Čhuang hlăm wưng păn bruă 2025 - 2030, bruă Đảng knơ̆ng bruă sang čư̆ êa čar Daklak mâo ênoh kčah klei đĭ kyar hlăm kluôm čar kah knar mơ̆ng 11,5%/thŭn kơ dlông, ênoh hrui wĭt kah knar grăp čô mnuih jing 160 êklăk prăk/thŭn; ênoh mâo bi mnia mblei hŏng ala tač êngao êbeh 13 êklai USD; iêo jak mâo truh 43 êklăk gưl čô tue hriê čhưn hŏng ênoh mâo ba wĭt hlăm brô 97.150 êklai prăk, bi hrŏ ênoh gŏ sang ƀun kah knar jing 2%/thŭn, hjăn hlăm krĭng mnuih djuê ƀiă hrŏ 3%/thŭn.

Boh nik jing mđĭ kyar 4 mta kmah gơ̆ng mâo bruă tuh tia, bruă lŏ hma kdrăp mrâo, bruă hiu čhưn ênguê lehanăn bruă duh mkra wăl êa ksĭ, nao mđrĭng hŏng klei mđĭ kyar anôk duh bi liê, mtrŭt mđĭ bruă kreh knhâo, mlih mrâo hŏng klei knhêč, bi mlih mrô lehanăn mjuăt bi hriăm mnuih mă bruă knhâo. Blŭ hrăm ti anôk bi kƀĭn prŏng, Khua bruă Đảng čar Daklak Nguyễn Đình Trung lač, klei  bi kƀĭn prŏng tal anei amâo mâo djŏ knŏng ksiêm wĭt boh tŭ dưn hlăm wưng leh êgao, ƀiădah lŏ mkŏ knơ̆ng kơ sa gưl mđĭ kyar mrâo, bi klă bruă klam jing pô ktrâo atăt mơ̆ng bruă Đảng knơ̆ng bruă sang čư̆ êa čar lŏ dơ̆ng bi sĭt klei tui tiŏ hdră êlan duah klei sah mdrŏng lehanăn ktang mơ̆ng čar Daklak./.