K’iăng Khua knŭk kna Nguyễn Hòa Bình hơêč hmưi kơ dŭm êpul brua Đảng, Anôk dlăng bruă Đảng dua gưl leh anăn phung mă bruă mâo jao, ruah mdưm leh anăn đăo knang phung mă bruă srăng mđĭ lar jăk bruă klam, năng hŏng bruă mâo jao, mă bruă kơ mnuih ƀuôn sang, đru mkŏ mjing alŭ wăl đĭ kyar hŏng kluôm ala hlăm ênuk kpưn đĭ. K’iăng Khua knŭk kna Nguyễn Hòa Bình ăt mtă kơ phung knuă druh, phung mă bruă čar Lâm Đồng mrâo pral păn kjăp hlăm bruă knuă, pŏk ngă tŭ dưn bruă klam. Mtă kơ phung dưi mbha, jao bruă brei mđĭ lar ai tiê, bruă klam ngă bruă mtam.

Y Thanh Hà Niê Kdăm, Khua bruă Đảng čar Lâm Đồng, mơĭt klei lač jăk kơ Phŭn bruă kđi čar mâo leh klei đăo knang, ruah mdưm nao hgŭm hlăm Êpul khua bruă Đảng leh anăn jao bruă klam păn ngă Khua bruă Đảng čar. Khua bruă Đảng čar mrâo ti čar Lâm Đồng ƀuăn srăng mđĭ hĭn ai tiê bi mguôp hŏng dŭm êpul bruă Đảng, Êpul khua bruă Đảng čar mrâo leh anăn khua gĭt gai dŭm alŭ wăl leh bi mŭt mbĭt, čiăng ba čar mrâo đĭ kyar năng hŏng klei găl mâo, bi mâo djăp klei hmăng hmưi mơ̆ng Đảng, knŭk kna leh anăn mnuih ƀuôn sang.

Hluê anăn, čar srăng yua jih hnơ̆ng dŭm klei găl mâo, mâo wăl čư̆ dliê, krĭng dap leh anăn dŭm boh tŭ dưn dhar kreh mơ̆ng čar, čiăng mkŏ mjing hdră êlan mđĭ kyar bruă duh mkra ala ƀuôn wưng sui. Bi êdah klei đăo knang hŏng hdră bruă anei, Điểu Minh ti să Đức An, čar Lâm Đồng lač: “Hruê 1 mlan 7 jing sa čar mrâo, srăng mâo lu djuê ana hdĭp mda msĕ si Mnông, Yuăn, Êđê, Jarai, K’Ho leh anăn Nùng, Tày hŏng lu djuê ana mkăn. Bi kơ dhar kreh grăp djuê ana bi mdê mdê, msĕ si klei mmuñ ênhiang, čing čhar, knăm mơak ăt mâo mơh klei bi msĕ. Mjĕ êrô jih jang dŭm djuê ana ti čar Lâm Đồng čiăng kơ grăp čô thâo, wăt dŭm čar mkăn thâo kơ dhar kreh knhuah gru pô.