Leh gưl êa lip lêč prŏng ktue hnoh krông Dă Nhim, Nguyễn Quốc Bảo, ti ƀuôn hgŭm Đơn Dương, Lâm Đồng, ăt ka jih mơh klei kjdăt kƀlă huĭ hyưt. Jih jang sang ală kĭng mâo 4.000m2 hŏng eneoh jih jang hlăm brô 1,6 êklai prăk mơ̆ng gŏ sang ñu êa tlưng jih. Ñu ksuh êwa lač:

“Dŭm ai tiê prăk kăk ktuh êyuh hlăm anei, snăn ară anei amâo lŏ mâo ôh prăk čiăng lŏ kơrŭ wĭt bruă knuă. Ară anei knŏng lŏ mbŏ lăn, luič liê snăk.”

Dŭm gŏ sang pla djam hlue hdră hđăp ktue hnoh krông Dă Nhim hlăk dôk lŏ bi kơrŭ bruă leh klei êa lip. Yua wăng kơ dơ̆ng klei jih sa aguah, lŏ ƀuh dŭm met đĭng êa, Hồ Việt Linh, ti alŭ Tân Lập 1, ƀuôn hgŭm Ka Đô, brei thâo, êbeh   6.000m2 djam salat gŏ sang ñu hlăk dơ̆ng man buč, êa ngă jih. Lăn čuah kdơr mâo anôk kpal truh met. Lŏ kơru bruă mâo anôk pla djam bŏ hŏng klei suăi êmăn, lehanăn luič liê lu prăk duh bi liê:

“Mâo anôk êa kur, mâo anôk êa kdơr, djah djâo mtŭk mtŭl. Ară anei lŏ dơ̆ng mă bruă ƀrư̆ ƀrư̆ yơh. Ya mta mnơng adôk knŏng lŏ yua dŏ anăn, dŏ jhat bi mlih mkăn. Ară anei bi mlih ƀek, bi mlih klei, lu mta yơh. Bi lăn ka dưi mă bruă ôh, knŏng dôk guôn bi mâo mđiă êlâo bi thu krô snăn kơh thâo mă bruă.”

Rai kơ plŭk kplăk anăn yơh boh blŭ mnuih ƀuôn sang hlăm krĭng pla djam ktue hnoh krông Dă Đa Nhim bi lač, dơ̆ng mơ̆ng dŭm boh ƀuôn hgŭm: D'Ran, Ka Đô, Đơn Dương, Quảng Lập hlăm čar Lâm Đồng. Mbĭt hŏng dŭm ênhă pla djam mtam hlăk hlăm yan hrui êmiêt, tuôm hĕ hŏng klei luič liê prŏng, boh nik hŏng phung pla mjing hŏng kdrăp mrâo mrang msĕ si sang ñuăl, sang ală kĭng, snăn klei duh bi liê kơ 1.000m2 đĭ truh kơ dŭm êtuh êklăk prăk.

Ti anăp klei luič liê prŏng mơ̆ng phung pla djam, bruă lŏ hma lehanăn bruă sang čư̆ êa dŭm boh ƀuôn hgŭm krĭng phŭn anôk pla djam mtam čar Lâm Đồng mâo ngă leh dŭm bruă mtrŭt mjhar bruă lŏ hma, brei mnuih ngă lŏ hma čan prăk lŏ kơrŭ wĭt bruă knuă. Trần Hùng Dũng, Khua knơ̆ng bruă sang čư̆ êa să Đơn Dương, čar Lâm Đồng, brei thâo:

“Tal êlâo hĭn, ƀuôn hgŭm mtrŭt mjhar mnuih ƀuôn sang lŏ mkra wĭt lăn ala anôk pla mjing, kyua hmăi amâo mâo jăk mơ̆ng klei êa lip, lehanăn srăng mkă tĭng ya mta mnơ̆ng srăng pla bi djŏ. Boh nik, pioh mâo mnơ̆ng čhĭ hlăm wưng Tết Nguyên đán bi hrŏng ruah yơh mnơ̆gn pla bi jăk, msĕ si djam mtam ƀiă hruê hmao čhĭ hlăm wưng Tết Nguyên đán. Bi kơ êdei anăp srăng lŏ mkra wĭt bi jăk hĭn mâo hdră kjăp, lehanăn srăng iêo jak klei bi đru pioh lŏ kơrŭ alŭ wăl pla mjing djam mtam ti ƀuôn hgŭm Đơn Dương”./.