Atah di ini 40 thun, meng jayah praong di bruk  Tổng tiến công saong brok tagok bilan xuân thun 1975, tabung glaong lac Chiến dịch Hồ Chí Minh sajarah, bruk dang tagok mesruh taong Mỹ daong taneh ia di bol bala saong bhap bini drei mek hu jayah. Jayah praong nan, lac blah dakrai hadah hadai dalam sajarah taong pateok kol khamang di bangsa Việt Nam saong hu tame dalam sajarah dunya. Hadar veik dom thun bilan hào hùng, hadah hadai nan, da-a mikva saong taong abih gauk pang kadha vak “Yaom glaong sajarah di jayah 30/4” di Mỹ Dung, urang vak di rayo sap ndom Việt Nam daok di ban raya Hồ Chí Minh.

Ndom tal jayah praong bilan xuân thun 1975 di bol bala saong bhap bini drei, Thiếu tướng Trần Ngọc Thổ, Phó akaok kapul urang njauk jru mek klik kruac VN pakat negar jeng oh padauk hu drut drui. Dalam mbang Tổng tiến công saong brok tagok bilan xuân thun 1975, ong hu pok ngak Tham mưu phó Akaok mban tác chiến cánh quân ka 5 taong kol khamang meng gah meraong tagok. Dom harei mesruh metak bak gah meraong, ong saong dom ayut di drei rah tapa oh thau hadom rambah rambup, metai lihik bloh taong abih janih nan hu pabak veik meng jayah hadah hadai di Chiến dịch Hồ Chí Minh sajarah. Hadar veik dom thun bilan hào hùng nan, Thiếu tướng Trần Ngọc Thổ khan lac: Mblang mesruh gah meraong taong Mỹ glaih glar lô, rambah rambup lô, nyu karei jang dom bruk mesruh metak karei. Bol bala bhap bini Việt Nam tok hu phao ndao sit sot, gam saong bhap bini urang ngak, dang tagok taong veik sa đế quốc. Nan lac tabung glaong di nghệ thuật quân sự”.

Bruk Tổng tiến công saong brok tagok bilan xuân thun 1975 rah tabiak dalam 55 harei melam saong jalan nao “sa harei samu 20 thun”. Bruk mesruh metak nyu tamat dalam tatuak drei di đế quốc Mỹ tuk sa đội quân hùng hậu hu ginup phao ndao praong - bahrau bo taduan kadun likuk anak bangsa Việt Nam kathaot gah thế lực min meda gah jum pataom saong hatai khang. Bruk jum pataom, sa hatung hatian dalam Đảng, dalam bhap bini saong jum pataom dunya lac sa dalam dom kadha praong ngak jeng yajah di bruk dang tagok mesruh taong Mỹ, daong taneh ia. Đại tá, Phó Giáo sư, Tiến sĩ Trần Ngọc Long, dahlau deih ngak Phó Viện trưởng Viện Lịch sử Quân sự Việt Nam ndom lac: “Meyah iek tui gah kinh tế saong quân sự ye Việt Nam yếu jang. Min gah pren khang tổng hợp ye Việt Nam khang jang. Meng pren khang nan, bangsa Việt Nam thau meblah mek jayah, taong janeh kol khamang dalam yaok chiến lược chiến tranh bloh yam tal sa bruk tổng tiến công piah gam taong ka Mỹ nduac, gam pajaleih hu karja Việt Nam cộng hòa, ba taneh ia tame sa baoh negar”.

Hadei di tuk jayah di rilo labik, puac bilan 4/1975, bol bala saong bhap bini drei taong tame Bei Gon, labik puac abih di kol khamang. 11 tuk meteh harei 30/4/1975, hala dok jayah par tagok di tabung Dinh Độc lập. Meng mbang taong ini, drei ngak tayah abih 1 triệu quân đội ngụy kayua Mỹ buh rilo pren yava padang tagok, raong pato saong tacei pasram dalam tukvak suai livik, ngak ka kol nyu njauk yar tangin taduan lah. Yaom lac hu rilo metai lihik dalam bruk mesruh metak dui atah 21 thun min tui Phó Giáo sư, Tiến sĩ Nguyễn Mạnh Hà, Viện trưởng Viện Lịch sử Đảng, bruk hy sinh ini nyu xứng đáng ka jayah dane angan di bangsa drei: Ong muk drei lac “Mesruh metak brei ka hòa bình miat miat”. Bangsa Việt Nam lac sa bangsa biak takre hòa bình min tuk halei jeng dang tagok mesruh pacang kol khamang meblah taneh ia piah meblah veik hòa bình, yasa taneh ia. Tantu mesruh metak lac metai lihik, lac hy sinh. Min metai lihik, hy sinh dalam mesruh taong Mỹ daong taneh ia di kol drei biak praong, min kol drei oh huac piah meblah veik độc lập, meblah veik thống nhất, hòa bình ka taneh ia.

Mesruh metak tapa livik bloh min dom kadha bac megru hu dalam bruk mesruh taong Mỹ daong taneh ia tuk halei jeng hu bhap bini Việt Nam saong ayut dunya ndom tal haong hatai tự hào. Phó Giáo sư, Tiến sĩ Nguyễn Trọng Phúc, dahlau deih ngak Viện trưởng Viện Lịch sử Đảng mboh lac, hu biak rilo janih gheih hu bol bala saong bhap bini drei ba tame ngak hu jak jeng dalam jayah praong bilan xuân thun 1975 bo mbiah tal harei ini jeng daok hu maong yau chân lý: Kadha bac megru praong di abih jeng lac bruk anit ranam taneh ia, paglaong bruk jum pataom bangsa. Lingiu di nan daok hu bruk pan akaok ba jalan di Đảng. Puac di abih, kol drei njauk ndom tal kadha bac megru hu meng bruk ieu pataom pren khang bangsa, pren khang dalam taneh ia haong pren khang gah lingiu piah meblh độc lập.

Taong abih dom kadha rah tabiak dalam bruk dang tagok mesruh taong Mỹ daong taneh ia brei mboh bruk njauk di chiến lược tiến công, jalan ngak cách mạng, bruk tacei pato jal;an mesruh saong nghệ thuật quân sự di bol bala Việt Nam ala bruk pan akaok ba jalan hadah hadai, naih gheih di Đảng drei. Dom jalan sahneng nan, daok hu dom rai urang ngak praong pan akaok taneh ia ba tame pandar dalam bruk dak padang, salih bahrau taneh ia piah dalam sa tukvak oh suai livik, Việt Nam meda yam takai samu haong dom taneh praong khang di dunya yau hatai caong di Chủ tịch Hồ Chí Minh./.