Hruê 4/8, ti Hà Nội,Khua gĭt gai Đảng Tô Lâm nao lehanăn blŭ hrăm ti anôk bi tuôm hŏng dŭm gru mngač êdah kdlưn hlăm êpul kahan ksiêm yang ƀuôn nao ti Klei kƀĭn bi lông ktưn “Kyua hdră răng mgang klei êđăp ênang Ala čar” tal IX. Khua gĭt gai Đảng bi êdah klei mgei ai tiê ti anăp klei săn asei, ruă êka hlăm klei mă bruă, phung knuă druh, lĭng kahan duh myơr jih klei hdĭp hlăm hdră bi kdơ̆ng hŏng phung ngă soh, phung yua matuĭ hŏng lu klei huĭ hyưt, phung knuă druh, lĭng kahan ba anăp nao mă bruă ti krĭng knông lăn, krĭng taih kbưi, phung lĭng kahan amâo uêñ kơ klei dleh dlan, klei pui ƀơ̆ng, êa kluh čiăng đru dŏng hdĭp mnuih mâo klei truh, phung lui phă tluôn klei yâo mơak mơ̆ng pô čiăng nao ngă bruă klam, răng mgang klei hdĭp hơĭt ênang kơ mnuih ƀuôn sang;...

Khua gĭt gai Đảng Tô Lâm mtă brei lŏ pŏk ngă tŭ dưn hdră jih jang mnuih ƀuôn sang răng mgang klei êđăp ênang ala čar, bi mni lehanăn mđĭ lar gru hmô êdah kdlưn, gru mngač mnuih jăk, bruă jăk, krŭ wĭt klei ktưn hưn, mđĭ lar knhuah gru Pô mă bruă Cách mạng Jhŏng ktang, mjing boh kdrŭt đru kơ phung knuă druh, lĭng kahan amâo mdei mjuăt bi hriăm, gĭr hluê ngă tŭ dưn bruă klam răng mgang klei êđăp ênang ala čar, mkŏ mjing êpul kahan ksiêm yang ƀuôn klă sĭt kpă ênuah, jhŏng ktang, knhâo, knhăk, mrâo mrang, đru mguôp mkŏ mkra lehanăn răng mgang Ala čar hlăm wưng mrâo. Ƀri gưl anei, Khua gĭt gai Đảng Tô Lâm lehanăn Khua phŭn bruă kahan ksiêm Lương Tam Quang mđup brei leh mnơ̆ng kơ dŭm gru mngač êdah êdi hlăm êpul kahan ksiêm yang ƀuôn lehanăn êpul răng mgang klei êđăp ênang ti gưl nah gŭ./.