Mbĭt hŏng hdră mđĭ kyar bruă lŏ hma hluê kdrăp mrâo, mnuih K’ho ti wăl krah Lạc Dương mđĭ leh hnư hrui wĭt hlue hŏng bruă mkŏ mjing dŭm anôk bi mjĕ mjuk dhar kreh čing čhar, knă kpiê čeh, mnơ̆ng ƀơ̆ng mkăp kơ phung tuê hiu čhưn ênguê. Pô mbruă Kră Jañ K’Mơ, ti Đăng Ja Rít, wăl krah Lạc Dương brei thâo: êngao kơ hnư hrui wĭt mơ̆ng đang djam, mnga, kphê…. anôk bi mjĕ mjuk tông čing čhar ti gŏ sang ñu mkăp leh kơ dŭm êbâo čô tuê hiu čhưn, ba leh hnư hrui wĭt êbeh 100 êklăk prăk.

 “Tal êlâo pô ka thâo ngă bruă hiu čhưn êngiê ôh, ka thâo ôh kơ bruă kriê pioh lehanăn mđĭ lar dhar kreh djuê ana pô, ƀiădah mơ̆ng leh ala čar đĭ kyar snăn hmei thâo leh kơ bruă mđĭ lar lehanăn kriê pioh čing čhar, goòng, sang dlông...lehanăn dŭm kdrăp tông ayŭ djuê ana čiăng drông phung tuê hiu čhưn mơ̆ng djăp krĭng hriê čhưn ti ƀuôn sang gŭ jơ̆ng čiư̆ Lang Biang anei, čiăng mkăp kơ tuê hiu čhưn, hmei srăng čuh pui lehanăn tông čing, hlăp goòng, kdŏ mmuñ ênhiang djuê ana, mjing ai êwa hơ̆k m’ak, trei mđao lehanăn jĕ giăm. Hnư hrui wĭt mơ̆ng bruă anei hmei ăt kah mbha hŏng êpul tông čing, kdŏ mmuñ, ênoh adôk hmei lŏ duh bi liê kơ hdră hiu čhưn ênguê hlăm gŏ sang… Mâo dŭm gŏ sang mkăn mâo hnư hrui wĭt mơ̆ng hdră hiu čhưn, tông čing čhar lu hĭn mkă hŏng gŏ sang kâo”.

Amâo djŏ knŏng gŏ sang pô mbruă Kră Jañ K’Mơ, lu mnuih ƀuôn sang K’ho tinei thâo mđĭ lar knhuah gru dhar kreh mơ̆ng djuê ana pô čiăng jak iêu phung tuê hiu čhưn ênguê. Êngao mkŏ mjing hdră mjĕ mjuk tông čing čhar, mnuih ƀuôn sang lŏ pơ̆k mñam, knă kpiê čeh, mkra lu mta mnơ̆ng ƀơ̆ng djuê ana kñăm bi lu jơr mnơ̆ng dhơ̆ng mkăp kơ klei čiăng mơ̆ng phung tuê hiu čhưn ênguê. Amai Dàgout Groel, ti wăl krah Lạc Dương brei thâo, grăp blư̆ mâo tuê hriê čhưn snăn gŏ sang amai mâo prăk mnga êbeh 2 êklăk prăk mơ̆ng bruă čhĭ kpiê čeh. Amai Dàgout Groel, hơ̆k kdơ̆k brei thâo:

 “Tơdah mâo mmông wăn hmei kreh knă kpiê čeh lehanăn điŏ brông mkăp kơ tuê hiu čhưn, kyua anei jing bruă mâo mơ̆ng đưm leh amâo dưi lui ôh… brei krơ̆ng kjăp lehanăn mđĭ lar. Hruê mâo lu êpul hriê čhưn snăn gŏ sang kâo mâo mơ̆ng 2 truh kơ 2,3 êklăk prăk, ƀiă tuê hmei jih kơ mnuih hiu čhưn krĭng djiêu gah amâo dah dŭm gŏ sang mâo klei čiăng, ăt mâo hrui wĭt mơ̆ng 1,5 truh kơ 2 êklăk prăk grăp hruê. 

Dŭm boh tŭ yuôm dhar kreh jăk siam mơ̆ng djuê ana pô, êpul êya mnuih K’ho ti wăl krah Lạc Dương thâo mđĭ kyar jing bruă hiu čhưn ênguê, đru mkra mđĭ klei hdĭp. Lơ Mu Ha Pier, K’iăng khua Anôk bruă mặt trận wăl krah Lạc Dương mñă klă: bruă ba dhar kreh čing čhar mkăp kơ tuê hiu čhưn amâo djŏ knŏng mđĭ hnư hrui wĭt ƀiădah lŏ đru kriê puoh knhuah dhar kreh čing čhar Lăn dap kngư:

 “Jing sa čô mnuih mâo k’hưm ti krĭng mnuih ƀuôn sang djuê ana ƀiă, kâo m’ak êdi hlăk ƀuh lu mnuih ƀuôn sang Lăn dap kngư thâo kriê pioh lehanăn mđĭ lar knhuah dhar kreh mơ̆ng aê aduôn êlâo msĕ si: čing čhar, pơ̆k mñam, knă kpiê… mkăp kơ phung tuê hiu čhưn ênguê hlăm ala čar lehanăn lu ala čar tar rŏng lăn tơdah hriê čhưn ti krĭng čư̆ Lang Biang anei dưi thâo kơ knhuah dhar kreh djuê ana hluê hŏng anăn srăng hưn mthâo knhuah dhar kreh mnuih djuê ana ƀiă tinei truh hŏng phung tuê djăp krĭng, kâo čang hmăng mnuih ƀuôn sang djuê ƀiă ti Lâm Đồng, hlăm anăn mâo mnuih djuê ƀiă ti gŭ čư̆ Lang Biang srăng lŏ kriê pioh lehanăn mđĭ lar knhuah jăk siam anei.

Ară anei, wăl krah Lạc Dương, kdriêk Lạc Dương, čar Lâm Đồng mâo 11 anôk mjĕ mjuk dhar kreh čing čhar mơ̆ng dŭm gŏ sang lehanăn 4 krĭng hiu čhưn ênguê. Grăp thŭn, bruă sang čư̆ êa lehanăn anôk bruă djŏ tuôm pŏk leh adŭ mtô tông čing čhar kñăm kriê pioh lehanăn mđĭ lar boh tŭ yuôm dhar kreh djuê ana. Mơ̆ng anăn, đru kơ mnuih ƀuôn sang mđĭ kyar bruă duh mkra hŏng hdră hiu čhưn ênguê. Thŭn êlâo, kluôm kdriêk Lạc Dương drông leh êbeh 2,5 êklăk čô tuê hiu čhưn ênguê. Hŏng hdră anei, klă sĭt hlăm êdei anăp, klei hdĭp mnuih K’ho ti gŭ jơ̆ng čư̆ Lang Biang, wăl krah Lạc Dương, kdriêk Lạc Dương srăng đĭ kyar hlăm grăp hruê hruê./.