị định 89 di rajaei tuk taong cap di Trường Sa. Dahlau di nan, dom kapal hu ngak barau meng phun jien tui nghị định 67 hu daong ka urang taong cap ikan khang hatai tabiak tasik, taong cap kaya ikan pak dalam dom harei akaok thun barau. Ong Dương Văn Thắng, po kapal kanduh pasei NT 91234 TS, tỉnh Ninh Thuận lac:

 “Dahlak mboh biak bui sambai oh ndom hu abih, hadei ini adei tabiak K1 – Hoàng Sa piah blei kaya ikan jeng yau pajeng ba menyek, ia ka dom urang taong cap ikan langiu nan”.

Urang taong cap ikan angan Lê Minh Trí, daok di xã Thanh Hải, huyện Ninh Hải, tỉnh Ninh Thuận barau hu baoh kapal ngak barau meng phun jien di nghị định 67 di rajaei chreih chrai lac:

 “Sang jeng hu 3 baoh kapal sit taong cap tapen takai tasik oh hu kein laba. Hu karja daong, drei hu kapal praong ye kham merat tabiak tasik livik harei. Caong khin kapal drei taong cap hu kein laba jang”.

Urak ini, dalam tỉnh Ninh Thuận hu jaik 2.500 sruh kapal gilai daok ngak bruk gam saong labaih 15 ribau urang taong cap kaya ikan angaok tasik. Kayua labik taong cap hu siam lagaih, meng akaok thun, urang taong cap ikan khang hatai tabiak saong caong khin thun anek sak kara 2016 lac sa thun jak jeng dalam bruk taong cap kaya ikan./.