Tui si klei hâo mdah ti anôk bi kƀĭn, thŭn 2025, bruă răng mgang lăn čar, bruă lĭng kahan alŭ wăl mâo leh dŭm gưl dhar bruă lehanăn êpuul lĭng kahan hlăm čar mâo ngă leh jăk, lu bruă dưi lŏ bi kjăp, mâo klei thâo bi hgŭm, mdrơ̆ng hŏng djăp mta klei amâo mâo jăk truh. Msĕ si hlăm gưl angĭn êbŭ mrô 13 lehanăn klei êa lip prŏng leh êgao, lĭng kahan čar Daklak pral nao đru mbĕ mđuĕ mnuih ƀuôn sang, đru dŏng, mghaih msir boh mơ̆ng klei êa lip, mâo leh ai tiê jăk siam hŏng mnuih ƀuôn sang.

Khă snăn, bruă mghaih msir boh mơ̆ng klei êa lip mâo hlăm dŭm boh ƀuôn hgŭm adôk mtŭk mtŭl, klei kăp kčĕ bruă ăt adôk ka bi knar. Mă mơ̆ng anăn, čar Daklak mtă kơ dŭm alŭ wăl lehanăn êpul lĭng kahan ngă bi jih, bi leh dŭm klei awăt kƀah hlăm bruă mghaih msir boh mơ̆ng klei truh tưl leh êgao, boh nik lĭng kahan hlăm alŭ wăl nah gŭ. Mñă kơ klei anei, Đào Mỹ, K’iăng khua knơ̆ng bruă sang čư̆ êa čar Daklak lač: “Hlăm wưng ti êgao, angĭn êbŭ mrô 13 lehanăn klei êa lip lêč mrâo êgao mâo djăp klei găl čiăng tĭng dlăng klei thâo dưi mdrơ̆ng mơ̆ng Anôk gĭt gai hdră gang mkhư̆ sowil mơ̆ng dŭm gưl. Kâo mtă kơ dŭm anôk bruă Lĭng kahan gĭt gai, ksiêm dlăng, đru kơ Dhar bruă mâo klei gĭt gai êlam hĭn, thiăm mbŏ êpul djŏ guôp lehanăn blei mprăp ênŭm kdrăp mnơ̆ng, si srăng mprăp kơ hdră anei. Amâo mâo klei ba mdah klă klơ̆ng snăn Dhar bruă čar amâo dưi mkŏ mkra krĭng răng mgang sowil kjăp ti gưl nah gŭ.

Thŭn 2026, Dak Lak mâo mta kñăm lŏ dơ̆ng mtrŭt mđĭ hdră mjuăt bi hriăm bruă lĭng kahan – răng mgang klei êđăp ênang, bi leh dŭm klei čuăl mkă mguôp hŏng hdră duh mkra – ala ƀuôn hŏng bruă lĭng kahan, mprăp jăk krĭng bi hriăm hdră răng mgang, mđĭ hdră mtrŭn duh bi liê kơ bruă lĭng kahan, mkŏ mjing êpul kahan djăp ktang ti alŭ wăl, mkăp djŏ hŏng dŭm boh klei čiăng mjêč./.