Dom bilan akaok thun 2025, tinh Dong Nai hu brei harak mbaoh tangin brei buh jien tame ngak 10 danak dak FDI birau kuhria abih tih phun jien mbaoh harak labaih 258 trieu USD saong 2 danak dak bahrau dalam negar ngan haong phun jien labaih 1.882 ti dong. Gam tukvak ini, Dong Nai taduan hu dom bruk siam lagaih tuk hu 16 danak dak FDI pasiam veik phun jien kuhria abih tih labaih 485 trieu USD saong 2 danak dak dalam negar brei kuhria veik phun jien tagok 544 ti dong.

Tui Mban khik iek dom KCN tinh Dong Nai, dom danak dak pachreih urang buh jien tame ngak mbang ralo abih lac gah ngak tabiak mban dan, pandap ndien, ndien tu; co khi ngak tabiak pandap…khik brei dom asar di kong nghe bahrau, lagaih haong jalan pachreih urang buh jien tame di dom tinh.

Amuk Dương Thị Xuân Nương, Pho akaok Mban khik iek dom KCN tinh Dong Nai taong yaom, bruk pachreih urang buh phun jien FDI tame ngak mbang jeng yau pachreih urang dalam negar buh jien tame ngak mbang yau tukvak tapa mek hu rilo jak jeng siam mekre.

“Bruk ngak hu siam yau nan rik tame phun jien pachreih urang ngak mbang di Dong Nai hu labaih 1 ty 500 trieu dola My saong ba Dong Nai patagok khang kajap lac sa dalam dom tinh, ban dang akok dalam bruk pachreih urang dalam negar buh jien tame ngak mbang.” 

Pachreih urang buh jien tame ngak mbang lac asar kadha hu makna praong dalam pambuak gah ngak mbang pablei salih di Dong Nai. Kuhria tal ini, tinh dak padang saong mbaoh tangin 41 harak sanya padar, ginum biai pambuak bruk dunya pakat tinh mbang camereip haong 12 taneh ia di dunya. Tapa bruk ngak hu siam nan, tinh daok duah veik jalan pachreih dom danak dak kong nghe glong, siam ka alam moi truong. Gam haong nan, tinh  patui veik bruk paga taneh piah ngak labik kong nghe glong labiah 500 ha saong labik kong nghe khaw tin 100 ha.

Sa dalam dom kan kandah tuk pachreih urang buh jien tame ngak mbang di dom KCN di taneh saoh jaik abih. Ong Phan Trung Hưng Hà, Pho Yam ndoc Sở Kế hoạch saong Đầu tư tỉnh Đồng Nai mboh lac, tapa pasang iek ye daok taneh  ka dom doanh nghiep FDI pah, yau nan min bruk peih ngak daok suai damuai kayua rilo bruk kan kandah karei di gauk.

“Bruk cuang kandah ngan haong tinh Dong Nai caong khin pachreih hu rilo urang buh jien tame ngak mbang khik ramik alam moi truong, takik pandar urang ngak kurang ilamo. Yau nan ye, tukvak nan tal brei poachreih urang kaya meda buh jien tame ngak mbang, pandar takik urang ngak , ba mai kein laba glaong”.

Thun 2025, tinh Dong Nai ba tabiak rilo jalan langyah jhul pakhang bruk cakrok patagok kinh te, salih birau kong nghe saong patagok khang kajap tui jalan ngak mbang hacih sa-at hijao. Ong Phạm Văn Cường, Yam ndoc So Kong thuong Dong Nai khan lac, dom tavak tavaiy  ka sarak, ka ha tang hu gah kong thuong piah hu langyah.

“Hu bruk ramik veik urang jakar ngak bruk, khol drei mboh hanjol njaic, ba ilamo kong nghe tame ngak, salih pandar taka so, pandar kong nghe AI pambuak haong dom ndon vi, doanh nghiep, jabat chuc nang piah langyah sarak gal hanh chinh, khik iek tani tanat jang.”

Tui ong Võ Tấn Đức - Akok UBND tinh Dong Nai khan lac, dalam bruk quy hoach patagok di tinh, kong nghiep daok lac prein khang. Tỉnh brei pataom tame  lang talaih dom cuang kandah, tavak tavaiy ka taneh kong nghiep piah pachreih urang buh jien tame ngak mbang, kham merat ngak brei patagok 10% tui bruk tacei ba di Rajaei./.