Danak dak jalan peih samar Biên Hòa - Vung Tau hu 15km tapa ban sit Phú Mỹ, hu dom xã: Châu Pha, Hắc Dịch, Tóc Tiên saong phường Mỹ Xuân. Tui muk Trần Thị Thu, Akaok UBMT Nagar Việt nam xã Tóc Tiên, ban sit Phú Mỹ, danak dak jalan peih samar Biên Hòa - Vũng Tàu (tukvak 1), jalan tapa xã atah 8,1km, mek taneh jaik 59 ha taneh di 465 baoh sang, kapul ngak bruk.

Hatai marat ngak saong caong samar hu jalan peih samar, dalam dom harei bahrau peih ngak, Mặt trận Nagar Việt Nam xã haong dom kapul chính trị kham pathau khan ka mikva thau sarak hukum karja taneh riya, dom kadha bayar jien taneh saong dom sarak daong di Karja.

Mat tran haong dom kapul chính trị, kapul ngak bruk srap gap tukvak padeih, yaok harei sanacar, adit nao tal yaok baoh sang mikva piah pathau khan, jak ba, lang yah piah hu rahra jie hatai tame. Muk Trần Thị Thu khan lac:

“Mat tran Nagar Viet Nam xã haong dom gah, kapul srap gap harei padeih, harei sanacar, harei adit piah nao pathau khan tui baoh sang ka mikva pang. Ni sa bruk biak praong dalam bruk mek taneh, hu mikva halar tian, meng nan mai mikva jao brei mblang taneh dahlau – mek jien bayar hadei”.

Tal ni, ban sit Phú Mỹ mbaoh harak bayar jien ka 1.059 baoh sang, kapul nyaom, kuhria abih tih tui jien labaih 2.400 tỷ đồng, brei bayar ka 1.001 baoh sang, kapul nyaom.

Ong Lê Văn Tám, Yam ndok Pusak Patagok Taneh riya ban sit Phú Mỹ khan lac, piah jhul samar bruk ngak, urang pan akaok ban sit hu padang dom Kapol jalan jak ba bayar jien taneh, daong labik daok bahrau. Kapul ni nao sang mikva piah kuhria, pasang iek taneh, srap gap harei padei, tuk padei piah gaok tapak mikva. Hu ralo baoh sang oh cang yaok kuhria, mek veik taneh min mikva eng rup yaik sang danaok, ramik drap ar dalam sang piah brei jao taneh veik:

“Kapul ngak bruk parabha bruk ka urang ngak, srap gap pasang iek taneh, bruk ni ngak gam harei sanacar, harei adit saong malam. Urang taduan bruk hu nao tal dom bhum palei, meng nan Mban yam ndok pusak hu pasang iek yaok bruk ngak di sa urang, bruk ngak tha harei sa baoh sang, kapul urang khan bruk ngak di drei dalam harei”.

Danak dak jalan peih samar Biên Hòa – Vũng Tàu nan sa kadha cambaih kaih brei mboh hatai caong patagok di tỉnh Ba Ria – Vung Tau. Hatai caong oh tok ta-eng mikva, bo daok hu pasang iek di Quoc hoi, Rajaei, dom mbo, dom gah, saong dom kapul hu bruk ngak.

Tal ni, danak dak peih ngak njauk tui tukvak, guan ngak blaoh ba mai makna praong glaong ka mikva saong tỉnh Ba Ria – Vung Tau./.