Hŏng akŏ “Phung mniê Kon Tum mđĭ lar knhuah dhar kreh ao dai”, hlăm mlan knăm mơak, 350 čô mniê čar Kon Tum hrăm mbĭt kdŏ mmuiñ, mdah 2 blah ao dai mâo akŏ “Mnga ɃLang” mơ̆ng pô tă kčoh Ngọc Minh leh anăn ao dai hŏng akŏ “Krĭng mnơ̆ng kriê pioh dhar kreh” mơ̆ng pô tă kčoh Kim Yến. Jih dua čô mkra mjing jing mnuih Kon Tum, mphŭn čô̆ kơ bruă tŭ jing leh hgŭm hlăm adŭ mtô bruă tă kčoh ao dai kyua Êpul hgŭm phung mniê Việt Nam bi hgŭm hŏng phung tă kčoh mrô sa hlăm ala čar mkŏ mjing.

 Gưl anei Êpul hgŭm phung mniê čar Kon Tum ăt pŏk ngă Klei bi lông phung mniê mphŭn čô kơ bruă thŭn 2024 hŏng akŏ “Phung mniê Kon Tum mphŭn čô̆ kơ bruă, mđĭ lar klei thâo leh anăn bi mlih mtah”. Wưng mă klei bi lông truh hruê 30/6/2024. Klei bi lông mpŭ kơ klei mĭn bruă phung mniê čar Kon Tum čiăng đru kơ phung mniê mđĭ klei thâo ngă bruă duh mkra, mtăp mđơr êkei mniê leh anăn mkŏ mjing gŏ sang jăk mơak.