Nao tui jalan roya 37, tapa đèo Trẹn di kreih ceik glai Tây Bắc ye tal Bắc Yên-Sơn La. Labik bhum glaong ini, mùa xuân hu mboh tapa dom bingu đào lai saong sambo hijao di phun tea Tà Xùa saong phun medar Sơn Tra.

Ngan saong baoh sang saai Mùa A Tống daok di palei Tà Xùa A, xã Tà Xùa, thun barau ini lac sa thun trei sil kayua sang saai hu tabiak truh eik lipa kan kathaot yam tagok kaya meda. Meng taneh pala tea jaik 5.000 phun praong, taha, labaih 2 ha tangei, padai, pambuak saong raong athur, menuk ada, dom thun jaik di ini, yaok thun sang saai mek tame hu yaok pluh triệu đồng. Kaoh tabiak phun jien buh tame ngak, sang saai hu labaih jien padai, blei hu pandap panda piah pandar dalam sang, anek bhik hu mbang bac ginup. Saai Mùa A Tống brei thau:

 “Đảng, karja biak sangka, đầu tư, yaok baoh sang jeng thau sahneng kham merat yam tagok. Langiu bruk kham merat ngak mbang, jeng hu ruah duah, ba pajaih barau, ilamu kỹ thuật tame raong glang, pala drak, bac megru dom bruk ngak lagaih piah patagok kinh tế baoh sang”.

Gam saong baoh sang saai Mùa A Tống, tapa 6 thun peih ngak danak ak patrun kan kathaot samar saong khang kajap tui sarak 30a di rajei, baoh sang kan kathaot di huyện hu patrun biak rilo, tal urak ini daok labaih 3.700 baoh sang min, meblah 30% dân số.

Ngak hu yau ini, huyện Bắc Yên hu pandar dom phun jien đầu tư di krja, patagok pren khang di drei, peih ngak hu kein lagaih dom danak dak dự án patrun kan kathaot. Eng thun 2014, langiu 14 tỷ đồng kayua Tổng công ty ba-ar Việt Nam daong, huyện hu peih brei jaik 36 tỷ đồng phun jien danak dak 30a di rajaei đầu tư padang ngak cơ sở hạ tầng dom xã, palei kan kandah; peih ngak sarak daong sản xuất, ba bruk ngak patagok jien mek tame, daong baoh sang kan kathaot mesraiy phun jien, pato bruk ngak ka bhap bini.

Dom xã jeng iek tui bruk di palei drei, pasang iek baoh sang kan kathaot, makna kan kathaot saong hu dom jalan ngak lagaih piah daong dom baoh sang kan kathaot. Yau xã Tà Xùa hu kein lagaih gah tea. Xã hu pataom tame bruk pachreih nông, pachreih glai, daong pajaih, phun jien, ilamu pasiam, iek glang tea daong ka mikva hu jien mek tame tani tanat. Xã Hồng Ngài hu tham mưu ka huyện pataom tame bruk daong bhap bini ngak hamu bậc thang patak pataom ia pala tangei padai dua vụ, peih praong taneh pala phun sơn tra, jak ba bhap bini patagok bruk raong glang athur hu kein laba. Meng xã hu baoh sang kan kathaot ralo, tal urak ini xã daok hu jaik 300 baoh sang kan kathaot min, samu 40%. Ong Mùa A Sềnh, Phó akaok Uỷ ban bhap bini xã Hồng Ngài brei thau:

 “Xã brei urang jakar tame dom palei duah thau makna di baoh sang kan kathaot. Hadei di nan brei urang jakar pachreih nông tame palei tacei pato mikva pandar ilamu kỹ thuật tame bruk pala drak. Dom urang đảng di palei, dom baoh sang barau tabiak truh kan kathaot, baoh sang kaya meda tacei pato, pan tangin tacei bruk yaok baoh sang, tacei ka urang thau janih phun, janih raong hu năng suất glaong piah ba tame raong, ba tame pala”.

Baoh sang kan kathaot di bhum glaong Bắc Yên hu trun samar, min oh ka khang kajap, brei mboh di dom xã, baoh sang kan kathaot daok glaong labaih 40%. Dom baoh sang jaik si kan kathaot jeng daok jaik 1.600 baoh, meblah jaik 13%, meyah oh hu dom jalan ngak chip, ngak cambaih laih ye dom baoh sang ini meda jeng baoh sang kan kathaot. Dalam tuk nan, bruk salih barau janih phun pala, athur raong saong bruk peih praong dom dự án hadei di tuk hu đầu tư daok suai damuai. Bruk xã hội hóa bruk patruh eik patrun kathaot di puk palei oh ka glaong. Piah mek hu bruk ngak lac thun 2015 ini patrun baoh sang kankathaot dalam huyện trun daok 27%, amuk Trịnh Thị Tuyết, akaok phòng Lao động-Thương binh-Xã hội huyện Bắc Yên brei thau:

 “Kol dahlak daok tham mưu ka pakat ủy, karja puk palei pataom tame tacei pato peih ngak siam bruk pasang iek dom baoh sang kan kathaot piah pataom tame dom sarak daong patagok kinh tế, praong di abih nan lac kinh tế nông lâm nghiệp, daong phun pajaih, anek pajaih, tacei ilamu kỹ thuật ka urang nong, peih praong khai hoang hamu ia. Huyện Bắc Yên jeng hu pataom tame patagok tapon athur raong, peih praong taneh pala phun sơn tra. Bloh pataom tame ngak cơ sở hạ tầng, daong sang daok ka urang kan kathaot, khik ka bhap bini bangsa takik, urang kan kathaot hu mbang tui dom dịch vụ xã hội”.

Thun bahrau daok mai tal grap mbon ceik bhum glaong Bắc Yên ini. Yaom lac daok ralo kan kandah, min thun barau ini meda trei sil jang thun dahlau meyah hu bruk đồng lòng, quyết tâm di karja palei saong yaok bhap bini kham merat jhul kadul likuk kan kathaot eik lipa./.