Bau tal angan anai gru Lê Thị Ngọc Nga, taong abih dom cei gru, anai gru saong anek saih sang bac Tiểu học Phạm Văn Hai di xã Phạm Văn Hai, huyện Bình Chánh, ban raya Hồ Chí Minh thei jeng pok meyaom. Anai Nga hu abih gauk iek praong, anit ranam kayua lac urak ini umo 63 thun, daok njauk ruak kik min oh ka tuk halei anai sahneng tal bruk luai pato.

Dalam labaih 20 thun tapa, tiết pato halei di anai Lê Thị Ngọc Nga di sang bac Tiểu học Phạm Văn Hai, huyện Bình Chánh jeng ba chreih chrai ka dom anek saih. Lac gru pato khối 1, anai tuk halei jeng sahneng duah jalan ngak ka tiết bac pachreih hu anek saih nao bac. Bruk naih gheih saong abih hatung hatain ka bruk pato, lac dom kadha bo thei jeng mboh meyah hu vaih tame rivang tal bac di anai.

Thun 2006, tal thun padeih hưu, abih hợp đồng haong sang bac Tiểu học Phạm Văn Hai, jeng lac tuk anai Nga thau lac drei njauk ruak ung thư. Biak pandiak harao. Min tuk sahneng tal dom anek saih anit ranam di drei, anai yau hu pabak pren khang piah var lihik ruak kik. Hadei di 4 thun mesruh haong dom mbang xạ trị, hóa trị, pren yava anai hu siam veik. Thun 2010, taduan hu panuac da-a nao ngak gru pato di palei, anai Nga ruah mai sang bac klak – sang bac Tiểu học Phạm Văn Hai. Anai Lê Thị Ngọc Nga lac: “Tuk mai ini pato, hu daok jaik dom anek saih jeng mboh jar var min oh mboh glaih glar hagait, kayua hu nao pato, hu nao tal sang bac nan lac bruk bui sambai di drei”.)

Umo taha praong thun gam saong dom mbang tame tabiak sang iek ruak, yau nan bo oh ka tuk halei urang mboh tiết pato di anai kurang pren khang. Lingiu bruk gheih pato anek saih vak akhar siam, anai daok pachreih hu anek saih takre bac da-a meng bruk pablak tame bài giảng dom  kỹ năng xã hội. Yau harei pato ka anek saih jalan so sánh vần “ung”, vần “ưng”, lingiu dom blah rup cih hu caga dahlau, anai daok ba tame tal bac dom chùm sung, củ gừng. Atau tuk pato yaok, pato cộng, trừ, anai brei ka anek saih me-in trò chơi “Menuk mebaoh” ngak ka anek saih biak takre, biak pachreih. Meng bruk sahneng duah jalan pato yau nan nyu ngak ka anek saih biak takre anai. Adei Nguyễn Thị Trà My, anek saih tal 5/4, sang bac Tiểu học Phạm Văn Hai lac: “Dom cei gru, anai gru pato adei, adei mboh biak anit anai Lê Thị Ngọc Nga kayua anai slut lô. Dalam dom môn anai Nga pato, adei takre di abih lac môn tập đọc. Sap anai bingi pang lô. Adei hu bac di anai Nga bruk slut mbut saong thau sahneng ka urang karei”.

Meyah ngan saong anek saih, anai Nga yau sa urang amaik, urang muk, ye ngan saong dom gru pato daok ranaih dalam sang bac, anai yau urang sa-ai halan hatian tacei jalan piah ka bruk pato megru di dom gru pato dak harei dak siam jang. Oh lac klah rabha ilamu ngak bài giảng, ilamu pato pakai, anai daok pachreih hu dom gru pato hatai anit ka bruk pato, ranam ka anek saih. Tuk halei lahaiy, anao nao dự giờ bloh abih hatai tacei pato meng dom kadha sit di abih yau ye: phát âm yau habar ka nyu njauk, caik dấu habar ka nyu mekre...piah ngak kreih camin ka anek saih. Meng dom panuac tacei pato abih hatung hatain di anai Nga bo hadei di labaih 1 thun pato, anai gru Nguyễn Thị Cẩm Tú mboh tự tin jang: “Tuk camereip drei mboh anai Nga drei biak huac. Min tuk hu taom gaok anai dom mbang, drei mboh anai biak anit. Meng tuk anai Nga mai dự giờ bloh tacei pato ka drei, ye tiết bac di drei hu chreih chrai tagok, dom anek saih biak takre. Drei uan tabuan thau dar phor anai Nga biak lô”.

Ong Nguyễn Văn Nguyện, Phó jabat pato megru huyện Bình Chánh brei thau, anai Nga lac sa gru pato njauk caik ka urang pasang tame piah bac megru, ngak tui. Ong Nguyện hu 10 thun ngak Hiệu trưởng sang bac Tiểu học Phạm Văn Hai, hu ngak bruk haong anai Nga saong ong mboh lac anai Nga tuk halei jeng ba abih hatung hatain ka bruk ngak. Ong Nguyện lac: “Anai tuk halei jeng ba akaok nao dahlau, daong ka rai rah daok ranaih, daong ka urang jakar ngak bruk quản lý hu siam jang. Sang hu dom kan kandah min anai thau rami ramik piah ngak siam bruk di drei. Anai Nga oh caong hu huy chương, huân chương atau bằng khen, kadha bo anai caong nan lac hatung hatian anit ranam brei ka drei”.

 Dalam tuk umo njauk padeih padei, bui sambai tapen anek taco, min anai Nga, urang gru pato mbuk daok tabiak rilo rak mbong patih nan, jeng daok harei harei ba abih hatung hatain pato akhar haroh ka anek saih, pahadah tagok hatai caong ka rilo tal anek saih. Ngan saong anai, bruk pato bnac nan lac bruk biak hu yaom glaong, saong anai daok tui nyu tal abih rai di drei./.

Mỹ Dung - Phóng viên - CQTT TP Hồ Chí Minh