Y-Doăn Niê, ti ƀuôn A Lê A, ƀuôn hgŭm Êa Kao lač kơ klei mkŏ VNeID hlăm đĭng blŭ thâo mĭn pô, mâo ngă dua thŭn hŏng anei leh, lehanăn mâo mđĭ truh ti hnơ̆ng mrô 2. Mrâo anei, leh ƀuôn hgŭm mâo bi mŭt mbĭt, hdră hriăm bi mbŏ klei thâo kơ bruă mrô mâo ngă leh hlăm alŭ wăl, ñu mâo klei ktrâo atăt bruă ngă hră mơar hŏng đĭng blŭ, lehanăn ñu čŏng ngă passport kơ anak êkei amra nao mă bruă ti Dhŭng Korea hlăm knhal jih thŭn anei.

 “Mprăp djăp ênŭm hră mơar, kâo tui ngă djŏ hŏng klei knuă druh ktrâo atăt êlâo anăn hlăm bruă mŭt ti mbah anôk ngă hră mơar mơ̆ng Phŭn bruă kahan ksiêm, leh kơ anăn mŭt hlăm akkhao anôk ngă hră mơar lăn car, lehanăn pŏk akkhao. Mơ̆ng anăn mŭt hlăm anôk ngă hră mơar passport čih hĕ ênŭm ênap hlăm anăn klei čiăng čih kơ anak pô hlăm hră mơar online. Leh djăp ênŭm snăn gư̆ ti anôk tĭng tla hŏng akkhao, lehanăn bi wĭt passport ti sang. Leh bi tĭng tla dôk guôn hlăm brô 15 hrue êdei.”

Leh 3 hrue kăm mă bruă, klei bi hriăm mbŏ bruă mrô hlăk pŏk mlar hŏng klei jăk ti Daklak. Hlăm lu ƀuôn hgŭm mâo mkŏ mjing leh êpul kăp kčĕ kơ bruă mrô hlăm ƀuôn sang, hŏng mnuih mă bruă tinăn mâo djăp klei thâo jing phung kăp đru mnuih ƀuôn sang. Y-Păm Byă, Khua êpul kăp kčĕ đru kơ kdrăp mrô ti ƀuôn H’ra Ea H’ning, ƀuôn hgŭm Dray Bhăng, čar Daklak brei thâo, leh klei mjuăt bi hriăm mnuih ƀuôn sang dưi ngă hră mơar hŏng online jih jang hră mơar msĕ si kơ hră lăn, hră gŏ sang, hdră ênua mdrao mgŭn.

 “Kâo wĭt kơ ƀuôn srăng jak iêo pô bi ala mơ̆ng 430 gŏ sang truh kơ sang bi kƀĭn ƀuôn čiăng ktrâo atăt klei djă yua kdrăp mrâo, čiăng kơ digơ̆ thâo hlăm klei nao ngă hră mơar. Lehanăn digơ̆ lŏ jing mnuih lŏ dơ̆ng ktrâo brei kơ jih jang mnuih hlăm sang thâo hlăm klei ngă hră mơar snăn. Mơ̆ng anăn, knư̆ hrue knư̆ mâo lu mnuih ƀuôn sang pô thâo leh hlăm hdră ngă hră mơar hŏng online, lehanăn  phần mềm VNeID.

Čar Daklak bi klă bruă hŏng kdrăp mrô jing atur pioh mkŏ mjing bruă sang čư̆ êa khuăt, tŭ dưn. Kyuanăn, klei kơ bruă mrô hlăk dôk bi čung atăt truh hŏng jih jang ƀuôn sang. Leh kơ anăn, hdră bi hriăm mbŏ klei kơ kdrăp mrô mâo ngă lu hĭn čiăng kơ mnuih ƀuôn sang thâo yua raih kdrăp mrô.

Nghiêm Văn Chuẩn – Khua bruă Đảng ƀuôn hgŭm Drai Bhăng (čar Daklak) brei thâo, ƀuôn hgŭm mâo mkŏ mjing leh truh 24 êpul kăp kčĕ đru hlăm kdrăp mrô ti ƀuôn sang, hlăm 24 boh ƀuôn. Mta kñăm klă mngač jing hlăm mlan 8 anei, hlăm êbeh 9.700 gŏ sang hlăm ƀuôn hgŭm, grăp gŏ sang mâo sơăi ƀiă êdi sa čô mnuih thâo raih klei djă yua VNeID lehanăn thâo ba yua jih jang bruă ngă hră mơar mơ̆ng anăn. Truh jih thŭn 2025, srăng dưi ngă hră mơar hŏng online sơăi.

 “Êpul ngă bruă kdrăp mrô hlăm ƀuôn sang mâo hmei bi hriăm hŏng klei ƀhĭ klă, lehanăn mprăp ai tiê truh hŏng grăp boh sang đru ktrâo atăt klei yua bi raih hdră ngă hră mơar hlăm êlan hla pŏk mơ̆ng đĭng blŭ. Čang hmăng jing grăp čô mnuih bi ala mơ̆ng gŏ sang dưi păn kjăp truh knhal jih thŭn 2025 srăng mâo êbeh 90% gŏ sang thâo kjăp bruă ngă hră mơar hlăm hla pŏk.”

Khădah mrâo ngă bruă ka jăk sui ôh, hdră bi hriăm mbŏ kơ bruă kdrăp mrô hlăk dơ̆ng ênŭm leh ti dŭm boh ƀuôn hlăm čar Daklak.Klei thâo ba yua kdrăp mrô hlăm mnuih ƀuôn sang dưi lŏ mđĭ hĭn, đru leh mnuih ƀuôn sang pral hlăm klei nao ngă hră mơar hŏng mbah online, mơ̆ng anăn mjing leh klei jăk găl kơ bruă sang čư̆ êa dưi mă bruă hŏng klei khuăt, tŭ dưn. Klei bi sa ai, klei thâo gĭr lehanăn klei ktrâo atăt ênŭm djă ti kngan ktrâo ti bruă mơ̆ng êpul kdrăp đru kčĕ kơ kdrăp mrô hlăm ƀuôn sang pŏk leh sa klei čang hmăng mjing kdrông kjăp plah wah bruă kdrăp mrô, bruă sang čư̆ êa lehanăn mnuih ƀuôn sang./.