Hruê anei (1/12), Knăm mphŭn mkŏ mjing “Hdră bruă mjêč rŭ mdơ̆ng, mkŏ mkra pưk sang kơ mnuih ƀuôn sang krĭng êa lip” srăng hrăm mbĭt mkŏ mjing ti čar Dak Lak, alŭ wăl mrâo tŭ klei luč liê kjham kơ mnuih leh anăn ngăn drăp hlăm gưl êa lip mrâo êgao. Mĭn tĭng jing êbeh 680 boh sang dưi mkra mrâo. Mbĭt hŏng Dak Lak, Knăm mphŭn rŭ mkra hdră bruă mjêč mdơ̆ng sang đru kơ mnuih ƀuôn sang krĭng êa lip ăt mkŏ mjing ti čar Gia Lai, Khánh Hoà hŏng ênoh bi liê ƀiă êdĭ 170 êklăk/boh sang.

Knăm mphŭn rŭ mdơ̆ng dưi hlue ngă hlue si Hră mtrŭn mơ̆ng Khua knŭk kna Phạm Minh Chính kơ bruă pŏk ngă “Hdră bruă Quang Trung” mjêč lŏ mkŏ mjing, mkra pưk sang kơ gŏ sang tŭ klei luč liê kyua dŭm gưl yan adiê mrâo êgao ti dŭm čar kwar Dhŭng. Tuy An Bắc jing anôk Knơ̆ng bruă sang čư̆ êa čar Dak Lak bi hgŭm hŏng êpul lĭng kahan mkŏ mjing Knăm mphŭn pŏk ngă hdră bruă mjêč mkŏ mjing, mkra mđĭ pưk sang kơ mnuih ƀuôn sang tŭ klei êa lip lêč mrâo êgao. Knơ̆ng bruă sang čư̆ êa čar Dak Lak bi mklă mkŏ mjing mrâo 684 boh sang; mkra mđĭ êbeh 1.500 boh sang leh anăn mkŏ mjing 333 boh sang bi kƀĭn ƀuôn mguôp hŏng klei gang mkhư̆ êa lip lêč ti alŭ, ƀuôn hŏng ênoh bi liê jih jang hlăm brô 800 êklai prăk.