Malam 18/12, kapul radaih apui di urang jirah siam krah yau hotel 5 baoh patuk hu angan Sjourney, kayua Kong ty TNHH Jirah PYS (PYS Travel) peih ngak, brei pagalung baoh tabiak meng ga Sai Gon (Quan 3, TP.HCM) ba kapul jirah dunya nao ma-in ieik dom labik siam gheih di luruh nagar Viet.

Radaih apui hu dom tua ngak jeng sang mbang huak, brei palei dom janih mbang huak yaom kom glaong haong dom kaya kan bingi palei jeng ye kaya bingi dunya di angaok radaih apui barau. Gam haong 2 papan atah dak di pabah mbang piah ka tuai damuai daok gam mbang gam huak gam ieik tabiak mblang padai praong, ieik dom talei cek dak cek jeng ye maong nao mbaok tasik rayak tapen tasik malam hu gom dah kanyik tariak tal domban sit ban praong di dua tapen jalan radaih apui.

Sjourney gam haong janih blei salih krih karei brei ka yaok urang tuai damuai, meng ndap nda kaya mbang, njauk tui hatai khin takre barau tal dom janih main ieik, daong brei ka jalan main jirah chrei sambai hatai oh war. Oh sa janih yau nan, saka harei malam di jalan di radaih apui oh drei yau radaih apui karei, kayua nyu hu ngak njauk tui hatai tuai damuai jirah main.

Ong Phan Trọng Thắng, Urang sang ka ieik glang radaih apui Sjouney di PYS Travel lac, jalan meng Mraong tabiak Brak di radaih masa atah 8 harei 7 malam, nao tapa dom labik hu angan di Viet Nam yau ye: Phan Thiet, Nha Trang, Hoi An, Hue, Quang Binh, Ninh Binh,… Ini lac sa danak dak praong dan haong mboh barau, dah krah barau brei ka jirah pakat glaong di Việt Nam.

“Mboh di angaok dunya barau hu 30 baoh radaih apui min tapi ini lac akaok meti camarep hu mbaok di ở Việt Nam jeng ye hu cara nduac karei tui hatai takre di urang jirah. Sa mbang nao main atah 8 harei 7 malam, nao rah tapa dom labik hu angan dalam nagar Viet Nam. Di yaok palei labik, tuai damuai hu taduon mek dom janih tui hatai khin.”

Dalau radaih apui si peih nduac, ralo tuai jirah chreih chrai sambai haong tour jirah pasei rah krah luruh luac nagar Việt, meng halei mai hu di Ero Chau Au. Ong Raymond Nicola Hannigan (umo 63 thun) daok di Amrik mai khan lac, ông daok caong khin dom chreih sambai di mbang main jirah pakat glaong ini bam ai.

“Drei jeng mada hu duah jalan jirah main krah di châu Âu angak radaih nduac capat drah di gah Pur, tapi min hadei di nan mboh di Việt Nam hu mbang main yau ini. Drei saneng lac Việt Nam mada chreih jang tame Paris. Kol hulin dalak mada ndih biak bingi, blaoh daok hu akaok ging tahanek brei dom janih kaya mbang huak biak bingi di bangsa Việt Nam.”

Mai meng Amirik, muk Tobin Heminway khan brei thau lac, muk mboh biak chreih kayua lac drei sa urang tuai camreip ndih tagok radaih apui pandar dom janih jirah pakat glaong ini, di taneh ia nagar gheih ghang siam makrei yau ye Việt Nam.

“Akau duah mboh panuac khan di intenet. Akau caong hu jirah ieik jalan atah harei, jirah main 8 harei 7 malam biak lagaih. Sambang nao radaih apui jirah tapa dom labik dhua siam gheih di taneh ia blaoh drei ka oh bhian mboh bhian mai main pachrei drei chip.”

Kapal radaih apui Sjourney hu angan SE61 peih nduac di malam but yaok adit, baharei Hà Nội – TP.HCM. Tuai damuai jirah Ninh Bình, Quảng Bình, Huế, Hội An, Nha Trang, Phan Thiết blaoh tal ga Sài Gòn dalam sa adit. Blaoh di nan, radaih kapai pakat glaong balik gac gilac tui jlan jirah Ban raya – Hà Nội meng angan SE62./.