Blŭ pŏk klei bi kƀĭn, Lưu Văn Trung, Khua êpul gơ̆ng bruă ƀuôn sang čar Lâm Đồng, bi klă, găn leh lu klei dleh dlan, klei lông dlăng thŭn 2025 klei duh mkra čar Lâm Đồng lŏ dơ̆ng mâo klei đĭ kyar jăk hŏng 16/19 ênoh čuăn, lehanăn kdlưn hĭn hŏng hdră kčah, mâo ba wĭt ngăn prăk kơ knŭk kna êbeh 31.200 êklai prăk đĭ 11% hdră kčah mơ̆ng alŭ wăl jao, lehanăn đĭ hĭn 17% mkă hŏng hdră mơ̆ng gưl dlông jao, bruă lŏ hma ăt jing pô phŭn đua klam bruă duh mkra kơ čar mâo êbeh 107.000ha lăn lŏ hma mă bruă hŏng kdrăp mrâo mrang, lehanăn giăm 150.000ha anôk pla mjing doh; dŭm pui kmlă bi êran hŏng pil yang hrue, bruă mă bô xít alumin lŏ dơ̆ng đru mguôp yuôm bhăn hlăm klei đĭ kyar kluôm...

Ti anôk bi kƀĭn tal 7, Êpul gơ̆ng bruă ƀuôn sang čar Lâm Đồng gưl 10 mđing trông čhai bi mkă truh 32 klei hâo mdah, lehanăn 21 klei čih mkra hdră mtrŭn, hlăm anăn mâo lu hdră mtrŭn jing kơ hdră êlan kluôm, sui thŭn.

Ti ƀuôn hgŭm Pleiku, Klei bi kƀĭn tal 5 Êpul gơ̆ng bruă ƀuôn sang čar Gia Lai gưl XII, êmuh kơ hdră mdrơ̆ng hŏng klei adiê hjan êa lip, kriê dlăng boh klei, hdră msir kñăm rơ̆ng klei êđăp ênang hlăk klei yan adiê ngă ƀrư̆ hruê mâo dleh dưi ksiêm dlăng, mâo leh klei mđing dlăng mơ̆ng lu mnuih ƀuôn sang. Wĭt lač klei êmuh, Cao Thanh Thương – Khua knơ̆ng bruă Lŏ hma – wăl hdĭp mda Gia Lai – mñă klă amâo mâo klei pŏk êa ti krông Hà Thanh.

Krĭng anei amâo mâo ênao mgơ̆ng êa; dua ênao mgơ̆ng êa prŏng dôk ti nah Ngŏ čar jing Núi Một lehanăn Định Bình hlăm gưl êa lip lêč mrâo êgao bŏ êa lehanăn bruă pŏk êa knŏng hmăi truh kơ krông Côn. Cao Thanh Thương ăt hưn mdah klei gun kpăk hlăm bruă anei jing klei ksĭng mmiă lăn ktuê hnoh krông, guê gang êa Hà Thanh mčah dŭm pluh met kyua êa êtăng lehanăn klei ngă soh êlan guê gang êa. Kơ hdră êlan wưng sui, dŭm alŭ wăl srăng mâo hdră mbĕ mnuih ƀuôn sang nao kơ anôk êđăp ênang./.