Čiăng kơ djam mtam mkra mơ̆ng hdăm sao mâo klei jăk snăn bi mâo klei mprăp djăp ênŭm lehanăn hdră mkra mjing. Êlâo hĭn jing hiu duah hruh hdăm sao mâo boh, kreh mâo lu jing dŭm hruh ngă ti dlông adhan kyâo hlăm dliê, djiêo roh hma, thâodah ktue hnoh krông, êa hnoh, kñăm bi mâo mta hdăm doh pioh mkra lehanăn ƀơ̆ng jăk. Hŏng hruh hdăm mâo lu boh dưi yap anăn jing klei myun êdi anăp srăng mâo mnơ̆ng ƀơ̆ng jăk mơ̆ng mnâo mnañ hdăm sao. Wưng jăk hĭn hiu duah hruh hdăm sao, jing akŏ yan hjan, lehanăn leh ruĕ yan hrui êmiêt boh mnga.

Anak Êđê hlăm krĭng Bih hdĭp giăm hnoh krông mâo mnga djam tang kreh tŭk mkra djam msăm hŏng hdăm sao mâo mnâo ƀâo mngưi jăk snăk. Klei msăm bi hlai hŏng mta phĭ ƀ’ƀiă mơ̆ng djam tang bi lŭk mbĭt jing jăk êdi. Bi anak Êđê Adham kreh bi lŭk hdăm sao hŏng kan kêñ, kan kruah, amâodah tlê hŏng boh tei hŭng, jing mnơ̆ng ƀơ̆ng lu mnuih khăp êdi, tlê hdăm sao ngă amrêč hra pioh tak dŭm mta mnơ̆ng ăm, amâodah djam k’ŭl jăk snăk... Amai H’Djun Niê (kreh iêo jing Amĭ Tân), ti buôn Sah A, să Ea Tul, kdriêk Čư̆ Mgar, čar Dak Lak brei thâo, grăp krĭng wăl mâo hdră mkra mjing mdê mdê, ƀiădah dưi djă pioh nanao klei msăm jăk mơ̆ng hdăm sao.

 “Kan kêñ rao hĕ bi doh, lehanăn ba ăm dlông kpur hdăng mhưng bi ƀâo mngưi mdhư̆. Leh kơ anăn pleh mă kđeh kan, lui hĕ klang. Bi hdăm sao ƀhŭ hĕ hlăm mđiă bhiâo, leh kơ anăn đeh, amâo mâo dưm prăi ôh. Êdei tinăn bi lŭk hŏng kđeh kan kêñ. Hlăm mnơ̆ng ƀơ̆ng anei ñu mâo mnâo hăng mơ̆ng amrêč, mnâo hla êč êđê, hla boh kruĕ msăm, amrêč, êgil bil lŭk jih jang mâo mnâo jăk êdi. Anei jing sa mta mnơ̆ng ƀơ̆ng jing jăk snăk anak Êđê pô kreh mkra mơ̆ng đưm leh”.

          Êngao kơ klei msăm jăk mơ̆ng hdăm sao, mơ̆ng dŭm mta djam mtam mâo mkra hŏng hdăm, snăn boh tei hŭng tlê hŏng hdăm, amâodah dŭm mta mnơ̆ng ƀơ̆ng mkăn mkra hŏng hdăm sao bi tlê sơăi hŏng hla êgil, hla êč êđê, hla tiăng liăng amâodah tlê hŏng kan krô bŏ hŏng klei jăk êdi. Amai H’Đim Niê (kreh iêo jing Amĭ Linh) ti ƀuôn Ayun, să Ea Kueh, kdriêk Čư̆ Mgar, čar Dak Lak brei thâo, hra mkra mjing mơ̆ng hdăm sao amâo mâo dưi kƀah ôh tơdah mâo kđeh čĭm ŭn ƀhu krô dlông pra pui, amâodah kđeh čĭm êmô ƀhu sa mđiă. Hră mkra hŏng hdăm sao dưi huă hŏng êsei hlơr mang, amâodah djam k’ŭl, thâodah mkra djam lŭk, lehanăn pioh tak ƀơ̆ng d\m mta boh kroh msĕ si boh suai, boh kƀruôn, boh truôl...

 “Mkra hra hdăm sao, jing drei dưm hra, kpŭng bi ƀăt, mâo ƀiă plăng tlê mbĭt jih jang. Hdăm sao drei ƀhu krô, lŏ thiăm mâo ƀiă tiu čiăng bi ƀâo mngưi, kdlik tơdah drei tak ƀơ̆ng hŏng čĭm ƀhu krô. Tơdah ruah čiăng mâo hdăm sao pioh tlê hra amrêč snăn amâo mâo mă ôh hdăm sao mâo boh, kñăm čiăng mđĭ hĭn boh msăm mơ̆ng hdăm sao”.

          Djăp mta mnơ̆ng ƀơ̆ng mơ̆ng hdăm sao, jing amâo mâo dưi kƀah ôh hŏng phung tue hiu čhưn tơdah truh hŏng Lăn Dap kngư. Bi hŏng phung tue phŭn tal êlâo ƀuh mnơ̆ng ƀơ̆ng anei dôk bi hyưt ka hjŏng ƀơ̆ng. Ƀiădah leh lông ƀơ̆ng hĕ sa blư̆ hlŏng ñiêp amâo lŏ čiăng đuĕ. Dŭm mta mnơ̆ng ƀơ̆ng mkra mjing mơ̆ng hdăm sao khădah amâo mâo jing dleh ôh, ƀiădah ƀơ̆ng jăk snăk, mâo hlăm anăn mnâo mnañ mơ̆ng čư̆ dliê êa lă liă./.