Hđeh anei dưi ba dŏng mdrao mjêč ti Sang êa drao hlăk 10h mlam hruê 18/12 hŏng kngan điâo êka mčah lu anôk, ală hnuă êka kyua phao mơar mtuh. Aê mdrao Trần Minh Trực – Khua adŭ mdrao klei êka êkeh – Sang êa drao prŏng krĭng lăn dap kngư brei thâo, kyua anôk êka kjham, phung aê mdrao khăt lui leh 3 kđiêng kngan điâo hđeh anei mbĭt anăn mdrao anôk êka ti ală.

Ară anei, hđeh anei suaih leh ƀiădah ăt huĭ mâo lu klei amâo jăk ti anôk êka. Êlâo anăn, Sang êa drao prŏng ăt dŏng mdrao 4 čô hđeh êka kyua phao mơar čŏng mkra mjing. Phung aê mdrao mtă, Têt dơ̆ng truh, phung hđeh kreh dlăng lu klei arăng duah mtô mkra phao mơar hlăm êlan mạng, ba lu klei huĭ hyưt. Phung amĭ ama brei mđĭ klei mtô mtă čiăng răng mgang anak čô pô./.