Thun 2024, mbang camareip Ban raya Ho Chi Minh mek brei ka gilang jien nagar hu 502.000 ty ndong. Nyu brei mboh glaong di abih dut pacoh tui meng dahlau mai brei ka bruk buh tame gilang jien nagar. Nyu jeng brei mboh biak hu angan kayua lac meng 3 thun dahlau, Ban raya Ho Chi Minh nao tapa huac kanda kan kandah kayua bala jit ruak COVID-19. Jit praong nan ngak brei ka khut khat palai lahik brei ka Ban raya tagok tal 273.000 ty jien ndong, gam jaik labaih 12 ty jien USD, ngak ka bruk cakrok kinh te laik trun mala zero. Min, hadei di dui masa laba mala zero, gilang jien karja di Ban raya Ho Chi Minh dak harei dak tagok, tagok tal tanut glaong di abih dut pacoh tui meng dahlau mai hu 502.000 ty ndong dalam thun 2024, brei mboh bruk pasiam kinh te, brei mboh prein padak kinh te khang di banraya Ho Chi.

Tui Tien si Ngô Minh Hải, Phaok Akaok Sang bac NDai hoc Kinh te – Jien padai Ban Raya Ho Chi Minh, prein padak khang siam ini mai meng rilo jak jeng di Ban raya ngak hu di dom jalan ngak patagok kinh te bahrau, gam haong bruk meng pakat pan akaok negar brei patacei, brei peih talaih, brei sarak karja:  “Kinh te TP.HCM saong gah ngak mbang pablei salih cakrok patagok siam. Iek brei ka gah mek jien ka gilang karja nagar meng jien pablei tabiak blei tame, jien je VAT, jien je di gah ngak mbang pablei salih, mbang camareip meng dalam 3 thun mai tal ini, ban raya Ho Chi Minh hu laba ka gah pablei tabiak blei tame. Bruk ini hu inum brei mboh Ini lac Ban raya Ho Chi Minh nao njauk jalan. Dom bruk ngak meng anak mboh, Ban raya Ho Chi Minh daok ngak biak siam”.

Ban raya HCM pabuh pasiam saong cakrok patagok khang hadei di jit covid, oh ieu lac janih mai meng bruk kham merat di bhap bini rahra, mai meng urang ngak mbang pablei salih blaoh daok mai meng bruk srap gap, ngak siam ngak lagaih di pakat Ndang, karja Ban raya Ho Chi Minh.

Tui kuhria taong yaom di Mentri Noi vu, dalam 3 thun meng 2021 tal thun 2023, bruk pasiam veik brei ka jabat hanh chinh di Ban raya Ho Chi Minh hu tagok meng dang di labik 43/63 tinh, urak ini tagok dang di labik 33/63 tinh, ban. Bruk dut iek njauk hatai di rahra, gah pablei salih ngan haong bruk duh di jabat karja meng thun 2022 hu dak di 43/63 tinh, ban jeng tagok dang di labik 36/63 tinh, ban dalam thun 2023.

Thun 2024, yaom mada oh ka hu khan brei thau meng Mentri Noi vu, min bruk jhul khang brei pandar ngak kong ung dung cong nghe so tame pasiam gah hanh chinh, dalam nan mboh hu bruk ba tame pandar “ung dung cong dan taka so Ban raya Ho Chi Minh”, ban raya ba tabiak bruk kuhria hu tame top 10-15 tinh, ban dang akaok ka bruk pasiam gah hanh chinh.

Langiu di dom taka kinh te hu maong yau tanut hadah yau ye: taka gah kong nghiep, taka gah meyit meyao pablei salih, gah ngak tabiak ndap nda, pablei tabiak blei tame, ye kinh te lek taka jeng ngak hu tanut hadar dalam mbaok ngak mbang salih bahrau bruk kinh te.

Meyah Sarak Nyaom Raya Ndang pakat Ban raya Ho Chi Minh mbang ka XI ba tabiak bruk kuhria tal abih mbang, kinh te so mek hu 25%, ye tal thun 2023, Ban raya Ho Chi Minh hu tỉ trọng kinh te so dalam GRDP 21,5%, saong thun 2024 kuhria mek hu 22%. Ban raya Ho Chi Minh daok dalam kapul ka 9 bhum palei hu tỉ trọng kinh te so glaong labaih 20%.

Pok sap di harei nyaom biai hu peih di Ban raya Ho Chi Minh, ong Nguyễn Văn Nên, Uy vien Mentri Chinh tri, Bi thu Ndang pakat Ban raya Ho Chi Minh brei thau: "Ban raya Ho Chi Minh jeng sa baoh akaok radaih apui gah kinh te di nagar, lac bruk hadah mbaok di taneh ia. Sajarah dakrai hu brei mboh, Ndang hu brei mboh meng rilo sarak. Dreih yau ye meng jaman ong ine ame nao peih paha taneih ia palei nagar mbiah tal masa tuk ini, urang hu mboh gah Meraong ieu lac sa labik sanang ngak mbang cakrok patagok saong hu ralo baoh kein lagaih. Urak ini bruk di khol drei, dom rairah hadei brei thau ngak habar piah brei patagok nyu”.

Dakrai sajarah jao brei ka Ban raya Ho Chi Minh lac dui ba, dang akaok radaih kinh te nagar. Bahrau blaoh, Trung uong jeng hu brei tapa danak dak Sarak Quy hoach Ban raya Ho Chi Minh brei ka bruk ngak yam tal thun 2050, Thu tuong Rajaei ba tabiak Sarak ka bruk padang Pasak jien padai di bhum saong dunya di Ban raya. Thu tuong Rajaei jeng mbaoh tangin haong jalan padang pabah lamnge praong Cần Giờ. Nyu yau ye gai kadak piah pandar dom kein lagaih hu di bhum taneh daok di gah Meraong ini.

Piah ba abih prein yava janih gah dom asal kadha gheih ghang, hadah krah, khin sahneng khin ngak di anek menuac pak di ini, ye njauk hu dom co che, hu sarak bahrau palagaih, patui di nan piah brei ka pakat Ndang, rahra ban raya Ho Chi Minh hu “Sarak 05 bahrau” piah padang, piah patagok jeng ban raya di dalam jaman bahrau./.