Ngan haong taneh pala padai dang di danak 5 dalam labik bhum taneran kraong Cuu Long, padai yuak hu yaok thun labaih 2,1 trieu tan. Abih di nyu hu di dalam nan, dom brah angan je di bhum, asar siam glaong di Soc Trang hu labaih 93%, daok pajaih padai ST24 saong ST25 hu labaih 18%, ini lac pajaih padai asar siam hu dak tame angan “Brah bingi abih dalam dunya”. Phaok Akaok UB Bhap bini tinh Soc Trang angan Vương Quốc Nam brei thau, oh lac bruk hadah mbaok ka rahra Soc Trang blaoh daok brei ka abih dalam nagar.

“Tapa bruk patagok dom janih pajaih padai hu asal angan je, pdai pahe, ngak tabiak, pablei tabiak langiu negar, piah pakacah, Soc Trang hu rik daong oh sit brei ka bruk padang angan je brah Viet Nam dalam dunya; dalam tukvak mai meng anak tal, tuk khol drei hu bruk pasang iek, kapul pala drak siam saong bruk ba tame darak pasar tani tanat saron mbon, hu ilamo jang saong janji sanya rilo kein lagaih brei ka bruk brei patagok, peih praong bruk pablei tabiak langiu nagar saong yaih khan “brah Viet nam” di dalam darak pasar dunya.”

Di Ban Can Tho daok hu jaik 150 mlang hamu praong ngak padai tui jalan karo kajap, pandar ilamo ky thuat bahrau piah tui tanut pablei tabiak dom darak pasar kan pablei dalau. Ong Trần Thái Nghiêm, Phaok yam ndok So Ngak nong saong Alam langik tasik tinh Can Tho brei thau, co cau pajaih tapa dom mbang yuak padai di Can Tho jeng pataom tame pajaih padai pahe, asar siam, hu angan je piah duh ka tui hatai pablei tabiak langiu negar. Gam haong bruk peih ngak sarak 1 trieu ha padai hu daong rahra trun hu jien buh tabiak, yuak hu rilo padai, asar siam, takik tathuak nerak sang camin kareih, jien mek tame brei ka mikwa rahra karo tani tanat.

“Sarak brah asar siam haong pandap padai asar siam brei ka gah ngak mbang pablei salih mek hu angan je piah patui bruk brei patagok dom darak pasar, gam haong nan ngan haong bruk ini jhul tagok bruk pambuak kajap di gah ngak mbang pablei salih saong dom bhum pala drak ye jeng daong ka gah ngak mbang pablei salih sahnang hatai ndom biai ka harak pambuak bruk dalam bhum pandap tamo  hu dahlau piah ngak dom harak pambuak bruk pablei tabiak langiu negar.”

Tui Akaok mentri Ngak nong saong Alam langik tasik ong Đỗ Đức Duy, bruk di anak meta brei mboh pablei brah tabiak langiu negar jeng gaok ralo kan kandah tuk gah pablei tagok saong yaom padai pablei tabiak langiu negar di Viet Nam trun rilo, bruk ini ngak kanjah jhak tal bruk pala drak, pablei salih di dalam taneh ia. Piah caga dom kan kandah urak ini jeng ye khik tani tanat patagok karo kajap gah pala drak brah padai, jalan langyah ba tabiak lac pataom tame peih ngak Sarak 1 trieu ha padai asar siam, tathuak nerak biar di bhum taneran kraong Cuu Long, roh duah pajaih padai diuk hu pandiak bhang, njom ia mbak, caga halak haling piah pacang caga haong bruk langik salih karei. Gam haong nan lac patagok ngak ndap dalam, jhul tagok bruk pablei salih tame dom darak pasar yau ye Mỹ, EU, Japon saong dom darak pasar bahrau yau ye Chau Phi, Trung Dong, Ong Đỗ Đức Duy Akaok mentri brei thau, brei sua tangi ba tagok Rajaei piah mbaoh tangin saong peih ngak Sarak “Patagok majam logistics piah paglaong asar siam saong prein meraik gauk di ndap nda kaya ngak nong Viet Nam tal thun 2030”, piah paglaong bruk khik piah, khik ramik, daong khik kajap asar siam brah piah duh ka bruk pablei tabiak langiu negar tuk darak pasar dunya caong khin:

“Khol dahlak hulin ndom lac brei ba tame adat hukum ka bruk ba tabiak jeng yau ndak tui dom asal kadha ka bruk taong yaom hu angan saong dom gah ngak mbang pablei salih brah tabiak langiu negar, nao tal sa darak pasar pablei tabiak langiu negar dak harei dak siam mekre, cambaih laih. Dom gah ngak mbang pablei salih brei pambuak haong gauk, pablei tabiak langiu negar ye brei hu pambuak gauk, brei hu sa he thong, urak ini gah ngak mbang pablei salih tok ngak njauk sa asal kadha pablei salih ye oh meda hu sa bruk patagok karo kajap hu saong khol drei tuk halei jeng pablei gaok rilo kan kandah.”

Bahrau di ini, Thu tuong Pandana Rajaei hu sarak piah khik kajap gah pablei haong gah blei padai brah anak bruk rah tabiak di darak pasar dunya haong dalam taneh ia; gam haong nan dom jalan langyah meng Mentri Ngak nong saong Alam langik tasik, dom bhum palei haong gah ngak mbang pablei salih daok ba gauk jhul khang bruk pala drak, pablei salih, pablei padai brah tabiak langiu negar, kayua kein lagaih haong gauk dalam bruk patagok karo kajap gah ndap nda, patagok labik dang angan brah Viet Nam di dalam dunya./.