Hlăm klei nao čhưn gưl ala čar truh kơ ară ala čar Êjip, aguah mbrue 4/8 (hlue mmông alŭ wăl), Khua lăn čar Lương Cường lehanăn êpul khua prŏng lăn čar Việt Nam nao čuă lehanăn blŭ hrăm ti anôk bruă Êpul hgŭm Arab ti ƀuôn prŏng phŭn Cairo hŏng akŏ “Pŏk sa hdră mrâo hlăm klei hgŭm mbĭt, lehanăn hgŭm bruă plah wah Việt Nam lehanăn dŭm ala čar Ả-rập kyua klei êđăp ênang, hgŭm mbĭt lehanăn mđĭ kyar”. Êpul hgŭm Arab jing sa êpul bruă mơ̆ng dŭm ala čar Arab ti alŭ wăl Afrĭk, lehanăn kjhôč  Arab, mâo mkŏ mjing leh mơ̆ng hlăk thŭn 1945. Ară anei, Êpul hgŭm Arab mâo 22 boh ala čar mŭt hlăm êpul hgŭm.

Mlan 7/2023, Việt Nam lehanăn Êpul hgŭm Arab mkŏ mjing leh klei bhiăn bi hgŭm mbĭt. Blŭ hrăm tinei, Khua lăn čar Lương Cường mñă:  Việt Nam čang hmăng srăng dưi mjing sa hdră mrâo hlăm klei bi hgŭm lu mta plah wah Việt Nam hŏng dŭm ala čar Arab ayŏng adei kyua klei êđăp ênang, hgŭm mbĭt lehanăn mđĭ kyar. Lŏ ksiêm wĭt dŭm boh tŭ dưn leh mâo mơ̆ng Việt Nam hlăm giăm 40 thŭn mlih mrâo, Khua lăn čar ăt kah mbha klei leh mưng mơ̆ng pô. Ară anei Đảng, Knŭk kna   Việt Nam bi êdah leh dŭm hdră mrâo, ktưn čiăng truh thŭn 2045 atăt Việt Nam jing ala čar đĭ kyar, mâo ênoh hrui wĭt prŏng. Khua lăn čar bi mklă Việt Nam mâo nanao klei bi mpŭ, kriê pioh, lehanăn pưng myưng ai tiê klei thâo bi mguôp hŏng jih jang 22 ala čar hlăm êpul hgŭm Arab, hŏng lu bruă bi hgŭm klă sĭt lehanăn mâo klei tŭ dưn. Khua lăn čar ăt čang hmăng dua nah lŏ bi hgŭm lu hĭn hlăm dŭm anôk bi trông lu tĭng, alŭ wăl lehanăn hŏng tar rŏng lăn, mđrăm mbĭt kyua klei êđăp ênang kjăp hlăm alŭ wăl, đru rŭ mdơ̆ng tar rŏng lăn jăk siam hĭn, bŏ hŏng klei khăp, năng hdĭp hĭn./.