Số phon saong tài khoản mạng xã hội di Thiên Lý hu jeng sa dalam dom jalan talei “pandiak” di Bình Dương 

Tui iek gah y tế rilo thun, urang vak Kim Dung tut angan tame labik pandiak di sa sang iek ruak taong ruak ka urang njauk Covid-19 piah mboh di anak meta bruk ngak di y bác sĩ daok ngak bruk di labik taong ruak.Kim Dung hadar veik: “Vak blaoh kadha, melam nan adei oh ndih hu kayua tuk halei jeng mboh yau di anak meta. Taong abih sa sambo màu mbong patih, dom mbaok meta tái mét, daok ndih van drei, luai suan biak dhan, bak talei gam sap yava tít tít di dom baoh mac suak yava, mac daong baoh hatai, mac dut iek darah, ống xông. Dom y bác sĩ tok ngak tangin brei gauk thau, blaoh ngak bruk bo oh thei ndom hagait. Blaoh kadha vak “Hatai khang di y bác sĩ pak Sang iek ruak Pabak veik pren yava Covid-19” hu tabiak rai dalam tuk yau nan.   

Dahlau di nan, Kim Dung saong urang quay phim Xuân Ngà jeng hu  tame tal “Gah dalam labik dut iek di Viện Pasteur ban raya HCM”, piah mboh cambaih bruk ngak biak tani tanat di dom y, bác sĩ di labik ini.

Angui cuk khan ao y tế, cuk harum tangin cao su piah ngak bruk jaik 2 mon di balai y tế lưu động saong di labik brei daok karei di phường bo urang vak Tỷ Huỳnh mboh kan suak yava. Ngan haong dua tal suek pabang mbaok, kreih pacang ia prah njauk hơi aia ngak sabil, Huỳnh brei likau tabiak langiu mek siphau bah ngak kadhik ka nyu thu aia hauk. “Tok hu yau nan meng thau cambaih jang ka dom kapul urang daok di labik pacang caga jit, urang glaih glar yau halei”.

Meng tuk jit ruak tamuh khang, kapul urang labik pacang jit tuk halei jeng hu ndom dahlau dalam yaok kadha vak. Nyaom urang vak Việt Đức, Vinh Quang nao haong bộ đội rah tui jalan tapen negar Tây Nam, gam mbang, gam ndih haong adei sa-ai. Hu melam, langik hu ribuk khang, dua urang vak gam tuan mac ảnh di takoi gam haong dom sa-ai lin biên phòng katung khik talei piah khik ka baoh kajang oh njauk angin yuk par.  

Hu jao bruk vak kadha ka dom urang daok ngak bruk brei daok atah di gauk, urang vak Khánh Hiệp khan lac: “Page ao sơ mi, capha prang, takhaok jhuk klik jangaih, tuan thẻ urang vak nao ngak. Thau halei langik hajan, blaoh brei takhaok tame kadung nylon, juak dép lê, cuk capha ta-lon “nao tapa labik pacang khik”. Padeih di labik halei, langiu di khan brei thau jeng daok brei thau lac kayua hajan nan ye adei tuan takhaok di angaok radaih saong juak dép piah ka dom sa-ai bộ đội, cei CSGT, haong ayut dân quân...oh taong yaom lac tác phong oh siam”.

Rilo mbang nao tapa pabah mbang di jabat, tok mong tame “baoh sang ka dua” meng gah langiu, oh tagok duk ngak bruk kayua huac jit. Hu mbang, Hiệp nduac radaih grauk labik, blaoh mai veik cơ quan, daok di sa kieng mblang bein piah ngak tin… bo mboh duh hatai.

Daok dalam labik pacang veik, min diuk pasang Khánh Hiệp haong ayut sahabat gam gam jak ba dom urang ngak pahla daong brei brah, njam, bei, menyek mbang… piah daong brei ka urang kan kathaot daok jaik taphia. Daok Thiên Lý daok di Bình Dương, meng di tuk jit ruak tamuh khang ye hu mbaok tame rilo bruk ngak pahla. “Labaih 20 urang peih radaih gah adei harei halei jeng nduac langiu jalan piah raok F0 tabiak sang iek ruak, F1 abih tukvak brei daok karei piah mai sang; ba urang nao cấp cứu”. Mbang jit ka pak tuh mai, dalam bilan yaok harei hu labaih 4000 urang dương tính. VOV TP.HCM hu 2F0, 3F1 saong 13 dalam 40 urang jakar, urang vak daok dalam labik pacang veik.

Sa dalikan biak drut droi bo Thiên Lý oh van hu. Tuk taduan hu panuac iew daong di baoh sang 2 urang kathaot metai bo oh ginup jien piah ba nao kubo, Lý ieu urang daong saong hadei di dom tuk, pabak veik panuac ieu nan, hu biak rilo urang daong. Oh lac vak kadha vak tagok báo, Thiên Lý daok iew phon tapak tal urang dang akaok puk palei saong hu oh takik bruk hu taduan mek, tacei pato peih ngak chip. Urang kumei phóng viên ini hu jak ba dom urang ngak pahla daong brei pandap panda, kaya mbang ka yaok rituh urang kathaot, abih di nyu lac urang ngak daok veik di Bình Dương. Kayua yau nan ye, số phon saong tài khoản mạng xã hội di Thiên Lý hu jeng sa dalam dom jalan talei “pandiak” di Bình Dương. 

Yam ndok VOV TP.HCM - Nhà báo Nguyễn Ngọc Năm brei thau: “Meng camererip, tuk jit ruak Covid-19 tamuh khang di ban raya HCM, khaol dahlak hu ba tabiak jalan ngak laghaih ka urang vak piah mek hu siam mekre di abih saong praong di abih lac khik hu salamat bruk pacang caga jit ruak. Di labik pasak jit ruak di negar, ngak bruk dalam tuk daok pacang veik, brei daok atah di gauk dui atah saong mbuan njauk jit ruak, nan ye adei sa-ai gaok oh takik kan kandah. Min taong abih gauk jeng pachreih ba  gauk piah oh “klaih jaoh” thong tin meng pasak jit. Khaol dahlak njauk gauk lac, kham merat abih drei piah ngak siam, yaom lac bruk sit dalam tukvak ini jeng biak hu yaom”.

Klau bilan brei daok atah di gauk, dom urang vak di Rayo sap ndom VN daok di ban raya HCM hu vak yaok ribau khau tin, kadha vak. Dom urang ini hu mbaok di grauk labik dalam 9 tỉnh, bal, rik daong tame bruk mesruh haong jit prong Covid-19 piah “Pasak jit” samar hu mai veik haong rai diuk siam mekre yau dahlau./.

Urang lang: Jasi - 07/09