Leh 30 thŭn yap mơ̆ng lŏ wĭt bi hgŭm leh anăn 25 thŭn pŏk ngă Klei kuôl kă BTA, bruă mnia blei dua nah đĭ kyar ktang kơ hnơ̆ng prŏng leh anăn hnơ̆ng jăk, jing sa boh kdrŭt yuôm bhăn mđĭ kyar bruă duh mkra, mjing bruă mă leh anăn  mđĭ klei bi hgŭm mkăp plah wah dua bruă duh mkra mâo klei bi đru. Ară anei Mi dôk mrô tal 11 hlăm ênoh dŭm ala čar bi liê ti Việt Nam hŏng 1.500 hdră bruă leh anăn ênoh prăk bi liê čih anăn êbeh 12 êklai USD.

Bi Việt Nam mâo 266 hdră bruă bi liê ti Mi hŏng ênoh bi liê giăm 1,4 êklai USD. Kơ bruă mnia blei thŭn 2025, ênoh prăk hrui wĭt mâo dêbeh 140 êklai USD, đĭ giăm 300 blư̆ mkă hŏng 30 thŭn êlâo. Hlăm klei bi kƀĭn, phung bi ala bi trông êlam kơ bruă mnia blei Việt Nam - Mi, kƀĭn kơ hdră êlan jia leh anăn hdră msir mgang bruă mbia blei, đru bi êlam klei thâo săng mbĭt, mđĭ klei bi hgŭm klă sĭt plah wah dŭm tĭng djŏ tuôm; mơ̆ng anăn pŏk mlar klei bi hgŭm leh anăn mđĭ tur knơ̆ng bi hgŭm bruă duh mkra mnia blei Việt Nam- Mi đĭ kyar hơĭtt kjăp leh anăn hdơ̆ng mâo klei tŭ dưn hlăm wưng kơ anăp.