Truh kơ ară anei, Dhar bruă ruah khua čar Dak Lak mdah leh Klei bhiăn mă bruă, Hdră kčah pŏk hdră ruah khua, Bi mklă mkŏ mjing dŭm êpul bruă: Bruă mnơ̆ng dhơ̆ng, bruă hâo hưn – mtô mblang, bruă răng mgang klei êđăp ênang lehanăn bruă mdrao mgŭn; Bruă msir mghaih klei kčŭt hưn; Đru bruă, Êpul bi kdơ̆ng pral; mkŏ mjing hla pŏk điện tử Dhar bruă ruah khua čar.

Anôk gĭt gai hdră ruah khua čar Dak Lak mkŏ mjing leh Klei bi kƀĭn pŏk hdră ruah khua hluê hdră klă anăp ti Anôk bruă Đảng čar lehanăn online ti 102 să, ƀuôn hgŭm hŏng êbeh 10.000 čô. Êpul gơ̆ng bruă ƀuôn sang čar mkŏ mjing hdră mjuăt bi hriăm hdră ruah khua kơ 48 să, ƀuôn hgŭm nah Ngŏ čar Dak Lak hŏng hlăm brô 400 čô bi ala. Dhar bruă Mặt trận čar mprăp mta phŭn lehanăn mkŏ mjing klei bi kƀĭn tal sa hruê 8/12.

100% să, ƀuôn hgŭm pral hưn mthâo dŭm mta phŭn djŏ tuôm kơ hdră ruah khua djŏ si klei kčah mtrŭn, tĭng srăng mkŏ dăp, hưn mthâo mnuih mgơ̆ng ruah ngă phung bi ala Êpul gơ̆ng bruă ƀuôn sang gưl să lehanăn mkŏ mjing Klei bi kƀĭn tal sa.

Hluê si Cao Thị Hoà An, Khua Êpul gơ̆ng bruă ƀuôn sang čar, Khua Dhar bruă ruah khua čar Dak Lak, wưng ară anei truh kơ hruê mkŏ mjing klei ruah khua mâo lu bruă, mtă kơ Dhar bruă brei ngă bruă kreh knhâo, đua klam. Čiăng hluê ngă jăk hdră ruah phung bi ala Anôk bruă kƀĭn ala gưl XVI lehanăn ruah phung bi ala Êpul gơ̆ng bruă ƀuôn sang dŭm gưl wưng thŭn 2026-2031, Cao Thị Hòa An mtă brei rơ̆ng wưng hluê ngă bruă:

“Rơ̆ng jih jang bruă dưi hluê ngă kjăp lehanăn djŏ wưng. Mtă kơ knơ̆ng bruă sang čư̆ êa čar hnưm ba mdah kơ Dhar bruă ruah khua čar bi mklă ênoh êpul ruah khua, Êpul gơ̆ng bruă ƀuôn sang čar lehanăn anăn êpul êya ruah khua, ênoh phung bi ala Êpul gơ̆ng bruă ƀuôn sang ti grăp êpul. Mđing mkŏ mjing Dhar bruă ruah phung bi ala anôk bruă kƀĭn ala ti grăp anôk ruah khua lehanăn Dhar bruă ruah phung bi ala Êpul gơ̆ng bruă ƀuôn sang čar gưl să êlâo kơ hruê 4/1, rơ̆ng djŏ hdră mtrŭn”./.