Harei nyaom biai Peih mbang ngui Bhum Taneran kraong Cuu Long – Mbang di II thun 2024 bahrau hu padang ngak di tinh Dong Thap meng blaoh sa mbang tra ndom rilo tal bruk hu yaom glaong di kinh te hijao, takik tathuak nerak. Ini lac dom jalan ngak bo dom palei dalam bhum sangka dalam jalan patagok di tukvak anak tal.

Kong ti TNHH Labik pala 123, tinh Dong Thap daok ngak tabiak, brei tabiak dom pandap kaya baoh kayau ngak thu yau baoh kruac tắc thu, kandiuk thu, laya thu, kanduh kruac bung thu ka darak pasar dalam taneh ia saong kuhria tak bruk pablei tabiak negar langiu. Ong Huỳnh Lê Ngọc Viễn, Yam ndok Kong ti brei thau, kong ti pataom tame ngak tabiak pandap kaya paglaong yaom kaom haong bruk ngak tabiak kandauk. Langiu di bruk sangka iek praong tal angan je pandap panda ye kong ti daok sangka iek praong tal bruk pacang khik alam moi truong, patrun tathuak nerak sang kreih camin.

"Bruk buh jien tame ha tang khang yau ndien, jalan, sang bac, balai lac asal kadha hu makna meng nan mai, min bruk salih hijao pambuak haong salih taka so daok rah tabiak khang, Bruk pandar dom jamraik mac moc piah pasang iek do am, bruk pandiak la-an saong dinh duong di taneh daong pasang iek siam lagaih jang ia saong khak drak saong rilo bruk pandar karei lac bruk biak caong hu dom pakat sangka piah rabha buh jien tame ka njauk".

Kong ti Co phan Cong nghe Pandap kaya mbang hadah krah, Hau Giang daok ngak tabiak dom pandap ralo, ndam thuc vat meng baoh panat meda, ini lac sa dalam dom pandap kaya ngak tabiak hu yaom paglaong saong pandar veik pandap labaih ka bruk pala drak di bhum Taneran kraong Cuu Long. Amuk Cao Thị Cẩm Nhung, Yam ndok Kong ti brei thau, bruk di Kong ti lac caong padang bruk pablei salih tui jalan kinh te yeng dalam gavang vil, salih hijao, dak harei dak kuhria tal gah kinh te NetZero. Caong ngak hu asal kadha ini brei pachreih pablei pandap kaya hiijao, sarak pandar khang kajap.

 "Jhul tagok angan je negar ka pandap kaya hijao, dom pandap kaya mbang meng bruk ngak nong khang kajap yau ralo, baoh kayau meng baoh panat meda hu yaih khan rilo yau pandap kaya negar, tapa nan paglaong yaom kaom angan je negar, ngak jeng prein dui pachreih ka dom pandap kaya Viet Nam di angaok darak pasar dunya. Rajaei meda daong dom mbang pato megru, nyaom pataom ka cong nghe gah ngak nong khang kajap saong jalan ngak tabiak pandap kaya salih, gam haong nan daong ka gah pablei salih dalam bruk salihb jao caong nghe hijao meng dom negar ginup meda".

Akaok Uy mban Bhap bini tinh Dong Thap ong Phạm Thiện Nghĩa ndom mayai lac, bhum Taneran kraong Cuu Long lac bhum taneh hu rilo drap ar langik tasik min jeng daok dalam haong bruk kan kandah praong ka bruk langik salih, njom nerak langik tasik saong kurang dom he sinh thai dalam alam langik tasik. Anak dom bruk kan kandah nan ye peih mbang ngui bruk ngak saong salih bahrau hadah krah lac anek kier piah langyah dom asal kadha, ngak tabiak yaom glaong bahrau, patagok khang kajap dalam jaman bahrau. Ong Phạm Thiện Nghĩa ndom metyai lac.

 "Jhul khang dom danak dak pambuak gah prein ngak saong darak pasar tukvak anak tal ini piah daong patagok dom bruk ngak, pandap kaya, danak dak peih mbang ngui bruk ngak, cong nghe, yitvu daong di bhum Taneran kraong Cuu Long; abih di nyu nan lac gah peih mbang ngui bruk ngak nong, yulit saong salih bahrau hadah krah tui jalan kinh te hijao, yeng tui gavang vil saong salih taka so pambuak haong salih hijao".

Ngan haong bruk pagun sanya di dom bhum palei bhum Taneran kraong Cuu Long ka bruk jhul tagok jalan ngak nong bahrau, tathuak nerak biar, jhul khang bruk pambuak karja, urang menuac piah daong ngak lagaih dom jalan langyah patagok khang kajap, pacang khik alam langik tasik, salih hijao. Dom kadha siam hu ba tabiak brei mboh bruk salih taka so lac bruk lagaih piah Bhum taneran kraong Cuu Long patagok khang kajap dalam jaman bahrau./.