Ruh mgaih lu klei kpăk hlăm klei kiă kriê, mkŏ mjing tur knơ̆ng hdră bhiăn kơ mđĭ kyar lăn čar
Thứ năm, 09:52, 11/12/2025
Pô mblang: Y -Ƀel Êban
Pô mblang: Y -Ƀel Êban
VOV.Êđê - Hruê mbruê 11/12, êlâo kơ bi ruê̆ klei kƀĭn tal 10, Bruă Kbĭn ala bi klă lu hdră mtrŭn yuôm bhăn msĕ si: Hdră bhiăn kluh rai (mkra mlih), Hdră bhiăn duh bi liê (mkra mlih), Hdră bhiăn djă pioh gưl ala čar, Hdră bhiăn bi mlih mrô leh anăn đa đa hdră êlan duh bi liê dŭm hdră ala čar kñăm.
Anei jing klei kƀĭn knhal tuč wưng păn Bruă Kbĭn ala gưl 15. Gưl kƀĭn tal anei ngă leh lu mta bruă, ruh mgaih lu klei kpăk kơ klei kiă kriê, mkŏ mjing tur knơ̆ng mđĭ kyar wưng thŭn 2025 - 2030. Anăn jing klei bi klă mơ̆ng lu phung bi ala nah êngao anôk bruă Bruă Kbĭn ala.
Hlăm wưng hlăm lăn čar leh anăn tar rŏng lăn mâo lu klei bi mlih, Bruă Kbĭn ala bi êdah leh klei jhŏng, rơ̆ng leh anăn bi klă bruă klam bi kluôm klei kiă kriê hŏng mta kñăm mkŏ mjing čiăng đĭ kyar, amâo mâo mdei mđĭ hnơ̆ng bruă ktuê dlăng čiăng mâo dŭm klei bi klă mâo knhuah hdră êlan hŏng klei đĭ kyar lăn čar. Gưl kƀĭn mkŏ mjing leh hdră bhiăn tur knơ̆ng đru kơ Knŭk kna wưng kpơ anăp mâo klei găl hĭn hlăm bruă hluê ngă mta kñăm đĭ kyar lăn čar.
Viết bình luận