Ti čar Dak Lak mâo 639 boh sang klưh rai kluôm srăng rŭ mdơ̆ng mrâo, 880 sang jhat rai kjham leh anăn 5.240 sang rai man dưn, kpŏk đuĕ čuôr čiăng mkra mlih. Truh kơ ară anei, Dak Lak dưi rŭ mdơ̆ng mrâo 176 boh sang, mĭn tĭng hlăm hruê kăm anei srăng lŏ dơ̆ng rŭ mdơ̆ng 450 boh sang leh anăn hlăm brô 233 boh hlăm hruê kăm kơ anăp. Bi bruă mkra mđĭ sang rai ƀiă dưi ngă leh, bi hŏng klei mkra mđĭ prŏng, hlăm brô 70% dôk hlăm wưng bi leh, ênoh adôk - lu jing gŏ sang hjanw păn - srăng mâo êpul kahan ksiêm, lĭng kahan, kahan alŭ wăl 5, rơ̆ng bi leh êlâo kơ hruê 31/12.

Tạ Anh Tuấn, Khua Bruă sang čư̆ êa čar Dak Lak brei thâo, ênoh kơ mjêč rŭ mdơ̆ng leh anăn mkra mđĭ sang, čar dôk mghaih msir 47 klei brei nao dôk ti anôk dôk mrâo hlăm krĭng lăn klưh hrŏh. Anei jing êpul êmưt  hĭn mkă hŏng anôk ala mbĭt ƀiădah ăt adôk hlăm hdră êlan bi leh hluê si klei gĭt gai mơ̆ng Khua Knŭk kna. Čar mdưm dua wơng ksiêm dlăng mâo, êlâo kơ hruê 31/12/2025 leh anăn êlâo kơ hruê 31/1/2026. Čiăng hluê ngă hdră mbĭt, čar tiŏ nao êbeh 200 êklai prăk mơ̆ng phung đru mguôp kơ bruă rŭ mdơ̆ng mrâo leh anăn mkra mđĭ sang kơ mnuih ƀuôn sang. Mbĭt hŏng anăn, Dak Lak mtrŭt mjhar hdră rŭ mdơ̆ng hlăm brô 330 sang bi kƀĭn yan ƀuôn bi mguôp hŏng anôk đuĕ kơ êa lêč, hŏng ênoh prăk hlăm brô 600 êklai. Čar akâo kơ Knŭk kna  đru 500 êklai prăk, bi adôk srăng lŏ dơ̆ng iêo mkrum mơ̆ng dŭm knơ̆ng bruă leh anăn dŭm êpul bruă, phung mâo ai tiê kmah. Tạ Anh Tuấn brei thâo: “Êpul khua bruă Đảng čar bi kƀĭn brei klei blŭ mguôp leh anăn mbha bruă klam kơ grăp čô hlăm Êpul khua bruă Đảng, phung khua gĭt gai grăp alŭ wăl hlăm bruă rŭ mdơ̆ng sang mrâo, mkra mđĭ sang. Êpul bruă kahan ksiêm, lĭng kahan leh anăn kahan alŭ wăl 5 ăt dôk đru kơ čar ngă bruă rŭ mdơ̆ng sang mrâo./.