Hlăm mmông tŭ drông, khua gĭt gai Đảng bi myuôm dŭm klei đru mguôp jăk leh anăn klei gĭr mơ̆ng pô bi ala hlăm bruă mtrŭt mđĭ klei mjĕ giăm dua ala čar hlăm wưng êgao, hŏng mta kñăm jing mđĭ hnơ̆ng klei mjĕ giăm jing ƀĭng hgŭm bi mguôp hdră êlan kluôm dhuôm leh anăn hơêč hmưi kơ pô bi ala dưi bi leh bruă klam ti Việt Nam. Hlăm klei bi mguôp hdră êlan kluôm dhuôm, dua ala čar čiăng lŏ dơ̆ng mtrŭt mđĭ klei đăo knang bruă kđi čar leh anăn ha mbha hdră tă leh anăn klei mĭn hŏng dŭm boh klei hlăm alŭ wăl leh anăn tar rŏng lăn.

Bri wưng anei, khua gĭt gai Đảng lač jăk kơ knŭk kna Australia đru leh kơ Việt Nam hlăm lu mta bruă msĕ si bruă mdrao mgŭn, tiŏ nao êpul răng mgang klei êđăp ênang Êpul hgŭm lu ala čar, bi mdrơ̆ng hŏng klei bi mlih yan adiê leh anăn mlih pui kmlă, mkŏ mjing klei găl kơ êpul êya 350 êbâo čô mnuih phŭn Việt Nam ti Australia, mñă klă Việt Nam čiăng mđĭ hĭn klei mjĕ giăm, bi mguôp hŏng Australia kyua boh tŭ dưn mơ̆ng mnuih ƀuôn sang dua lăn čar, ăt msĕ mơh klei đru mguôp hlăm klei êđăp ênang, hơĭt kjăp hlăm alŭ wăl leh anăn tar rŏng lăn.