Pathau mikva saong grauk ayut!

Lac sa dalam 22 xã điểm padang ngak palei pala birau di tỉnh Sóc Trăng, labaih 3 thun peih ngak, tal harei ini, xã Long Hưng, huyện Mỹ Tú ngak hu blaoh 19 tiêu chí padang ngak palei pala birau. Akok bilan 11 tal, Long Hưng jeng sa dalam 3 xã camereip di Sóc Trăng hu pok brei angan lac xã palei pala birau. Kadha vak di urang vak di Rayo sap ndem Viet Nam daok ngak bruk di bhum taneran kraong Cuu Long:

Bruk jak jeng angaok jalan mbeik drei jeng xã palei pala birau di Long Hưng njauk ndem tal bruk salih jalan ngak mbang kinh tế. Bruk salih janih phun pala, athur raong lagaih saong bhum taneh, ralo meng lac taneh njom likhun, ia mbak, hu daong ka mikva dalam xã jeng kaya meda. Ong Nguyễn Văn Lợi, sa dalam dom baoh sang hu angan lac ngak mbang naih joi meng bruk pala phun mbang baoh di mblang taneh pala tabau dahlau diah oh hu kein laba brei thau, labaih 400 trieu dong lac jien laba yaok thun bo sang ong mek tame meng mblang taneh praong 1 hecta pala  dom janih phun yau kam xoàn, quýt đường atau kruac bung; gam ba bruk ngak ka rilo urang dalam palei.

Băng: Dalau diah taneh ini dahlak pala tabau hu 5-6 thun, min oh hu laba, bloh mboh taneh Tân Thành ini nyu lagaih saong phun mbang baoh, ye dahlak salih tapa pala phun mbang baoh, hu kein laba biak glaong, labaih jien mbang cai, blei ginup pandap pandar dalam sang. Ka dua tra hu ba bruk ngak ka mikva dalam palei.

Mbiah tal harei ini, Long Hưng hu salih labaih 500 hecta taneh pala phun takik kein laba tapa pala dom janih phun mbang baoh hu yaom galong saong pala sen caraih mek asar pambuak saong raong ikan, mek jien tame hu yaok rituh trieu dong yaok thun. Xã daok padang hu dom bhum ngak padai, pala tabau, ngak ribaong kraong ba ginup ia pruh. Langiu di nan, bruk ba ilamu ky thuat birau tame ngak, ba mai kein laba glaong atau bruk duah darak pasar piah pablei pandap hu khang kajap jeng hu sangka biak rilo, tapa bruk padang rilo hợp tác xã, kalup kapul atau tổ pambuak bruk ngak mbang, blei pandap ngak tabiak.

Tuk raidiuk bhap bini hu cak rok patagok, bruk njauk gauk pachreih tui di bhap bini dalam padang ngak palei pala birau dak hadah hadai jang. Tapa nan rilo taneh, phun pala, athur raong tui yaom jien abih tih tagok tal abaih 50 tỷ đồng hu mikva dalam palei rik tame ka palei. Ong Lê Văn Trắng, sang hu taneh alin brei piah padang ngak palei pala birau, khan lac:

 Băng: Tapa bruk jak ba padang ngak palei pala birau ye urang nong khol dahlak hu alin taneh padang ngak jalan mbak, jalan điện, sang bac, balai iek ruak, gam lac kein laba di drei gam hu kein laba ka bhap bini labik nan, drei kham ngak habar piah ka palei pala drei cak rok patagok, dak harei dak siam mekre.

Labaih 3 thun padang ngak palei pala birau, mbaok meta xã Long Hưng hu salih birau biak siam. Rilo jalan mbak, jalan ba ia pruh, cơ sở hạ tầng hu padang ngak dak harei dak siam jang, jien mek tame kuhria tui akok manuac saong urang duah hu bruk ngak tani tanat jeng tagok biak rilo; an ninh chính trị hu khang kajap, xa hoi hu salamat. Tui harak pathau khan ka bruk padang ngak palei pala birau di xa Long Hưng ye jien mek tame kuhria tui akok manuac dalam palei labaih 37 trieu dong saong daok takik jang 7% baoh sang kan kathaot. Ong Nguyễn Hữu Đức, Pho Bí thư Đảng ủy xã Long Hưng brei thau:

Băng: Bruk padang ngak palei pala birau nan lac ngak habar piah salih birau raidiuk mbang ngui daok dang ka bhap bini. Tapa nan nyu pambuak tal bruk patagok kinh te, yau nan nyu meda gaok tal jalan ngak mbang klak saong jalan sahaneng klak di bhap bini, nan ye khin salih birau bruk ini puk palei jeng gaok rilo kan kandah, min tapa dom bruk ngak mboh husiam lagaih di anak meta ye bhap bini biak pachreih tui.

Ngan saong 19 tiêu chí padang ngak palei pala birau hu ngak salah blaoh, Long Hưng harei ini yau cuk tagok rup drei sa blah ao bahrau, dom jalan dalam palei gluh baok dahlau diah urak ini hu tuh menyek, tuh betong tapak njuac njac, tapen dua gah jalan hu pala bingu meke, hu paga siam, pacang vil taom dar dom baoh sang praong, siam. Dom danak dak ba mai kein laba daok hu padang ngak yau daok caga duh ka raidiuk di bhap bini./.