Baoh sang ong Sơn Bao ieu lac baoh sang kathaot daok di puk Hội Trung, ban sit Lịch Hội Thượng, huyen Trần Đề. Thun dahlau, baoh sang di gait hu daong brei ngak sang saong taneh daok meng danak dak pakat negar brei ka patagok bruk ngak mbang kinh te - rah ra saong bhum ceik tukvak 2021-2030, mai meng nan ong hu labik daok tani tanat, khang kajap, rai diuk jeng siam makre jang. Langiu di nan, ong daok hu daong 1 yau limo piah patagok bruk ngak mbang, daong ka baoh sang hu  mbuan laghaih duah jien mek tame, samar yam tagok, grap tanat raidiuk. 

“Dahlak hulin raong dua urang kamuan metui amaik ame, baoh sang jeng oh hagait, nyim taneh mikva jaik taphia piah padang ngak sang kadai piah daok, harei ini hu Karja daong ngak sang saong 2 drei limo raong, daong ka khaol dahla hulin hu mbuan laghaih jang dalam bruk ngak mbang.”

Dalam dom thun tapa, tinh Soc Trang tuk halei jeng jhul khang bruk pathau khan, ba jalan di Ndang saong sarak, hukum di Karja tame dalam raidiuk. Mai meng di nan dom danak dak, sarak bangsa, hu peih ngak samar drah, mek hu rilo baoh jeng siam mekre hu daong ka rai diuk di bhap bani dak harei dak yam tagok, salih bahrau. 

Mỹ Tú ieu lac sa palei hu rilo bhap bani bangsa takik, dalam nan hu bhap bini Khmer labaih 26%. Di dom phum sóc di mikva harei ini mboh biak siam gheih jang dahlau. Rilo baoh sang khang kajap bahrau hu padang ngak bahrau, jalan mbak hu peih prong laneng lanoi, dom bruk ngak brei ka rah ra yau gom, jalan, sang bac, balai iek ruak… hu peih ngak biak siam.

Dalam dom harei puac thun ini, khaol hulin dalak hu rivang jirah sang bac Tieu hoc Mỹ Thuận B, thaik binguk anak meta nan lac sa baoh sang bac bahrau, hacih sa-at. Gru Nguyễn Văn Tú, Phaok akaok Sang bac, khan lac, sang bac bahrau ini hu padang ngak meng phun jien di Danak dak pakat negar, ba tame pato di thun 2022. Sang bac hu labaih 570 anek saih tui bac, dalam nan, anek saih nan lac anek kamuan urang bangsa takik hu labih 90%. Gru Nguyễn Văn Tú, brei thau:

“Karja buh jien tame ngak sang danaok, jeng yau dom janih pandap panda piah pato brei ka sang bac yau pandap tapuk siphau brei ka anek saih bac megru, tivi, máy tính ka taong abih duk bac. Mai meng nan hu daong ka anek saih chreih takre bac sang. Blaoh tuk dom adei tui bac danak dak pato megru 2018, tapa yaok thun bac, anek saih yaok thun jeng mek tanut hu jao, mek hu meng 98% tagok, hu thun jaik 99%.”

Soc Trang hu jaik 35% bhap bani lac urang bangsa takik, mboh rilo lac bhap bini urang bangsa Khmer. Kayua yau nan ye bo bruk peih ngak Danak dak pakat negar tuk halei jeng hu bruk sangka, pal akaok, tacei pato di Tinh uy, HĐ Bhap bini, UB Bhap bini tinh, bruk tacei ba biak catang di UB Bhap bini tinh saong bruk hu mbaok tame ngak dom gah, kapul nyaom dom pakat. Tapa 3 thun peih ngak danak dak, tal harei ini hu jaik 12/24 tanut ba tabiak ngak meda mek hu saong tapa haong danak bruk ba tabiak, tapa nan, ngak brei cakrok patagok kinh te - xa hoi di tinh. Ong Lâm Hoàng Mẫu, Akaok Ban Bangsa tinh Soc Trang, khang panuac lac:

“Danak dak pakat negar brei patagok kinh te-xa hoi bhum urang bangsa takik saong bhum ceik hu rik binah ba raidiuk di bhap bani bangsa takik tani tanat; sang danaok jalan mbak hatang bhum urang bangsa takik, bhum daok gaok kan kandah daok pataom buh jien tame ngak, dak padang, pabak hatai caong khin dak harei dak siam jang. Urak ini, urang daok dalam baoh sang kathaot, jaik kathaot, baoh sang bangsa takik hu siam laghaih jang dalam bruk taom gaok dom dịch vụ rah ra; asal siam, baoh jeng siam mekre di bruk pato megru hu patagok.”

Ngan haong bruk peih ngak biak catang, hadah krah, samar drah di dom pakat, dom gah, bruk peih ngak dom danak dak pakat negar di Soc Trang patagok hu baoh jeng siam mekre, daong paglaong rai diuk di bhap bani, jhul patagok bruk ngak mbang kinh te - xa hoi di puk palei tui jalan karo kajap./.