Mđing truh kơ 2 să hmăi kjham hĭn mơ̆ng klei adiê hjan êa lip lêč ngă mrâo êgao ti nah Ngŏ čar Dak Lak (čar Phú Yên hđăp), êpul knuă druh, mnuih mă bruă Sang mđung asăp blŭ Việt Nam ti krĭng Lăn dap kngư (VOV Lăn dap kngư) mbĭt hŏng phung đru ba jao leh braih kơ mnuih ƀuôn sang. 200 hnư mnơ̆ng, grăp hnư 10 kg braih, dưi ba mơĭt kơ 200 gŏ sang ti dua să Hoà Thịnh lehanăn Đồng Hòa – dŭm gŏ sang hmăi kjham hĭn.

Lê Hải Sơn, Khua knơ̆ng VOV Lăn dap kngư brei thâo, leh lu hruê hâo hưn kơ krĭng êa lip lêč ngă, ƀuh klă klei luič liê mơ̆ng mnuih ƀuôn sang, phung knuă druh – mnuih mă bruă hlăm anôk bruă đru mguôp leh mnơ̆ng, braih kơ mnuih ƀuôn sang. Dŭm hruê êgao, mâo klei đru mơ̆ng mnuih ƀuôn sang kluôm ala čar, klei hdĭp mnuih ƀuôn sang krĭng êa lip ngă hơĭt ƀiă leh, amâo lŏ êpa ôh. Khă snăn, lu hruê ƀơ̆ng ƀung hdang krô lehanăn êa ngač, grăp čô čang hmăng dưi huă êsei trei tian. Bruă ba jao braih gưl anei jing klei thâo bi đru, lŏ čuê knhuah gru jăk siam “Hla hmum luôm hla tĭ” mơ̆ng djuê ana Việt Nam.