Êbeh sa hrue kăm hŏng anei leh ti sang Aê Diê Châu Sơn, să Čư̆ Êbur, ƀuôn prŏng Ƀuôn Ama Thuôt, mnuih ƀuôn sang mprăp bi msiam leh drông knăm noel. Jih jang bi mtluk mtlak mơak mñai. Mkŏ mkra pui mngač ƀlêč ƀlir, mkra mjing ƀăng boh tâo, đa mnuih mkra ƀăng jang kkuh mơak noel, hŏng klei jăk siam mkra hŏng hmlei, mƀlir mkra ƀăng boh tâo prŏng. Trần Trọng Khánh, khua alŭ mrô 2, să Čư̆  Êbur lač:

Grăp thŭn tui si klei bhiăn mưng leh hmei mkra ƀăng boh tâo, lehanăn kă mkra pui mngač blêč ƀlir bi msiam kơ yan noel, lehanăn klei anei hdơr knga bi mni kơ Aê Diê, lehanăn si srăng ngă čiăng mâo nanao klei thâo bi mguôp hlăm jih jang phung đăo, mbĭt hŏng jih jang mnuih hlăm djăp čar kwar”.

Dŭm hrue êgao, khădah kpăk hŏng bruă pĕ kphê, ƀiădah phung đăo katolik ti să Ea Tiêu, kdriêk Čư̆ Kuin, ăt hnêč mkra kă pui bi mngač hlăm sang pô lehanăn hlăm alŭ wăl phung đăo hŏng ana hngô Noel, Nguyễn Phước Thành, ti alŭ mrô 1, să Ea Tiêu, kdriêk Čư̆ Kuin brei thâo: “Mkă hŏng thŭn dih, snăn knăm noel thŭn anei ƀuh jing mơak hĭn, kyua ênoh ênil, lehanăn jih jang grăp boh sang mâo mprăp bi msiam sơăi. Mbĭg hŏng bruă mkra ƀăng boh tâo hlăm gŏ sang, hlăm alŭ, grăp kang êlan ktlah mpă mâo mkra sa boh ƀăng boh tâo. Snăn ƀuh mơak snăk”.

Ăt hlăm klei mơak drông noel amai Trần Thị Anh Thi, ti ƀuôn hgŭm Tân Thành, ƀuôn prŏng Buôn Ma Thuột brei thâo, anôk čhĭ mnơ̆ng bi msiam kơ kơ yan noel thŭn anei mâo lu mta, lu êa mil blêč blir, lu mnuih bi ruah yơh tui si pô čiăng:

Kâo mprăp Noel tui si klei hmei mưng ngă leh hlăm gŏ sang hmei đuič. Hlăm sang mâo leh djăp pui mngač ƀlêč ƀlir, truh yan noel hmei lŏ mă lehanăn mkra bi msiam, knŏng ya dŏ kƀah snăn lŏ nao blei. Thŭn anei čiăng kơ klei guh mngač êa prăk snăn lŏ nao blei mprăp êa prăk đuič”.

 Lê Thị Kim Anh, pô anôk čhĭ mnia ti êlan Lý Thường Kiệt, ƀuôn prŏng Ƀuôn Ama Thuôt brei thâo, yan Noel thŭn anei, mâo lu mta mnơ̆ng mkra siam ală dlăng, bi êdah klei mbruă jăk mơ̆ng grăp mta mnơ̆ng:

Thŭn anei mâo lu mnuih hriê blei mnơ̆ng mơ̆ng hnưm mtam, boh nik mơ̆ng dŭm boh sang čhĭ klei huă mnăm, anôk bruă, anôk čhĭ kphê mnăm, arăng dơ̆ng bi mprăp bi msiam anôk pô čhĭ, čiăng iêo jak tue hriê mŭt. Wưng anei knŏng mâo gŏ sang hrŏng ruah blei ana hngô, amâodah ƀăng boh tâo. Klei hdĭp mda đĭ kyar leh, snăn klei čiăng kơ mnơ̆ng ăt lu mta mơh bi msiam”.

Sa yan noel lŏ truh hlăm klei mơak hlak hŏng phung đăo hlăm čar Daklak, wir phă sa thŭn mrâo bŏ hŏng klei mơak lehanăn jăk yâo./.