Meng sa tinh ngak nong, ngak meng tangin, Binh Duong hu dom jalan nao pok drei jieng sa dalam pasak ngak kong dang akaok dalam nagar, ngan haong phun jien mek tame kuhria tui akaok manuac glaong abih.

Oh padeih di nan, Binh Duong hu ba tabiak tanut tal thun 2050 marat jieng sa pasak ban pablei salih, ngak kong, yit vu, hu angan je dalam bhum nagar saong dungya di dom ban gah Maraong yau Thuận An, Dĩ An, Thủ Dầu Một saong Tân Uyên. Dom bhum ni meda hu padang ngak siam gilac, ngak bahrau saong pamaong tal patagok dom thaik ngak ban bahrau tui jalan TOD. Piah ngak hu bruk ni, Binh Duong hu tagok danak dak ba dom labik ngak tabiak daok ngak brei oh siam tal môi trường di gah Maraong tagok dom labik ngak kong pajum pataom di gah Barak.

Ong Nguyễn Hồng Hải, kien truc su trưởng Taong kongti Becamex IDC khan lac bruk pandar labik ngak hu siam gheih saong brei mboh dom jalan ngak mbang njauk caik hatai nan lac dom tanut hadah dalam quy hoạch ni.

"Bruk pandar labik ka bruk patagok nan jang daok kuhria tani tanat dalam quy hoạch. Meng jalan brei thau ka bruk ngak mbeng njauk caik hatai, mblang ngak mbang pasak rabha tabiak dom labik prein khang ngak mbang patagok, gah Maraong lac ngak hagait, panduan salih ngak kong, padang veik ban, ngak brei salih jalan nao mai ka rahra, cak rok thaik ngak ban TOD, tal bruk srap gap taneh riya gah Barak taduan abih tih panduan ba gah ngak kong."

Piah jieng sa pasak ban, ngak kong, yit vu, hu angan je ngaok bhum nagar saong dunya, Bình Dương jang daok jhul catang bruk buh jien tame ngak jalan mbak pambuak bhum haong gauk yau Vành đai 3, Vành đai 4, jalan nduac samar Ban raya HCM – Thủ Dầu Một – Chơn Thành, piah pambuak dom pabah lamnge Cái Mép – Thị Vải, mblang ahaok par Long Thành. Tien si Trần Du Lịch khan lac, ni sa jalan nao tani tanat piah ba Binh Duong pok drei patagok saong jieng sa ban bahrau.

"Jalan mbak nao mai oh ka lagaih min Bình Dương jeng pandar hu dom prein khang di drei. Ta-eng bruk buh jien tabiak ngak jalan Mỹ Phước – Tân Vạn bo urak ni nan sa jalan Vành đai 3, nan lac ngak tabiak prein lagaih ka bhum di bruk buh jien ngak jalan. Dahlak jia lac, harei hadei ngak jalan Vành đai 3, Vành đai 4, jalan nduac samar TP HCM – Thủ Dầu Một – Chơn Thành nan Bình Dương biak lagaih dalam bruk pambuak cakrok patagok, ngak tabiak prein lagaih ka bhum, ngak jeng prein khang  jhul patagok ka drei anak tal."

Lingiu di nan, Binh Duong jang brei ngak dahlau bruk cak rok patagok dom labik ngak kong rai bahrau, pambuak haong dom yit vu sinh thái, patagok pren ngak hijao saong cakrok năng lượng angui veik. Pagap yau huyện Phú Giáo dahlau ini hu thau tal dom bein kao su hijao blaoh urak ni bhum daok mbeik drei jeng sa dalam pasak ngak kong saong ngak nong kong nghe glaong. Ngan haong bruk hu dom labik raong pala bahrau yau U&I, Phú An Khương saong hop tac xa tamun luoi Kim Long, Phú Giang daok hu brei mboh angan je di drei dalam bruk ngak nong angui pandar kong nghệ glaong. Ong Nguyễn Quang Trinh, Phaok Akaok UB Bhap bini huyen Phú Giáo brei thau:

"Urak ni huyện Phú Giáo daok pajum prein jak ba dom pren khang, pambuak haong bruk angui siam phun jien hu parabha piah buh tame cong trinh, danak dak hu mbaoh tangin. Dalam nan, brei ngak dahlau bruk buh jien tame ngak bahrau, pasiam veik, peih praong dom jalan nao mai pambuak bhum, ngak pambuak, lang praong tabiak, jhul patagok bruk ngak mbeng – rai diuk rah rah hu patagok."

Meda mboh lac, dom jalan ngak piah cakrok patagok bo Binh Duong ba tabiak nan lac jalan nao njauk. Hadei tuk taduan mek hu ralo baoh jeng siam mekre dalam bruk panduan salih meng sa tinh ngak nong, ngak meng tangin  jieng sa pasak ngak kong dang akaok nagar, Binh Duong ptui veik brei mboh labik dang di drei meng bruk kham ngak salih bahrau saong hu bruk hadah krah. Kadha ni brei mboh bhum palei hu sahaneng pasang atah saong kham marat dak padang sa Binh Duong cak rok khang kajap, jieng sa dalam dom pren khang patagok dalam nagar./.