Mơ̆ng akŏ mlan 7/2025, Knơ̆ng bruă sang čư̆ êa să Ia Băng, čar Gia Lai pral mkŏ mjing klei bi kƀĭn mnuih ƀuôn sang, hâo hưn hdră êlan duh bi liê hdră ngă bruă, mđing hmư̆ klei mnuih ƀuôn sang čiăng. Leh anăn, mkŏ mjing leh êpul gơ̆ng tla hnô, mbĭt anăn bi hgŭm kjăp hŏng Anôk dlăng hdră duh bi liê mkŏ mjing čar leh anăn anôk bruă đru kčĕ hdră mnêč čiăng mprăp pơ̆ng gơ̆ng kdriêl lăn hlăm mlan 8/2025. Nguyễn Trường Sinh- Khua Knơ̆ng bruă sang čư̆ êa să brei thâo, hŏng bruă klam mrâo, să dưi hgŭm êlam hlăm bruă tla hnô, ruh mgaih anôk ala, đru kơ bruă knuă dưi msir mgaih pral hĭn:

 “Hdră êlan mơ̆ng Knơ̆ng bruă sang čư̆ êa čar hlue ngă snăn, hlue si kâo jing djŏ guôp. Hŏng dŭm ktuê êlan kma găn, hmei srăng pral hlăm bruă bi trông hŏng mnuih ƀuôn sang, ăt găl ênưih hĭn. Hlăm anăn, Knơ̆ng bruă sang čư̆ êa čar ăt mđing uêñ, gĭt gai dŭm anôk bruă kriê dlăng hdră ngă bruă leh anăn anôk bruă đru kčĕ jăk bi hgŭm hŏng să čiăng kơ hmei pŏk ngă kơ klei ruh mgaih anôk ala, tla hnô mkŏ mjing pral hĭn, djŏ guôp hĭn leh anăn dưi mjing klei sa ai hlăm mnuih ƀuôn sang lu hĭn.”

Bi ti să Mang Yang, anôk mâo 10,3km êlan dơ̆ng êran pral Quy Nhơn – Pleiku mĭn tĭng srăng găn, mâo êbeh 400 gŏ êsei mnuih ƀuôn sang hlăm boh klei brei hrui mă lăn, hlăm anăn hlăm brô 22 gŏ êsei mnuih ƀuôn sang brei lŏ duah anôk dôk mrâo. Võ Lê Xuân Thiện –  Khua Knơ̆ng bruă sang čư̆ êa să Mang Yang brei thâo, să hnưm mkŏ mjing êpul gơ̆ng tla hnô leh anăn anôk bruă kriê dlăng hdră ngă  bruă gưl să, bi hgŭm ksiêm dlăng, tĭng yap truh kơ hdră msir tla hnô.

 “Leh ngă bruă tla hnô, ruh mgaih anôk ala, hŏng 22 gŏ êsei brei lŏ mkr mjing anôk dôk mrâo, hmei mâo leh keh lăn čiăng dăp djŏ tui si hdră kčah. Anôk lăn giăm krĭng lăn êran pral, kyua anăn ăt srăng găl ênưih hlăm hdră pŏk hlue ngă.”

 Hdră mkra êlan dơ̆ng êran pral Quy Nhơn – Pleiku jing bruă mkra êlan klông phŭn ala čar, mâo boh dlông hlăm brô 125 km găn čar Gia Lai. Hdră mă bruă mâo ênoh duh bi liê êbeh 43.700 êklai prăk, mĭn tĭng rŭ mkra hlăm knhal jih thŭn 2025 leh anăn bi leh hlăm thŭn 2029. Ktuê êlan găn 17 să, ƀuôn hgŭm čar Gia Lai, hmăi kơ êbeh 3000 gŏ êsei mnuih ƀuôn sang ktuê êlan. Hlăm anăn, mâo dŭm êtuh gŏ êsei mnuih ƀuôn sang brei lŏ mkra mjing anôk dôk mrâo.

 Nguyễn Tự Công Hoàng –  K’iăng Khua Knơ̆ng bruă sang čư̆ êa čar Gia Lai bi klă, tla hnô ruh mgaih anôk ala jing bruă dleh dlan, brei pŏk ngă klă klơ̆ng, djŏ hŏng boh sĭt. Čar mprăp dăp leh ngăn prăk čiăng hlue ngă, mbĭt anăn gĭt gai ba yua klei bhiăn mdê hĭn, hrui wĭt anôk mă mnơ̆ng leh anăn anôk tuh djah, đru msir pral, jĕ giăm mnuih ƀuôn sang leh anăn djŏ guôp hŏng boh sĭt grăp alŭ wăl. Mơ̆ng anăn, bruă tla hnô, đru, lŏ mkŏ mjing anôk dôk ăt dưi pŏk ngă hlue si hdră mbruă, hlue si klei čiăng leh anăn klei mnuih ƀuôn sang čang hmăng sĭt.

“Bruă sang čư̆ êa alŭ wăl brei nao ksiêm dlăng, bi mklă: dŭm gŏ êsei brei lŏ mkra mrâo, dŭm boh msat brei lŏ ba anôk mkăn, ti anôk srăng ba, ya klei mnuih ƀuôn sang čiăng, ti anôk djŏ guôp snăn dăp ti anôk anăn yơh, brei mphŭn ngă mơ̆ng klei sĭt mơ̆ng mnuih ƀuôn sang čiăng. Leh bi tŭ ư snăn brei mkŏ mjing hdră kčah lŏ mkra mjing anôk dôk mrâo, ba hlăm klei hưn mdah ksiêm dlăng klei dưi hlue ngă mơ̆ng êlan dơ̆ng êran pral Quy Nhơn – Pleiku. Jih jang dŭm wăl anôk dôk mrâo brei dưi ba ngă kơh srăng mâo prăk bi liê čiăng hlue ngă. Kâo mtă bruă anei brei ngă pral, mjêč.”

 Bruă mjêč bi jăk kơ hdră ngă bruă brei ƀuh klei gĭr kđi čar mơ̆ng čar Gia Lai hlăm bruă pŏk ngă êlan dơ̆ng êran pral phŭn, mjing tur čiăng mkŏ, mđĭ kyar bruă duh mkra- ala ƀuôn alŭ wăl hlăm wưng kơ anăp.