Hlăm klei bi tuôm hŏng Khua phŭn bruă hŏng tač êngao Lào Thongsavanh Phomvihane, dua tĭng bi tŭ ư lŏ dơ̆ng bi hgŭm kjăp, bi sa ai hlăm dŭm klei bi kƀĭn lu tĭng, boh nik hlăm ASEAN leh anăn klei bhiăn bi hgŭm krĭng Mekong; sa ai hŏng klei mĭn mbĭt mŏng ASEAN kơ dŭm hdră bruă ti krĭng wăl, hlăm anăn mâo bruă kơ Êa ksĭ Ngŏ.

Hlăm klei bi tuôm hŏng Khua phŭn bruă hŏng tač êngao Thái Lan Maris Sangiampongsa, K’iăng khua knŭk kna, Khua phŭn bruă hŏng tač êngao Bùi Thanh Sơn bi tŭ ư leh anăn bi mklă klei sa ai hŏng dŭm klei mĭn mbruă mkŏ hiu čhưn ênguê hlăm krĭng wăl ASEAN; mđĭ ktang klei mkŏ hlăm jar  ACMECS; mbĭt anăn mtă kơ Thái Lan lŏ dơ̆ng mjing klei găl kơ êpul êya mnuih Việt Nam ti Thái Lan. Hlăm klei bi tuôm hŏng phŭn bruă hŏng tač êngao leh anăn bi hgŭm lu ala čar Campuchia Prak Sokhonn, dua tĭng bi tŭ ư lŏ dơ̆ng bi hgŭm kjăp, ăt msĕ mơh mđĭ dŭm phŭn, dhar bruă mđĭ lar boh tŭ dưn dŭm klei bhiăn bi hgŭm dua nah ară anei mâo, mđĭ klei bi hgŭm kluôm hlăm jih jang bruă, hlăm anăn mđing bi trông êpul leh anăn bi tuôm gưl dlông, mkŏ anôk bruă nah gŭ, êlan klông, ƀăng jang knông lăn, mđĭ hĭn klei bi hgŭm mnia blei, mđĭ mjĕ êrô mnuih ƀuôn sang, pŏk mlar klei bi hgŭm hiu čhưn ênguê.