Inem mek Củ Chi -TPHCM

Mai Củ Chi dalam dom harei bilan 4, jeng daok lac pandiak khang di bhum taneh pasei saong meda mboh, bhum mi daning ban di taneh ia harei ini oh padeih cak rok patagok. Sa jaman mbom siu urak ini lac dom inem mek, lac dom amaik Việt Nam anh hùng bo dahlak hu taom gaok angaok jalan nao. Amaik ngak brei drei hadar kanar dom hagait nao tapa, dalam nan hu sa yaom glaong jang taong abih dom yaom glaong, nan lac yaom diuk rai  bo dom amaik ba mai ka rai diuk ini.

Ala phun paneng anak sang, amaik Võ Thị Ba (umo 91 thun, xã Phước Vĩnh An, huyện Củ Chi) daok dang cang tuk mahit lac khaol dahlak mai rivang. Rup amaik lavang lavaih yau dom thun bilan mong akaok anek mai sang, min takai yam di amaik jeng daok khang kajap rilo. Ba khaol dahlak tame sang, amaik pok sap ndom lac: “gaok gauk uan sa harei bui”.

Di umo meng kan mai takik mboh, dom hagait rah tabiak dalam dom harei mesruh metak atau harei yasa taneh aia ngan haong amaik, meda lac nyu daok veik pak halei nan dalam bilan xuân sajarah thun nan. Urak ini amaik ranyah akaok, klao: “Amaik taha paje, drah var rilo”. Mong tagok thaot binguk dom urang anek amaik ranam klaih pruac min kham merat pacang aia meta piah ba palao tagok jalan, angan di dom sa-ai, amaik kanar abih: “ja bhan prong angan Nguyễn Văn Nam, ja bhan sit angan Nguyễn Văn No”. 

Sa-ai Nguyễn Văn Nam nao mesruh meng umo 15 thun saong lahik tuk umo 18 gheih di abih, dalam mbang mesruh haong Mỹ angaok bhum mi Củ Chi. Sa-ai Nguyễn Văn No van klak rup drei di mblang mesruh gah bhum tapen negar Tây Nam. Harei sa-ai No tagok jalan nao ngak lin, sa-ai  Nguyễn Thị Út (adei kamei di sa-ai No) khan lac: “Amaik haong dahlak dang anak pabah mbang sang, pal mbaik gom menyek, mboh radaih bol bala pajeng ba urang lin nao gan sang, nduac raduec raduec piah ka urang dalam sang tabiak palao, amaik iew dahlak: “mong iek hu mboh ja No halei oh?”. Tal sruh radaih ka dua ye mboh sa-ai No di dahlak, langik sup dhit oh samu mong mboh mbaok meta hagait, tok ma-hit sap sa-ai angaok sruh radaih ndom trun – Amaik lơi, anek nao!”. 

Meda lac dalam glo akaok meteh hadar metah van, min amaik oh van hu bruk: “Amaik dang anak sang, pal mbaik gom menyek blaoh ranyah ranyah tangin palao nyu”. “Meng tuk sa-ai nao, amaik uan rilo?”, dahlak sua tangi. Amaik lac: “habar oh uan hu, urang ndom lac mesruh metak gah nan jeng oh ka padeih, jeng daok bom siu, min nyu halar hatian tagok jalan ye drei oh pacang cakak anek, thei thei jeng caong khin hu sron mboh…”.

Yaok mbang nao tal Kalan Bến Dược - Củ Chi, dahlak jeng mboh dom urang ranaih duah mai pak ini, meda lac dom kapul urang đoàn dam dara dom jabat, min gaok tuk mai lac dom urang biak ranaih, mai ini piah duah thau ka dahlau diah, piah kanar hadhar saong thau dhal phol. Dalam dom dalikan ndom ka dhal phol, rilo jabat daok di bal raya hu taduan raong, iek glang amaik Việt Nam anh hùng saong dom urang nan ngak bruk nan oh njauk lac sa bruk njauk mek ngak.  

Sa-ai Bùi Thị Tố Như, Bí thư Đoàn Liên hiệp HTX pablei salih bal raya HCM, khan lac: “Dahlak saneng, bruk ba-yar dhal phol saong iek glang dom amaik Việt Nam anh hùng nan lac bruk bo dom urang ranaih njauk sangka saong pamong tal. Saong yaok mbang mai rivang, ndom glai nao mai haong dom amaik ye ngak ka uranaih khaol dahlak pabak hu hatai anit ranam taneh aia, tapa yaok dalikan amaik khan, tapa bruk dom urang anek van klak rup drei di amaik. Dahlak saneng lac, tapa yaok mbang mai rivang, yaok urang ranaih meda hu thau cambaih jang ka yaom di hòa bình, độc lập harei ini, meng nan diuk rai ka nyu gheih saong kham merat rik daong khik kajap hòa bình, độc lập di taneh aia tui bruk ngak, tui pren di drei”.

Rai rah dam dara urang ranaih umo harei ini saong harei hadei, juai ka ndom tal bruk lac po harei hadei di taneh aia, bo dahlau abih njauk vak patui veik umo daok ranaih bo dom sa-ai caik veik. Hu oh takik mbang hu mbaok tame bruk mai veik halau gha saong rivang dom amaik Việt Nam anh hùng, Lương Thị Kiều (umo 20 thun, SV sang bac ĐH Sư phạm TPHCM) brei thau: “Dom mbang nao yau nan lac bruk njauk ngak di drei, saong daok brei ka drei thau cambaih ka sajarah. Dom amaik lac brei mboh ka sa  jaman bo manuac sia halar hatian van klak abih dom hagait hu yaom di abih piah ka taneh aia hu hòa bình, độc lập, hu sron mbon”./.

Urang lang: Jasi -30/4/2021