Ong Trần Thanh Hùng, urang ngak nong daok di xa An Thạnh 1 brei thau, dom thun bahrau peih paha gah Meraong negar, bhum taneh kaoh pulao daok rilo glai klo, taneh ngak mbang pala drak oh lagaih, taneh di ini rilo glai phun bần, glai hala. Hu rilo jalan langyah patagok bruk pala drak hu karja palei ngak, urak ini, bhum taneh ini hu salah rilo dalam bruk ngak mbang pala drak, tagok jien mek tame ka rahra. Bruk njauk hatai abih di rahra di bhum taneh kaoh pulao ini ieu lac kraong ribaong hu ramik bak ganap, brei pasiam Gah ngak nong hu ngak salih bahrau cambaih laih ka bhum taneh Pulao Dung.

Ndom meyai haong urang vak, ong Lê Văn Út Em (xa An Thạnh Tây) chreih sambai ndom mayai brei thau, kaoh pulao urak ini karei haong meng dahlau biak rilo lo, mbaok meta bhum palei haong raidiuk rahra hu patagok yaok harei. Lagaih abih di dalam nan ieu lac majam gom ndien, jalan mbak, sang bac, kadai hu buh jien tame ngak pabak ka hatai caong daok dang, ngak mbang, bac megru di rahra bhap bini. Urak ini, jien mek tame di rahra di xa tagok labaih 10 mbang dut haong 50 thun dahlau, karo kajap an ninh, siam mekre dalam rahra hu khik kajap tani tanat, daong rahra sahnang hatai ngak kaya ngak meda.

Ong Nguyễn Văn Đắc, Akaok Jabat Ngak nong saong Alam langik huyen Cù Lao Dung (Soc Trang) brei thau, huyen ieu lac sa labik pataom di dua bhum sinh thai, rahra bhum taneh kaoh pulao meda pala phun mbang baoh haong raong hadang meteh ia mbak meteh ia taba, bruk ini mboh kein lagaih piah ka bhum huyen Cù Lao Dung patagok bruk ngak mbang gah ngak nong. Dom thun jaik di ini, meng bruk ngak siam bruk pacang cakak njom ia mbak, salih ilamo jamariak bahrau, paglaong majam yaom kaom ndap nda ngak nong nan yaom kaom pala drak labaih 1 ha taneh ngak nong tagok mbiah samar drah. Meyah bruk ngak nong hu ngak rilo abih ye danak dak padang palei pala bahrau jeng rik daong rilo ka mbaok meta bhum taneh kaoh pulao hu salih karei. Tal ini, huyen Cù Lao Dung hu mbaoh tangin brei ieu angan sabaoh huyen salah blaoh dalam danak dak padang palei ngak nong bahrau.

Bilan 1/2025, Mentri Jalan mbak Pajeng ba hu peih ngak padang baoh Tatua Đại Ngãi 2 meng huyen Long Phú tapa kraong Hậu pambuak huyen Cù Lao Dung saong kuhria brei ba tame pandar peih nduac radaih di harei 30/4/2025. Ini oh lac bruk bui sambai di rahra gah Pai Meraong negar blaoh daok ieu lac bruk bui sambai brei ka rahra bhum taneh kaoh pulao kayua oh daok bruk vak pambak tame gaiy gilai.

Ong Nguyễn Văn Nhiều (xa An Thạnh Tây) chreih sambai brei thau, lac sa urang ndih tapui haong praong tagok di bhum taneh Cù Lao Dung jaik 70 thun tapa, jeng caong khin ka drei jeng yau rahra di bhum palie taneh kaoh pulao urak ini hu jak jeng. Tatua Đại Ngãi 2 ba tame pandar daong rahra nao mai mbuan lagaih, oh daok pambak tame ghe gilai sang; urang ngak nong patak pataom hu rilo jien pajeng ndap nda ngak nong. Hadei jaik 50 thun peih paha gah Meraong taneh ia tame sa baoh negar, Cù Lao Dung yau cuk tame rup sa blah ao bahrau, rilo danak dak ha tang yau ye jalan mbak hu buh jien tame ngak dalam bhum daong ka bhum taneh ini uak drei patagok dalam jaman bahrau.

UB Bhap Bini tinh Soc Trang hu mbaoh tangin brei cih jalan dak padang bhum taneh huyen Cù Lao Dung tal thun 2040, pamaong tal thun 2050. Haong bruk kuhria ka patagok, dak padang pulau Cù Lao Dung jeng labik njauk piah daok, hu thaik thaot karei di nyu piah dui pachreih tuai damuai mai jirah saong gah buh jien tame pagam haong angan hijao – sinh thai thaik thaot, patagok ilamo, khik kajap an ninh quoc phong saong pacang caga hu bruk langik salih karei.

Tinh ba tabiak jalan patagok mek ban sit Cù Lao Dung ngak jeng pasak, peih praong ban tabiak dom xa jaik taphia, ngak kein lagaih piah jhul samar bruk padang ban, patagok ka huyen jeng ban sit dalam harei meng anak; padang saong patagok dom ban, labik rahra bhum palei pambuak haong thaik thaot kraong ia, lagaih saong langik tasik alam moi truong./.