Mmăt (04/08), ti Anôk bruă Knŭk kna, Khua knŭk kna Phạm Minh Chính gĭt gai leh Klei bi kƀĭn tal 1 mơ̆ng Anôk bruă gĭt gai mơ̆ng ala čar pŏk ngă Hdră mtrŭn mrô 68 mơ̆ng Phŭn bruă kđi čar kơ hdră mđĭ kyar bruă duh mkra êngao knŭk kna. Leh 3 mlan ba mdah Hdră mtrŭn mrô 68, mâo leh klei bi mlih jăk siam, bi mlih hlăm klei thâo săng mơ̆ng kluôm ala ƀuôn, mơ̆ng Gưl dlông truh kơ alŭ wăl, dŭm êpul, mnuih ƀuôn sang, anôk bruă duh mkra, gŏ sang mă bruă mnia mblei. Hdră mphŭn čô̆ kơ bruă đĭ pral. Mlan 6/2025 jing gru kruăk hƀuê ênuk hlăk ênoh anôk bruă duh mkra mrâo mkŏ mjing mâo êbeh 24 êbâo anôk bruă. Mlan 7, kluôm ala mâo êbeh 61 êbâo gŏ sang mă bruă mnia mblei mrâo mkŏ mjing, đĭ dua blư̆ mkă hŏng wưng anei thŭn êlâo.

Ti anôk bi kbĭn, Khua knŭk kna Phạm Minh Chính mñă, bruă hluê ngă dŭm mta kñăm hlăm Hdră mtrŭn mŏng Phŭn bruă kđi čar, Anôk bruă kƀĭn ala, Knŭk kna lehanăn klei čiăng mŏng dŭm anôk bruă duh mkra, anăn jing ba anôk bruă duh mkra êngao knŭk kna jing boh kdrŭt prŏng hlăm hdră mđĭ kyar bruă duh mkra ala čar. Khua knŭk kna mtă brei mđing msir mghaih klei gun kpăk čiăng kơ anôk bruă duh mkra dưi dưn yua jih klei găl mâo, mnơ̆ng yuôm čŏng mâo, mjuăt bi hriăm mnuih mă bruă, kdrăp mrâo, bi mlih mrô… Lŏ dơ̆ng hluê ngă hdră bi mlih anôk bruă, mtrŭt mđĭ hdră kah mbha gưl kơ alŭ wăl. Khua knŭk kna ăt mtă kơ dŭm alŭ wăl thiăm mbŏ, čuăl mkă hdră mjing dŭm hdră bruă mrâo, mâo hdră đru kơ anôk bruă duh mkra điêt lehanăn man dưn kơ anôk bruă nah gŭ msĕ si pui kmlă, jia lăn, prăk tăk…Mđĭ klei mđing hmư̆ čiăng čih mkra klei bhiăn, hdră mtrŭn đru kơ mnuih ƀuôpn sang, anôk bruă duh mkra mnia mblei, gŏ sang mă bruă mnia mblei./.