
Mơ̆ng hruê anei (1/7), Lâm Đồng, Bình Thuận leh anăn Dak Nông klă sĭt bi mŭt, mkŏ mjing čar Lâm Đồng mrâo, mâo ênhă prŏng hĭn kluôm ala, ênoh mnuih ƀuôn sang lu hĭn ti Dhŭng kwar Krah leh anăn Lăn Dap Kngư. Ti Dak Nông, mnuih ƀuôn sang čang hmăng leh bi mŭt srăng mjing boh kdrŭt đĭ kyar kơ alŭ wăl đĭ kyar bruă duh mkra- ala ƀuôn, boh nik jing klei hiu čhưn ênguê leh ba yua klei găl mơ̆ng dŭm alŭ wăl hlăk mâo klei găl hiu čhưn ênguê.

Ayŏng Nguyễn Anh Quốc, ti wăl krah Ea Tling, kdriêk Čư̆ Jŭt, čar Dak Nông (hđăp) brei thâo, mơ̆ng leh mkŏ mjing, thŭn 2004, čar đĭ kyar leh pral, klei hdĭp mnuih ƀuôn sang dưi mkra mđĭ klă mngač. Ñu čang hmăng, leh bi mŭt hŏng dua alŭ wăl mâo klei găl kơ hiu čhưn ênguê jing Lâm Đồng leh anăn Bình Thuận, Dak Nông srăng dưi thiăm boh kdrŭt, mđĭ lar jăk hĭn klei găl mâo leh. Bi Khua mduôn Điểu Nơi, djuê ana M’Nông, ti ƀon Diêng Ngaih, să Dak R’tih, kdriêk Tuy Đức hđăp čang hmăng, bi mŭt 3 čar srăng mjing knhuang đĭ kyar kơ alŭ wăl. Čar mrâo srăng mâo hnơ̆ng bruă duh mkra prŏng leh anăn srăng mđing bi liê kơ krĭng taih kbưi msĕ si ƀon Diêng Ngaih: “Bi mŭt leh snăn mnuih ƀuôn sang Mnông ti Dak Rtih ăt mđing mă bruă knuă, sa ai tiê tui hlue Đảng, Knŭk kna. Mnuih Mnông čang hmăng leh bi mŭt srăng mđĭ kyar jăk hĭn krĭng mnuih djuê ƀiă, khua gĭt gai čar mrâo srăng mđing bi liê ti krĭng mnuih djuê ƀiă, hlăm anăn mâo mnuih ƀuôn sang ti Dak Rtih Êlan dơ̆ng êran pral srăng pŏk čiăng kơ mnuih ƀuôn sang găn êrô jăk hĭn.”
Viết bình luận