Sut êa ală anak dôk đih ti sang êa drao, dlăng lăng ƀô̆ mta ñu bŏ hŏng anôk êka, kngan hnuă êka jih leh anăn khăt hĕ kđiêng kngan ana leh anăn sa bĕ kđiêng kngan, amai Trần Thị Thu Hằng ti să Tam Giang, kdriêk Krông Hnang, čar Dak Lak ăt ruă ai tiê êdi. Mâo phung aê mdrao ti sang êa drao prŏng Lăn Dap Kngư, anôk êka mâo leh klei hơĭt, ƀiădah klei truh kyua phao mơar mtuh hŏng anak ñu ăt jing klei hŭu hyưt hŏng amĭ.

“Leh mtuh mao mnuih ƀuôn sang ba ti sang êa drao, iêo đĭng blŭ kơ amĭ, mmông anăn kâo ăt huăt mtam. Aê mdrao tač kngan ĕ srăng khăt hĕ dua bĕ kđiêng kngan, êjai anăn hlăm ai tiê amĭ ruă mơai, amĭ kăn thâo si lŏ ngă čiăng hrô kơ anak.”

Amai Nông Thị Tiên, amĭ ĕ Trần Nhật Phong, ti să Đăk Gla, kdriêk Dak Mil, čar Dak Nông ăt mrâo găn klei kjăt msĕ sơnăn. Phung leh anăn găp čŏng mkra phao mơar, leh anăn ba wĭt kơ sang đŭng hĕ. Kyua put mtuh msah hĕ, ĕ dưm hăm gŏ khang leh anăn pŏk pui čuăng bi thu put, truh kơ klei mtuh prŏng.

“Kâo ăt thâo klei hŭi hyưt mơ̆ng phao mơar, kâo ăt bi mhŭi ñu lu sơnăk ƀiădah ñu amâo mâo hmư̆. Hruê ñu mâo klei truh, ƀuh ƀô̆ mta ñu kâo kjăt êdi, amâo mâo mĭn ôh anak pô kjham msĕ sơnăn.

Klei êka ti kngan leh anăn ƀô̆ mta dưi hlao hŏng hruê mmông, ƀiădah klei ruă hlăm ai tiê dleh sơnăk dưi luč. Hŏng phung hđeh, klei truh kyua mtuh phao mơar amâo djŏ knŏng klei pui ƀơ̆ng, ƀiădah ăt lŏ mâo dŭm klei kpĕ êka hlăm ai mĭn, hmăi truh kơ klei đĭ kyar leh anăn thâo ơ dŭm mta mnơ̆ng riêng gah. Ĕ Hoàng ăt dôk hlăm dŭm hruê mdrao ti sang êa drao, ƀuh klă leh klei arưp aram mơ̆ng phao mơar.

“ Kâo dlăng hlăm Tiktok leh anăn blei dŭm mta wĭt lŭk mbĭt. Kâo lŭk tal tlâo hlŏng mtuh myơh. Aê drao sut êa drao leh anăn tlŏ jing ruă êdi, kâo hƀlŏk êdi kyua klei hlăp phao mơar”.

Bi anei jing klei hưn mơ̆ng ĕ Phong êjai tŭ klei ruă êka mơ̆ng phao mơar ngă truh:

Ară anei kngan ruă leh anăn bŏk, lu kđuč ea, ƀô̆ ăt ruă mơh. Kâo hƀlŏk êdi kyua ka thâo klei klei arưp aram mơ̆ng put mtuh.

Aê mdrao Nguyễn Minh Trực, khua anôk mdrao klei êka sang êa drao prŏng Lăn Dap Kngư brei thâo, dŭm klei truh mơ̆ng phao mơar kreh mâo hlăm wưng yan mdei prŏng leh anăn tết, leh anăn hnơ̆ng phung êa êka jing lu sơnăk. Grăp thŭn anôk mdrao mâo hlăm brô 20 čô êka kyua hlăm phao mơar. Phung anei kreh êka kjham, mơ̆ng pui ƀơ̆ng kjham, tloh kngan truh kơ bum ală. Dŭm klei pui ƀơ̆ng kyua hoá chất čŏng mkra mjing ăt hŭi hyưt hĭn, kyuadah dưi ngă truh klei êka kjham truh kơ tiê boh la, čiăng ngă klei mbrư sui čiăng dŏng mdrao.

“Phao mơar mtuh msĕ si klei êka pui ƀơ̆ng kjham. Mâo phung truh kơ khăt hĕ kđiêng kngan, kngan amâo mâo lŏ msĕ hŏng êlâo, amâo mâo jăk asei mlei truh kơ jih klei hdĭp. Bi kơ gŏ sang, yang ƀuôn ăt srăng uêñ mĭn kơ phung hđeh, kyua dŭm kei kpĕ êka hŏng diñu jing ktrŏ êdi.

Klei truh tơl amâo djŏ knŏng klei yăl dliê mơ̆ng sa gŏ ang amâodah knŏng ti čar Dak Lak ƀiădah wăt kơ yang ƀuôn. Klei yăl dliê mơ̆ng phung tuôm hŏng lei truh, phung tŭ klei ruă êka, jing klei hưn brei răng ktang phĭt kơ bruă čiăng thâo săng kă leh anăn mâo dŭm hdră êlan gang mkhư̆, grăp čô čiăng mđĭ hĭn bruă klam răng mgang pô leh anăn gŏ sang mơ̆ng dŭm klei truh tơl amâo mâo čiăng./.