Mran klei Khmer jing Yuk Ngô, mnuih ƀuôn sang Khmer kreh yua kơ klei bi lông hlăm knăm mơak Óoc Om Bóc – bi lông waih mran, hŏng klei čiăng   jing akâo angĭn jăk, hjan siam, ana pla mjing mâo lu boh kroh. Pô thâo mbruă Danh Vũ, k’kiêng hlăm sa gŏ sang mâo knhuah gru mkra mran mơ̆ng đưm ti čar Kiên Giang, kyuanăn mơ̆ng hlăk dôk điêt, ñu thâo leh hdră mnêč, klei mkra mjing sa boh mran. Hluê si pô thâo mbruă Danh Vũ, ñu jing ênuk tal 4 hluê ngă bruă anei.

Khădah k’kiêng ti čar Kiên Giang, ƀiădah pô thâo mbruă Danh Vũ dưi mkŏ mjing bruă pô ti čar Sóc Trăng, jing anôk ngă bruă mkra mjing mran đĭ kyar hĭn ti krĭng dap mnai krông Cửu Long. Hluê si pô thâo mbruă Danh Vũ, čiăng jing sa čô mkra mran amâo mâo ênưih ôh, êngao kơ anăn jing lŏ mâo klei čuê bruă mơ̆ng djuê ana leh anăn mâo klei khăp čiăng mơ̆ng phung thâo mbruă. Tơdah phŭn dô dih, Tuk Ngô jing sa boh mran mơ̆ng sa bĕ ana kyâo, dưi čông mjing mơ̆ng sa phŭn ana êgiêr, ară anei, dŭm phŭn ana êgiêr mâo 2 čô kmiêk amâo lŏ mâo ôh, kyuanăn mran ară anei dưi mkra mnơ̆ng dŭm pŏk mdhă mơ̆ng ana êgiêr. Ana êgiêr dưi ruah mă pioh mkra mran srăng êbeh 100 thŭn:

Ana êgiêr mplĕ hlăm êa srăng đung, amâo mâo êa mŭt. Tal 2 jing ana êgiêr mâo klei ê’un. Truh kơ mmông anei, hluê si klei thâo pô, amâo mâo ôh kyâo mkăn dưi msĕ hŏng ana êgiêr.

Phŭn kčưm kơ bruă mkra mran mơ̆ng pô thâo mbruă Danh Vũ ti thŭn 2022 êjai ayŏng mkra sa boh mran kơ sang Yơng Pich, ti wăl krah Vĩnh Châu, čar Sóc Trăng. Boh mran tal êlâo mơ̆ng ayŏng mkra mjing dưi mđung dlông êa êđăp ênang, mran anăn hmar leh anăn hdjul, leh kơnăn mtam, lu sang Yơng hlăm alŭ wăl lŏ iêo ayŏng mkra brei mran čiăng nao bi lông hlăm knăm mơak. Mơ̆ng năn yơh, ayŏng klă klơ̆ng jing pô thâo mbruă ênuk tal 4 mơ̆ng djuê pô êjai ka bŏ ôh 30 thŭn.

Yăl dliê kơ bruă mkra mran, Pô thâo mbruă Danh Vũ brei thâo, mkra mran čiăng kơ pô mkra mjing thâo raih bruă ruah mă kyâo, kngan thâo mbruă leh anăn klei thâo kơ mnêč mkra mjing. Êngao kơ năn ăt lŏ djă pioh klei siam knhuah gru mơ̆ng mran anăn, leh anăn rơ̆ng brei mran nao hmar, sơnăn kơh nao bi lông dưi mâo klei dưi.

Yuôm hĭn jing bruă mkra rŏng mran, tơdah dưm djŏ, amâo mâo klei bi sah lu, mran anăn srăng pral êdi. Čiăng kơ mran mrâo hnơ̆ng tŭ jăk srăng ruah djŏ ana êgiêr, 2 jing pô mkra mjing, 3 jing kă grăn waih leh anăn tal 4 jing pô ngă bruă bi klă.

Grăp boh mran luč hlăm brô 1 mlan mkrah čiăng mkra leh. Yap truh kơ ară anei, Pô thâo mbruă Danh Vũ dưi mkra mrâo leh anăn lŏ mkra bi jăk êbeh 100 boh mran kơ dŭm sang Yơng mnuih Khmer. Hlăm anăn, truh kơ knăm mơak grăp thŭn, ayŏng lŏ mkra bi jăk leh anăn mkra mrâo dŭm boh mran čiăng kơ mnuih ƀuôn sang nao hgŭm hlăm knăm mơak. Ară anei, Pô thâo mbruă Danh Vũ dưi thâo jing sa čô thâo mbruă mkra mran jăk hĭn ti alŭ wăl krĭng dap mnai krông Cửu Long, êjai mâo lu boh mran mơ̆ng ñu mkra mjing mâo klei dưi hlăm lu klei bi lông, msĕ si mran mơ̆ng sang yơng Pong Tứk Chắs, sang yơng Ông Kho, sang yơng Tum Núp ti čar Sóc Trăng, mran bi lông mơ̆ng kdriêk Càng Long čar Trà Vinh….

Amâo mâo djŏ knŏng jăk hlăm klei bi lông, ƀiădah mnuih djuê ana Khmer lŏ kñăm kơ bruă bi msiam mran hŏng dŭm mta boh mnga bŏ hŏng knhuah grŭ djuê ana pô. Tơdah pô thâo mbruă Danh Vũ jing pô mâo klei hing ang hlăm bruă mkra mran ti krĭng dap mnai krông Cửu Long, hlăm phung khăp kơ bruă kač boh mnga kơ boh mran anăn ară anei mâo amai Sơn Sà The ti ƀuôn hgŭm mrô 2, ƀuôn prŏng Sóc Trăng, čar Sóc Trăng, khădah jing pô mda asei, ƀiădah amai leh anăn ung amai jing ayŏng Lâm Phiên dưi kač leh lu mta boh mnga siam êdi.

Leh hruê knăm Dhar kreh, mjuăt ktang asei mlei leh anăn hiu čhưn ênguê mnuih djuê ana Khmer krĭng Dhŭng gưl tal 8 leh anăn knăm mơak Óoc Om Bóc – bi lông waih mran Sóc Trăng gưl tal 5, alŭ wăl krĭng dap mnai krông Cửu Long thŭn 2022 dơ̆ng truh leh, hmei nao bi tuôm hŏng amai Sơn Sà The êjai ñu dôk mjing boh mnga kơ sa boh mran mơ̆ng sang Yơng Phú Tứk, ti să Phũ Mỹ, kdriêk Mỹ Tú, čar Sóc Trăng. Amai Sa The brei thâo, jih jang dŭm boh mran mơ̆ng mnuih Khmer mâo boh mnga leh anăn mnơ̆ng bi hmô mdê mdê, ƀiădah yuôm hĭn jing si srăng ngă čiăng mđung hlăm êa, nao hlăm klei bi lông, dŭm boh mnga anăn brei kơ mran anăn jing êdah hĭn, mâo lu mnuih dlăng hĭn.

Tal êlâo pô srăng kač êa mil, si ngă phung khua sang Yơ̆ng čiăng pô srăng măl êa mil anăn, msĕ si êa kô̆, hrah, êa mlăng… Leh kơ anăn pô mă lak kre duah kač boh mnga, mâo lu mta boh mnga mơ̆ng sang Yơng ruah mă. Êngao kơnăn pô lŏ kač dŭm mta mnơ̆ng msĕ si anak rai, êmông, êman… ti akŏ mran hluê si klei čiăng mơ̆ng sang yơng.

Hlăm klei blŭ hrăm dưi thâo, amai Sơn Sà The jing pô thâo bruă ênuk tal 3, k’kiêng leh anăn đĭ hriê kơ prŏng hlăm sa gŏ sang mâo knhuah gru khăp kơ bruă kač rup ti mtih hlăm dŭm sang yơng mnuih Khmer leh anăn bruă krah rup. Hlăk mrâo 8 thŭn, amai Sa The mâo aê pô jing sa čô ngă bruă krah rup hing ang ti krĭng dap mnai krông Cửu Long leh anăn amĭ ñu jing pô thâo mbruă êdah êdi mtô brei klei ngă bruă mơ̆ng điêt truh kơ prŏng. Truh ñu 14 thŭn, ñu thâo raih leh bruă pô. Hŏng klei thâo yang adiê brei leh anăn kngan thâo mbruă, kŏ dlô thâo mĭn, amai jing leh pô thâo mbruă kač rup, mâo lu sang yơng mnuih Khmer iêo nao kač dŭm mta rup hluê si klei yal dliê hlăm hră Yơng, ăt msĕ hŏng dŭm mta boh mnga hlăm dŭm boh mran.

Hŏng klei thâo pô, mơ̆ng lu thŭn hŏng anei, lu phung thâo mbruă Khmer, hlăm anăn mâo pô thâo mbruă Sơn Sà The, Danh Vũ mâo leh lu mnơ̆ng mkra mjing dưi djă pioh hlăm dŭm sang yơng mơ̆ng mnuih Khmer ti alŭ wăl krĭng dap mnai krông Cửu Long. Hluê anăn, đru mguôp klă klơ̆ng hlăm bruă kriê pioh, bi lar leh anăn mđĭ kyar knhuah dhar kreh djuê ana Khmer krĭng Dhŭng, mkŏ mjing thiăm klei siam kơ hruê knăm Dhar kreh, mjuăt ktang asei mlei leh anăn hiu čhưn ênguê mnuih djuê ana Khmer krĭng Dhŭng gưl tal 8 leh anăn knăm mơak Óoc Om Bóc – bi lông waih mran Sóc Trăng gưl tal 5, alŭ wăl krĭng dap mnai krông Cửu Long thŭn 2022 mkŏ mjing hlăm 3 hruê mơ̆ng 6-8/11-2022.