Hadei ruak jit COVID-19, jirah rivang Binh Thuan hu pasiam veik saong cakrok patagok khang kajap. Dom danak dak dalam thun jirah rivang negar thun 2023 “Binh Thuan – Pataom dom hijao”, gam haong ba tame pandar 2 jalan peih nduac samar Phan Thiết – Dầu Giây saong Vĩnh Hảo – Phan Thiết, hu jhul tagok ka gah jirah rivang tinh Binh Thuan cakrok patagok samar drah chip.

Oh lac tok hu kein lagaih ka gah drap ar jirah rivang, Binh Thuan daok pataom rilo asal kadha hu kein lagaih karei, dui pachreih dom gah bih jien tame dalam saong langiu negar. Kuhria mboh tal ini, dalam tinh hu tal 380 danak dak buh jien tame gah jirah rivang padeih padei, dalam nan hu 193 danak dak hu ba tame peih ngak.

Tui ong Võ Hồng Thắng, Yam ndok meyit meyao saong pathau khan ka bruk patagok danak dak DKRA Viet Nam, Binh Thuan hu rilo kein lagaih ka gah jirah rivang, rilo di nyu hu mbaok tasik. Langiu di nan, dom jalan peih nduac samar nduac pagan tapa saong mblang kapal ahaok par Long Thành daok padang samar chip jeng lac dom asal kadha hu angan makna: "Ini lac sa dalam dom kein lagaih biak praong piah binh Thuan meda dui pachreih tuai danuai jirah rivang jeng yau dom gah buh jien mai tal ini piah duah thau ka bruk buh jien tame ka sang danaok taneh riya jeng yau lac dom gah ngak kong daong labik ngak kong pak ini. Langiu di nan, bruk brei mboh  padak padang di tinh Binh Thuan tukvak jaik di ini brei ba tabiak sa bruk kuhria cambaih laih jang haong gah buh jien tame, tapa di nan gah buh jien brei mboh cambaih laih yaom kaom jeng yau hatai caong buh jien tame, ye kol urang nan brei khang hatai buh jien tame bo hu sarak cambaih laih".

Gam tui mbaok ar tasik dui atah, cuah patih makre, ia tasik jangaih hijao, langik lagaih gam haong dom thaik thaot gheih ghang haong rilo drap ar ilamo siam gheih, Binh Thuan meng kal mai hu ieu lac sa labik jirah rivang padeih padei biak siam gheih. Min, piah ngak ka gah jirah rivang di Binh Thuan – Phan Thiet patagok, mek hu tanut yau pakat dunya, langiu di bruk ngak meng dom hagait hu dahlau, tinh brei hu sangka iek praong patagok dom bruk me-in, pandap mbang, gam haong nan paglaong bruk pambuak pablei salih. Padang jalan pathau khan yaih khan jeng hu brei jhul khang piah Binh Thuan jeng sa labik jirah rivang dang akaok di gah Meraong nagar Viet Nam.

Tien si Trần Du Lịch ndom mayai lac, Binh Thuan oh lac pasak negar ka nang luong ia hacih sa-at saong nang luong pabarau, bo daok ieu lac sa pasak jirah rivang negar saong dunya. Pambuak hu makna abih di Binh Thuan lac Đông Nam Bộ saong tay Nguyen. Tien si Trần Du Lịch ndom mayai lac: "Binh Thuan hu rilo kein lagaih brei patagok gah jirah rivang jaik abih yaok harei dalam thun saong abih di nyu nan lac daok jaik darak pasar praong Ban raya Ho Chi Minh, brei hu bruk cakrok patagok tame gang cakrok GRDP. Binh Thuan khang hatai ba jiraha rivang yulit Binh Thuan haong sa slogan, sa angan: “Binh Thuan lac labik jirah rivang di Asia saong pamaong tal pakat dunya”

Urak ini, binh Thuan hu ngak jeng dom pandap kaya, labik jirah rivang bahrau yau: Tasik – bein bingu me-in NovaWorld, bein bingu ia Wonderland, labik inem mek Căn cứ Tinh uy Binh Thuan dalam tukvak masa mesuh kalin haong Amerik… daong ngak rilo pandap panda jirah rivang, dui pachreih tuai damuai. Dom labik ngak nong di bhum palei jeng hu pachreih, daong piah duh ka hatai caong jirah rivang.

Patagok gah jirah rivang oh sa janih brei ba Binh Thuan jeng sa “labik njauk piah daok” blaoh daok ieu lac bruk hu makna angan jei piah tinh uak drei tagok dalam jaman bahrau. Binh Thuan ieu lac labik piah mai jirah rivang siam gheih dang akaok, daong ba gah jirah rivang di nagar Viet Nam tagok sa labik bahrau, brei mboh labik dang di tinh dalam jalan patagok kinh te – xa hoi dalam bhum saong taneh ia./.