Di buôn Trấp, xa Cư Mgar, di dom jalan sit sot anit ranam ma-om bak hala hijau di phun kayau, dom kaduk bingu yaih rup saih biak makre di ala pandiak kanyik. Krah abih di dalam nan mboh binguk dom hala dok marah patuk kanyik uak par di dalam angin, pabingu brei ka buôn palei, ba mbak dom chreih chrai hatai bangsa. Taha palei angan Y Suinh Buôn Yă brei thau lac:

“Tuk peih bruk tual hala dok, mikwa thei jeng bui chreih. Yaok baoh sang taeng drei blei hala dok, tual tagok eng. Dok Ndang ye sang halei hu urang ndang ye nyu tual tagok, daok hala dok Nagar ye sang halei jeng tual, piah pok praong taneh ia nagar.”

Meng buôn Trấp, jalan hala dok Nagar peih praong biak khang. Xa Cư Mgar atah labaih 7 km jalan hala dok, meng dom jalan asal dan saong abih 11 palei, buôn. Amuk Hồ Thị Thanh Hải, Phaok Bi thu bhian hu mbaok di xa Cư Mgar, brei thau lac:

 “Urak ini abih 11 palei buôn jeng rami ramik, pasiam jalan hala dok di drei saong tual hala dok Nagar, hala dok biak mboh barau di angaok jalan. Tuk drei tabak nao di angaok jalan dok di palei buôn mboh dalam hatai biak chreih, kayua nyu jeng ieu lac janih padang patau jumpataom di abih bangsa jeng ye pacaga taneh ia Negar.”

Di palei Tiến Thịnh, xa Quảng Tiến, huyen Cư Mgar, sang halei jeng pok glaong bruk tual hala dok di anak pabah mbang jang di dom harei raya harei praong, dalam nan hu harei raya Tet Nguyen dan, Harei padang Ndang jeng ye dom harei praong raya di taneh ia. Gam labaih kurang 400 baoh sang, palei Tiến Thịnh ieu lac sa palei nao dalau dalam bruk padang jalan hala dok ieik. Ong Nguyễn Tấn Chờ, akaok palei Tiến Thịnh, brei thau lac:

“Tuk sa palei hu sa jalan hala dok ye ieu lac baoh hatai chreih ranam di bhum palei. Jalan hala dok di palei Tiến Thịnh sa palei dalau camareip akaok meti padang jalan hala dok, jalan brei ieik ngak tui di dalam huyen. Drei pok ja pok praong hala dok jeng ye drei pok praong pok glaong taneh ia Negar, yau nan ye drei tual hala dok bak dom hatai pok ja pok praong di drei.”

Jalan dok Nagar di huyen Cư Mgar daong pachreih hatai ranam bangsa, pachreih hatai patacah gauk patagok kinh te, ilamu di bhum palei. Ong Nguyễn Thiên, Phaok Bi thu thuong truc Huyen uy Cư Mgar brei thau lac:

“Dom xa, ban sit padang jalan dok meng di thun 2020. Dalau abih di nyu padang di jamang asal pasak xa, urak ini di dom xa ban hu peih praong padang jalan dok di dom jalan dalam palei, di dom kapul dan pho. Padang jalan dok gam brei pachreih pok yam tal Harei nyom raya Ndang taong abih pakat dan saong gam brei sanang lagaih jang dalam bruk pachreih jak ba dakvah brei chreih dom harei raya harei praong di negar.”

Dom jalan bak hala dok marah bhong patuk kanyik par para di dalam anghin yuk akaok thun brei mboh chreih sambai brei ka jak jeng dalam bruk padang palei ngak nong barau di Cư M’gar, Dak Lak dak harei dak gheih mada kaya, ilamu siam makre./.