Bruk pandik hatai daok tagok khang dalam bhap bani urang Việt daok pak Mỹ anak bruk Trung Quốc ba giàn khoan menyek saong gilai hộ vệ tame bhum tasik di Việt Nam. Ralo mbang trun jalan di urang Viet hu rah tabiak grauk labik dalam negar Mỹ piah phản đối bruk ngak nan di Trung Quốc. Kadha vak di Nhật Quỳnh-Huy Hoàng, urang vak di rayo sap ndom Việt Nam daok pak Mỹ brei thau ka bruk nan:

Bahrau ini, sa mbang trun jalan prong hu rah tabiak di pasak Eden, labik pablei salih prong abih di bhap bani urang Việt daok pak Washington DC saong dom labik jaik taphia. Yaok rituh Việt kiều yar glaong biểu ngữ, preo khang khẩu hiệu brei thau lac chủ quyền di Việt Nam ngan haong Hoàng Sa saong Trường Sa, caong khin karja Bắc Kinh samar ba giàn khoan tabiak truh bhum tasik.                                     

Dahlau di nan bhap bani urang Việt daok pak California jeng hu peih bruk tuần hành saong trun jalan anak Lãnh sự quán Trung Quốc pak Los Angeles. Ralo mbang trun jalan karei tui kuhria meda rah tabiak pak bal ine Washington DC saong ralo labik karei dalam adit ini. Ong Trịnh Hùng, sa doanh nhân brei thau:​

"Bhap bani Việt Nam khaol dahlak harei ini hu peih bruk trun jalan piah phản đối Trung Quốc ka Trường Sa-Hoàng Sa.​ Thei thei jeng brei mboh hatai ranam bangsa di drei, phản ứng anak bruk ngak suan di TQ."

​ ​​          Bhap bani Việt Nam daok pak Mỹ thei thei jeng pandiak hatai anek bruk ngak suan di Trung Quốc. Oh ka tuk halei yau tuk ini, bhap bani urang Việt daok grauk labik angaok dunya daok gul pataom gauk piah ngak jeng pren khang taong abih bangsa, khik caga chủ quyền thiêng liêng di palei negar.

          Sa-ai ​​Kỳ Anh, sa urang daok pak bang Maryland lac:

          "Urang Việt Nam daok pak ini, meng urang taha tal uranaih thei thei jeng sangka tal. Bruk ngak yau nan biak quá đáng, tapa pren saneng mboh. Meng taong abih bruk ngan, tất nhiên drei oh khin hu mesruh metak rah tabiak, oh khin haok darah angaok taneh aia di drei, min meyah  tal tuk hu bruk, tuk bo bruk nyu catang tagok  ye jeng brei ngak oh caik ka nyu dui atah tra. ​ Hatai gul pataom urak ini biak praong, biak hu yaom glaong.​ Yaom lac drei daok atah du halei nao, daok pak negar halei jeng yau nan, hu sa panuac ndom biak katut panak, biak di nyu ralo puk palei jeng lac labik daok yau Yuen lac ga tạm, min sa bhummi hadar miat piah mai sang. Hu bruk ye halan hatian mai veik  oh hu bruk hagait piah sahneng kuhria ."

          Ong ​David Hồ-Akaok dhar kapul doanh nhân Việt kiều pak Mỹ lac:

"Nan lac bhum taneh di Việt Nam bo nyu ba sa giàn khoan tame, oh caik meta tal adat hukum dunya. Bruk ngak yau nan biak ngang nhiên, dahlak biak pandiak hatai haong bruk ini. ​Dahlak caong khin taong abih urang Việt gul pataom gauk veik piah khik caga palei negar. Gul pataom tuk ini biak hu yaom glaong kayua ini  lac sa sap ndom chung, tuk hu sap ndom chung khang kajap jang,  ye sap ndom nan biak hu yaom."

          Sa-ai Trần Liêm, kỹ sư công nghệ thông tin lac:

"Dahlak mboh Trung Quốc quá đáng, ỷ pren khang piah kateik geik Việt Nam. ​Khaol drei njauk gul pataom veik piah khik dom hagait bo drei hu. Tuk ini, meyah meda ngak hu hagait ka taneh aia , piah khik caga palei negar Việt Nam ye dahlak ngak abih hatai, dalam khả năng di drei. Kasa, khaol drei kham merat khik hu hòa bình, min meyah oh hu ye khaol drei njauk ngak taong abih dom hagait drei ngak hu."

Ong Nguyễn Mạnh Hùng, Giáo sư chính sách ngoại giao Mỹ, sang bac Đại học George Maison ndom lac:

"Trung Quốc daok caong meblah mek Biển Đông meng lavik mai. Nyu  ngak  ha-mbang ha-sit saong ini lac sa bruk tui jalan  ngak ini.. Nyu  khin iek Việt Nam meda ngak hagiat hu halei oh saong urak ini daok hu ralo negar phản đối. Biak di nyu ini lac sa bruk meda ndom lac trắng trợn, xâm lấn tame bhum taneh di Việt Nam. Trung Quốc lac padeih bruk meriak gauk piah gam gauk khai thác, langyah tui jalan sron mbon min daok ngak cagar veik. Việt Nam urak ini hu dom diễn đàn dunya biak praong. Kasa nan lac diễn đàn di Việt Nam, Mỹ saong dom negar châu Á-Thái Bình Dương, kadua lac nyaom biai thượng đỉnh ASEAN, ka 3 lac diễn đàn Liên Hợp Quốc, saong ka pak nan lac toà án dunya."./.