Tui si anôk bruă kiă kriê klei duh bi liê bruă rŭ mdơ̆ng čar Đồng Nai, kdrêč bruă tal 1 êlan dơ̆ng pral Biên Hòa - Vũng Tàu wưng mkra tal êlâo mâo boh taih 16km. Hŏng ênoh bi liê jih jang êbeh 6.012 êklai prăk mơ̆ng ngăn prăk knŭk kna. Truh kơ ară anei kdrêč bruă tal 1 mâo ngă êbeh 46%. Bruă mkra êlan mâo mkra mjing mơ̆ng thŭn  2022, tĭng srăng bi leh hlăm thŭn 2025, dưi ba yua jih jang êlan hlăm thŭn 2026.

Truh kơ ară anei bruă ruh mgaih anôk ala mâo bi leh, hlăm klei dôk mă bruă mâo leh truh 35 mta bruă dôk kñăm hŏng êbeh 400 boh êdah êdâo djăp mta, lehanăn 440 čô mnuih mă bruă. Ti anôk ksiêm dlăng, Hồ Đức Phớc mñă, dŭm êpul êya djŏ tuôm, pô kiă kriê bruă knuă mđing tiŏ nao jih jang êdeh êdâo, mă bruă hrue mlam čiăng pral bi leh jih jang bruă adôk tui si klei ƀuăn êlâo kơ hrue 19/12/2025.