Phật tử lac urang halan hatian brei kuah akaok piah plaih njaom anek ruak tuk ngak bruk di dom khoa hu ruak trak

Tame bruk ngak meng di harei 22/7/2021, Đại đức Thích Chúc Khai hu brei bruk tui iek, parabha bruk di kapul halan hatian agama hu 167 urang di rilo agama – di Sang iek ruak Hồi sức cấp cứu Covid-19. Meng bruk ngak di drei, langiu di bruk parabha tukvak hu mbaok ngak bruk ka dom urang halan hatian, Đại đức Thích Chúc Khai daok nao taom gaok tapak Thành đoàn haong mBan Khik iek Sang iek ruak, rami ramik, iek glang bruk mbang menyum, daong palagaih ka dom urang halan hatian duh ka urang ruak hu siam di abih. Jeng kayua yau nan ye, sa harei di Đại đức Chúc Khai tuk halei jeng jar var, hu biak takik tukvak piah padeih padei, daok veik tuk halei jeng brei paglaong hatai sangka, piah plaih  ngak kandah tal bruk di kapul. Đại đức Chúc Khai khan lac: “Tuk halan hatian tame ini, tuk camereip drei jeng mboh huac, min hadei di nan tuk mboh dom menuac ruak daok dang di labik diuk haong metai, dom urang halan hatian kol dahlak jeng kham merat abih drei, yam tapa abih bruk huac. Yaok urang jeng thau cambaih drei daok lac F1 saong jeng F0 tuk halei oh thau, nan ye urang halei jeng kham merat abih drei, yaok urang yaok bruk saong ngak abih drei”.

Meng bruk karei gauk di yaok khoa, dahlau di tuk parabha menuac tame yaok  khoa, Đại đức Chúc Khai jeng hu taom gaok, duah thau saong ndom biai haong dom urang halan hatain piah brei bruk ka nyu lagaih. Đại đức Chúc Khai jeng abih hatai klah rabha haong urang halan hatian ka jalan iek glang, ndom biai, pachreih ba, daong ka urang ruak. Ngan saong dom urang ruak caong khin ndom biai haong gauk gar, Đại đức jeng hu tacei pato urang halan hatian kham merat daong ieu phone, piah gauk gar hu ndom biai, hu taom gaok tapak tapa video, piah abih gauk hu sahanang hatai jang.

Tu sĩ Phật giáo mai tal sang iek ruak dã chiến, yaom lac hu brei bruk hagait, thei jeng kham merat abih drei, daong ka urang ruak meng hatai anit ranam di abih. Lac menuac thau bruk điều dưỡng, Đại đức Thích Tâm Quang hu brei bruk daong dom  điều dưỡng piah iek glang urang ruak Covid-19 trak, mbuan metai.

Yaok mbang iek glang urang ruak di Đại đức Tâm Quang dui atah 8 mon, sap yava bhian randap lac sap jamriak suak yava, luai suan, sap mac monitor. Thau lac urang ruak mboh huac saong duh hatai, piah pachreih ba urang ruak, yaok  “ca trực” gah likuk blah ao bảo hộ, Đại đức hu nyim Phật tử vak tagok dom panuac lac: “Dom ayut jhui huac hagait, hu kol dahlak daok jaik taphia”.

  Ngan saong urang halan hatian, oh hu bruk bui sambai halei samu bruk mboh urang ruak hu siam tagok, thit abih ruak, hu nao sang, saong jeng oh hu bruk pandik harao halei jang bruk tuk mboh dom menuac metai, lahik. Đại đức Tâm Quang brei thau: “Hu dom urang ruak trak, harei dahlau maong tame meta mboh yau khin ndom lac ‘daong brei klah di metai’, drei tok thau yuh kaok pachreih ba urang. Min harei hadei urang nan oh tapa hu, kayua dalam rup hu rilo ruak biak trak, tuk nan hatai drei mboh biak pandik harao. Min drei kham merat yam tapa, kayua daok hu rilo urang ruak daok cang”.

Nan jeng lac makna bo Đại đức Thích Tâm Quang tuk halei jeng caong khin pambak tabiak panuac ndom ini haong menuac tu, saong dom urang halan hatian daok ngak bruk, lac: “Meyah hu bruk hagait nan drei meda ngak hu, njauk ngak meng abih baoh hatai di drei meng urak ini saong pak di labik ini”.

Đại đức Thích Chúc Khai brei thau, rilo urang likau tut angan daok veik livik jang, atau tut angan halan hatian ngak bruk mbiah tal tuk abih jit ruak. Dahlau daih tut angan 1 bilan min tuk tame ini mboh dom bruk ngak biak kein ka mikva, nan ye caong khin daok veik piah hu klah rabha dom bruk siam mekre nan ka yaok menuac urang.

Dalam 54 urang halan hatian di Phật giáo, oh lac dom ong bhik haong sư cô bo dom ayut Phật tử jeng biak abih drei. Bahrau ini, hu 13 Phật tử lac urang halan hatian brei kuah akaok piah plaih njaom anek ruak tuk ngak bruk di dom khoa hu ruak trak, piah duh ka urang ruak hu siam di abih. Sa-ai Hà Hiếu Trung, akaok mban Điều dưỡng drut drui lac: “Biak thau dhar phor urang halan hatian biak rilo, meyah oh hu dom urang halan hatian, ye kol dahlak oh ngak truh, kayua kol dahlak biak glaih glar”./.

Urang lang: M.Phuong – 19/09